Yehova Ukwashanga Boba Bamukulupile
1 Bantu bavule bamonanga’mba lupeto, bukomo, ne bwino bwa muntu lo lufungulo lwa kubwina. (Mit. 12:4; 33:16, 17; 49:6) Inoko, boba bakaminwe Yehova ne kutūla kikulupiji kyabo mudi aye i bebakulupije mu Bible amba “aye i mukwashi wabo ne ngabo yabo.” (Mit. 115:11) Pano tubandaulei mu bintu bibidi mwitusakila kukulupila mudi Yehova.
2 Byotudi bu Bengidi Bene Kidishitu: Kitatyi kyonso kyotupityija bipindi mu kipwilo nansha kyotufundija mu mwingilo wa budimi, tufwaninwe kwiubija mudi Leza wetu. Tubandaulei kimfwa kya Yesu. Aye mwine ye Mwanā Leza, kādipo ukulupile mu ñeni ya aye mwine nansha mu bwino bwandi, ino wādi utūdile kikulupiji kyandi kyonso mudi Shandi wa mūlu. (Yoa. 12:49; 14:10) Bine, batwe papo ke pepi! (Nk. 3: 5-7) Bukomo bwetu botulonga bukamupeja bulēme ne kupa bakwetu kamweno enka kupityila ku madyese a Yehova.—Mit. 127:1, 2.
3 Netu tulombolanga kikulupiji kyetu mudi Yehova na kulomba bwendeji bwandi ne bukwashi bwa mushipiditu sandu wandi. (Mit. 105:4; Luka 11:13) Ne kadi, tukalombola kikulupiji kyetu mudi Leza na kwala kyalwilo kya bufundiji bwetu pa Bible, Kinenwa kyandi. Musapu wa Bible udi na bukomo bwa kutenga mityima ne kwalamuna būmi bwa bantu. (Bah. 4:12) Kitatyi ‘kyotwingila na ba bukomo bwa kupebwa na Leza,’ Yehova ukatumbijibwa ntumbo.—1 Pet. 4:11.
4 Kukomena Bikambija: Tufwaninwe kadi kukimba bukwashi kudi Yehova kitatyi kyotutanwa na mitabakano ne bikambija. (Mit. 46:1) Kimfwa padi mukulumpe wetu wa kaji wapele kwitupa konje wa kwenda kukatanwa ku kitango, nansha padi tubatanwa na makambakano kampanda mu būmi bwa kisaka kyetu. Tukalombola kikulupiji kyetu mudi Yehova na kumulomba kitatyi ne kitatyi ne na kulonda bwendeji bwapāna kupityila ku Kinenwa kyandi ne ku bulongolodi bwandi. (Mit. 62:8; 119:143, 173) Wivwane bengidi ba Yehova bekale kulonga namino, nankyo bakemwena kuboko kwandi kwa bukwashi mu būmi bwabo.—Mit. 37:5; 118:13, 16.
5 Yehova mwine witukulupija amba: “Ye wakatōkwe yewa muntu ukulupile mudi Yehova, ne lukulupilo lwandi i Yehova enka.” (Yel. 17:7) Le twabulwa’po netu kutūla kikulupiji kyetu mudi aye mu byonso byotulonga?—Mit. 146:5.