Mwa Kwendejeja Bifundwa bya Bible na Kitabo “ L’amour de Dieu ”
1. Lelo i kitungo’ka kilupwidilwe kitabo “ L’amour de Dieu ” ?
1 Twasangele bikatampe pa kutambula kitabo “ Gardez-vous dans l’amour de Dieu ” (Mwilamei mu Buswe bwa Leza) ku kitango kya distrike “Baludikwe na Mushipiditu wa Leza”! Monka motwaivwanine musapu, kino kitabo i kilupulwe mwanda wa kwitukwasha tuyuke misoñanya ya Yehova ya mwa kwiendejeja ne kwiisanswa, ke pa mwandapo wa kufundija bufundiji bwa kyalwilo bwa Bible. Ketukapānapo kino kitabo ku njibo ne njibo.
2. Le i bāni bafwaninwe kwifundwa nabo kino kitabo, ne muswelo’ka?
2 Kino kitabo kyo kikefundwa bu kitabo kya bubidi pa kupwa kwifunda Bible na muntu mu kitabo Bifundija Bible. Yuka’mba kwendelela kwa bantu ku mushipiditu i kwishile ku muntu ku muntu. Kifundwa kyonso kifwaninwe kwendejibwa mungya bukomo bwa mwifundi. Ta mutyima ku kuyuka shi byomwifunda wibivwananga senene. Pavule pene, kino kitabo kekifwaninwepo kushilulwa nakyo bifundwa bya Bible na bantu ke bapwe kwifunda mabuku meshileshile mafuku a munyuma ino kutanwa ku kupwila kwa pa kipwilo mpika, nansha boba kebasakengapo kukwatañanya būmi bwabo na bubinebine bwa Bible bobafundijibwe.
3. Le tukalonga namani shi twendejanga kala kifundwa mu kitabo Tōta Leza?
3 Shi pano wendejanga kala kifundwa mu kitabo Tōta Leza, ne kemudi ku mashapita a ku mfulo, mukokeja kuvuya’kyo ne kukankamika omwifunda nandi etangile kitabo “ L’amour de Dieu ” aye mwine. Ino shi mukidi’nka na mashapita matyetye, i biyampe mutundulukile mu kino kitabo kipya ne kushilwila’kyo ku ngalwilo. Monka mwifundilwanga kitabo Bifundija Bible, shi muswile, mubwanya kubandaula ne myanda idi mu mbwejo.
4. Le tukalonga namani shi mwifundi wabatyijibwa kwampikwa kuvuya dibuku Bifundija Bible ne “ L’amour de Dieu ” ?
4 Shi muntu wabatyijibwa kwampikwa kupwa dibuku dya bubidi, kifundwa kikendelela enka ne pakapwila kitabo “ L’amour de Dieu ”. Nansha shi mwifundanga na muntu kemupwe kubatyijibwa, ukendelela kubala kitatyi kya kifundwa, kujokela’mo kupya ne kifundwa kine. Musapudi omukendeja nandi kifundwa ukabala nandi kitatyi.
5. Le kitabo “ L’amour de Dieu ” kikokeja kwingidijibwa namani pa kukwasha basapudi badi kebakingilanga kitatyi kampanda?
5 Shi Komite wa Mingilo wa Kipwilo wakunena kwifunda na muntu wadi kakingilanga, babwanya kukunena ubandaule nandi mashapita kampanda a mu kitabo “ L’amour de Dieu ”. Bifundwa bidi namino kebilombangapo kwendejibwa kitatyi kilampe. Bine, mpangiko ya kino kitabo kipya i miyampe mpata, kyalupwidilwe kwitukwasha twilame “mu buswe bwa Leza”!—Yude 21, BB.