Minjiki Itūkija Mutyima
1 Buimba ne minjiki i kipindi kya mvubu mu butōtyi bwa bine. Mu Isalela wa kala, Asafa ne banababo baimbile amba: “A banwe fwijai Yehova, . . . Mwimbilei mwimbilei mitendelo; mulangei mingilo yandi yonsololo ya kutendelwa.” (1 Bil. 16:8, 9) Dyalelo nadyo tutululanga mawi etu na kwimbila Yehova ku kupwila kwetu kwa yenga ne yenga. (Ef. 5:19) Bine, uno i mukenga muyampe wa kutendela dijina dyandi!—Mit. 69:30.
2 Kwivwana Ñimbo ya Bulopwe, ñimbo ya Bulopwe myombwe ne mikwatwe, bikokeja kuyuja ñeni yetu na milangwe ya ku mushipiditu. “Kitatyi kyombwa ino ñimbo, bishima papo kebingiya mu ñeni,” ye muvulukila kaka umo. “Bine, kwivwana minjiki i muswelo umo mulumbuluke onañanga Yehova mu milangwe!”—Fid. 4:8.
3 Mikenga ya Kwiisangela: Kwivwana Ñimbo ya Bulopwe ku njibo kuletanga mwikadila wa ku mushipiditu upāna ndoe ne nsangaji mu kisaka. “Twivwananga ino minjiki misunsa ne misunsa mu yetu njibo ne mu motoka, kadi mungya’tu moyombelwe ketwatondelwe kashā ino minjiki ikunka,” ye mwalembele kisaka kimo. “Pavule pene Ñimbo ya Bulopwe itupanga ñeni mijalale kitatyi kyotwenda ku kupwila kwa bwine Kidishitu nansha shi tudi mu lwendo lwa ku kitango kampanda.” Kaka umo nandi wanene amba: “Inkwashanga binebine poñivwana’yo shi ñingila mingilo ya ku njibo—Le ani ukokeja kulangila nsangaji yongikalanga nayo nansha shi mpupa bisandi? Netūdile’ko mpangiko ya kwivwana ino minjiki kitatyi kyonso kyontyumukwa mutyima. Bine, ino minjiki ikunka’po mutyima kashā! . . . Lwimbo ne lwimbo luleta nsangaji.” Lelo kudi mikenga yokokeja nobe kumwena mu minjiki itūkija mutyima pamo na ino?
4 Dyalelo minjiki mivule ilombolanga mushipiditu wa ino ntanda. Bambutwile babwanya kukwasha babo bana batamije kyumwa kya minjiki miyampe na kwingidija senene Ñimbo ya Bulopwe mikwatwe. Befundi ba Bible bavule ne boba basangela musapu nabo bakasangela kuyuka ino ñimbo milumbuluke, itumbija Yehova ne ikankamika.—Mit. 47:1, 2, 6, 7.