Iula Mufundiji Mukatampe Poingidija Dibuku Bifundija Bible
1. Yesu wādi ufundija namani?
1 Yesu, Mufundiji Mukatampe, wādi nyeke ushintulula bintu mu muswelo upēla ne patōkelela. Kyaba kimo wādi bidi wipangula bemvwaniki bandi mobalangila’po mwanda wa kwibatonona balanguluke. (Mat. 17:24-27) Kupwa wādi ukokela ñeni yabo ku Kinenwa kya Leza. (Mat. 26:31; Mako 7:6) Wādi uta mutyima ku kuleka kulundika bandi bana ba bwanga myanda mivulevule, ke-pantu bādi ba kwendelela na kwifunda. (Yoa. 16:12) Ne kadi Yesu wādi uta bandi bana ba bwanga mutyima mwa kuyukila shi abaitabija ne kwivwanija byobya byaebafundija. (Mat. 13:51) Dibuku Bifundija Bible i dipungwe mu muswelo witukwasha tufundije uno muswelo.
2. Tukokeja kwingidija namani bipangujo bya ntwelelo ya shapita ne shapita?
2 Bipangujo bya Ntwelelo: Pomushilula kwifunda shapita, i biyampe kukokela milangwe ya muntu ku bipangujo bya ntwelelo bidi munshi mwa mutwe wa mwanda. Ipangula bipangujo bya bututudyatutu mwa kulangwila ndyoko ya mwifundi. Nansha ubwanya kumuleka esambile pa bino bipangujo mu kīpi. Kebilombepo kwisambila bininge pa nshintulwilo yaleta nansha kulemununa kintu kyonso kitupe kyanena. Ukokeja’tu kumufwija’ko pa milangwe yaaleta ne kushilula kwisambila pa myanda ifundwa. Myanda yakesamba ku bipangujo bya ntwelelo ikakukwasha uyuke shi ufwaninwe kukoma myanda kampanda mu kifundwa.
3. Tukapēleja kifundwa muswelo’ka?
3 Bisonekwa: Kifundwa kifwaninwe kwimanina pa Bisonekwa. (Bah. 4:12) Inoko, kebilombepo kusoma bisonekwa byonso bitelelwe. Nena ukoma’nka byobya bilombola amba nkulupilo yetu imanine pa Bisonekwa. Mavese alunga kuboko ku binenwe akokeja kukilwa kutangwa’o mpika. Dibuku Bifundija Bible dishintululanga bubinebine mu muswelo upēla. Nanshi nobe pēleja kifundwa. Nena ukoma enka myanda mikatampe, kokasaka kwisamba bivulevule pa kanda ne kanda nansha kutweja’mo myanda mikwabo yambulwa mvubu.
4. I bika bikemuludika shi mukabandaula nansha kuleka kubandaula myanda ya mbwejo kitatyi kyomwifunda?
4 Mbwejo: Mbwejo idi na myanda 14 ya kutentekela ku myanda mine ya kwifunda. Ubwanya kwisambila’po nansha kuleka kwisambila’po mu kifundwa. Kudi myanda imo yokokeja kulombola mwifundi akatange aye mwine ku mbwejo, nakampata shi wapu kwivwanija ne kwitabija kala myanda mine ya kwifunda. Kimfwa, shi mwifundi witabije kala amba Yesu i Meshiasa, kebidipo na mvubu kubandawila’ko mbwejo inena’mba “Yesu Kidishitu—Meshiasa Wālailwe” pomwifunda shapita wa 4, unena’mba “Lelo Yesu Kidishitu I Ani?” Kyaba kikwabo, padi bikalomba’tu kwisambila pa mbwejo kitatyi kyomwifunda myanda’ya, nansha kipindi kimo’tu kya mbwejo.
5. Shi ubasake kubandaula myanda ya mbwejo, i muswelo’ka omukabandaula’yo?
5 Shi ubasake kwisambila pa mbwejo, nabya teakanya kala bipangujo kumeso kwa kitatyi, kadi bandaulai misango pamo’nka bwa myanda mine ya kwifunda. Pakwabo, mungya bisakibwa bya mwifundi, ukokeja kuyata’ko’tu minite mityetye ya kupituluka mu myanda’ya pamo nandi. Kino kikakukwasha uyuke shi i mwivwanije myanda yatañanga aye mwine.
6. I muswelo’ka ubwanya kwingidijibwa kapango ka kupituluka’mo kadi ku mfulo kwa kifundwa ne kifundwa?
6 Kapango ka Kupituluka’mo: Kapango ka kupituluka’mo kadi ku mfulo kwa shapita ne shapita kalondololanga divule bipangujo bya ntwelelo. Ingidija bino binenwa mwa kupitulukila mu myanda mikatampe idi mu shapita. Basapudi bamo bamonanga amba i biyampe kutanga mwanda ne mwanda ne bisonekwa bidi’po pamo na mwifundi. Kupwa baipangula mwifundi ashintulule mu kīpi muswelo ubingija bisonekwa’bya mwanda mwine unenenwe’po. Kino kikalombola mufundiji shi mwifundi waivwanija biyampe myanda mikatampe idi mu kifundwa ne muswelo oimanine pa Bible ne shi witabije’yo. Kadi kifundijanga mwifundi muswelo wa kwingidija Bible pa kushintulwila bakwabo bubinebine.
7. Tukokeja kwingidija namani dibuku Bifundija Bible potuvuija mwingilo wetu?
7 Muswelo muyampe ya kuvuija mwingilo otupelwe wa kufundija bantu ne kulonga bana ba bwanga i kwiula miswelo ya kufundija ya Yesu. (Mat. 28:19, 20) Dibuku Bifundija Bible dikokeja kwitukwasha tumwiule. Twingidijei’dyo biyampe potufundija bakwetu bubinebine mu muswelo upēla, wa patōkelela, ne usangaja.