Ikala na Mutyima wa Kufwija’ko
1 Tudi na bubinga buvule bwa kufwijija’ko Yehova, nansha byotwikele mu “myaka ya malwa.” (2 Tem. 3:1) Kibajinji kyotumufwijija’ko i kyabuntu kya wandi Mwana kyaetupele. (Yoa. 3:16) Kikwabo, tudi mu maloa a bidibwa bivule bya ku mushipiditu, inoko boba badi mu mutōtelo wa bubela badi mu nzala ya ku mushipiditu. (Is. 65:13) Kadi tubadilwa mu bu bana na bana bwa ntanda yonso ne tupelwe madyese a kutandabula mutōtelo wa bine. (Is. 2:3, 4; 60:4-10, 22) Le i muswelo’ka otukokeja kufwija’ko Yehova pa mwanda wa madyese awitupungulwila?—Kol. 3:15, 17.
2 Mwingilo wa Nsangaji, wa na Mutyima Onso: Mutumibwa Polo wāsonekele pangala pa kupāna byabuntu, amba: “Leza uswele wakupana ne mutyima, tō.” (2 Kod. 9:7) Uno musoñanya utala ne mwingilo otwingidila Leza. Kufwija’ko kwetu kumwekelanga ku kupyasakena bubinebine kwetu, ku nsangaji yotulombola ku kupwila kwa bwine Kidishitu, ku bupyasakane bwetu mu mwingilo wa budimi, ne ku kusangala kotusangela kuvuija kiswa-mutyima kya Leza.—Mit. 107:21, 22; 119:14; 122:1; Loma 12:8, 11.
3 Mu Isalela wa kala Mukanda wa Bijila kewādipo ulombola kibalwa kampanda kya byakwela. Mutōtyi yense wādi wa kulombola kufwija’ko kwandi aye mwine na kupāna “mwendele dyese dya Yehova” dyatambwile. (Kup. 16:16, 17) Ne dyalelo nadyo mo monka, mutyima wa kufwija’ko uketutonona kulonga bivule nansha bityetye mu mwingilo wa busapudi ne wa kulonga bana ba bwanga mungya ngikadilo yetu. Kweji wa 6 kufika ku wa 8 i makweji etupanga pavule pene mikenga ya kulombola kufwija’ko kwetu. Bamobamo bamonanga kitatyi kyobapebwa konje ku kaji nansha ku masomo nansha ngikadilo mikwabo bu kitatyi kifwaninwe kulundila’ko mwingilo wa budimi, kimfwa na kwingila bu pania mukwashi. Lelo nobe kubwanyapo kutandabula mwingilo obe?
4 Vudija Kufwija’ko: Dishinda dimo dya mvubu mu kulombola kufwija’ko kwetu kudi Yehova i milombelo. (1Tes. 5:17, 18) Kinenwa kya Leza kitusoñanya amba twikale ‘kukankamikwa monka mu kwitabija kwetu, kadi ne kufwija’ko nako tuvudije’ko.’ (Kol. 2:7) Nansha ke kitatyi kyotuvudilwe bya kulonga nansha kyotudi na njia, tufwaninwe nyeke kubweja kufwija’ko kwetu mu milombelo yetu ya difuku ne difuku. (Fid. 4:6) Ne kutatana kwine mpika, twikalei na “kufwija kungi kungi [kudi Leza]” kupityila ku mwingilo ne ku milombelo yetu.—2 Kod. 9:12.