Ingidija Senene Bipindi bya Dibuku Bifundija Bible

Shi mwifundi wa Bible wefunde byobya bifundija Bible ne kwibingidija, ukatama ku mushipiditu ne kupa bipa. (Ñim. 1:1-3) Tukakwasha befundi bendelele kumeso shi twingidija senene bipindi bimo bya kamweno bya dibuku Bifundija Bible.

Bipangujo bya Ntwelelo: Shapita yense ushilula na bipangujo bilondolwelwe mu misango. Ukokeja kwipangula bino bipangujo bya bututudyatutu mwa kulangwila ndyoko ya mwifundi pa byomusa kwifunda. Kadi ukokeja kumunena alondolole mu kīpi ku kipangujo ne kipangujo. Shi walondolola bifwe, kokamulemununa kala. Malondololo andi akakukwasha ujingulule myanda ya kuta’ko mutyima ne kukomeneja.—Nki. 16:23; 18:13.

Mbwejo: Shi mwifundi waivwanija ne kwitabija byomwifunda, ukamukankamika’tu atange mbwejo ya pa yoya myanda aye mwine. Mu kifundwa kilonda’ko, pituluka’ko nandi bityetye mwa kuyukila shi webivwene. Inoko, shi umwene amba i kya kamweno kwadi, mubwanya kwisambila pa mbwejo kitatyi kyomwifunda nansha kipindi kya mu mbwejo na kutanga misango ne kwipangula bipangujo byoteakenye kala.

Kapango ka Kupituluka: Kapango ka kupituluka kadi ku mfulo kwa shapita ne shapita kadi na malondololo a bipangujo bya ntwelelo. Ubwanya kwingidija kano kapango mwanda wa kuyuka shi mwifundi wivwanije myanda mikatampe ne ubwanya kwiishintulula. Tangai malondololo onso pamo ne bisonekwa na diwi divwanikwa. Nena mwifundi engidije bisonekwa pa kushintulula kine kyaitabijije amba i bya bine.—Bil. 17:2, 3.