Malondololo ku Bipangujo Byenu

◼ I bitabo’ka bibidi bifwaninwe kwifunda na boba basangela musapu?

Dibuku Bifundija Bible i kyo kingidilwa kinekine kya kushilula nakyo ne kwendeja’mo bifundwa bya Bible. Shako ke bibipo kushilula kifundwa kya Bible mu dibuku dikwabo, kimfwa kwanza bidi nansha na trakte, inoko i biyampe kulonga buninge bwa kusambukila lubilo ku dibuku Bifundija Bible. Twi bamone bipa bilumbuluke kitatyi kyotwingidija dibuku Bifundija Bible pa kushilula bifundwa bya Bible.

Shi dibuku Bifundija Bible dibapu ino aye ukyendelela kumeso, nabya mufwaninwe kwifunda ne dibuku Tōta Leza. (Kol. 2:7) Dino dibuku dishintulula kitungo kyadyo pa paje wa 2 amba: “Bible usoñanya bonso baswele Leza bekale ‘kukwatyija mu ñeni bwimwa ne nkulwe’ ya bubinebine bulēme. (Ef. 3:18) O mwanda i kuteakanibwe kino kitabo. Tukulupile amba kikakukwasha utame ku mushipiditu, wikale ne mukumbanye byonso senene mwa kunangila mu kashinda katyetye katwala ku būmi mu ntanda impya ya boloke ya Leza.”

Shi mwifundi wabwanya bisakibwa bya kubatyijibwa kumeso kwa kuvuya ano mabuku onso abidi, kifundwa kifwaninwe kwendelela enka ne bipwa kitabo kya bubidi. Nansha shi mwifundi wapu kubatyijibwa, mwendeji ukendelela kubala nsaa, kujokela’mo, ne kifundwa kine. Musapudi usapula pamo na mwendeji nandi ukabala kitatyi.