Mpangiko ya Kubungakana kwa Kipindi
1 Pa kwimanija mu lwitabijo mu ino ntanda itelententa, tufwaninwe kukulupila mudi Yehova. Lelo kino kitulomba tulonge bika mu būmi bwetu? Lelo kukulupila mudi Yehova kudi na lupusa’ka pa būmi bwetu ne bwa kyetu kisaka? Le kwitukwashanga namani tukomene lupusa lwa ino ntanda ya Satana? Mpangiko ya kubungakana kwa kipindi kwa mu mwaka wa mingilo wa 2003 ikalondolola bino bipangujo. Mutwe wa mwanda wa ino mpangiko unena amba, “Kulupila Mudi Yehova, ne Kulonga Biyampe.”—Mit. 37:3.
2 Kikulupiji kyetu mudi Yehova ke kya kulombolapo enka mu bitatyi kampanda bya pa bula nansha mu bufudile bwa malwa kete. Ino i kya kulombola mu būmi bwetu bonso bwa difuku ne difuku. I pa uno mwanda pakemanina dishikulu dya ñanjilo dinena amba, “Kulupilai Mudi Yehova Mafuku Onso Nyeke.” (Mit. 62:8) Dishikulu dya mapingu aná dinena amba “Twikalei na Kikulupiji Mudi Yehova” diketulombola mwa kutanina ne kwingidijija myanda imanine pa Bible ikokeja kwitukwasha tuyuke mwa kulumbulwila busongi bwetu, mwa kupwila myanda itamba mu kisaka, ne mwa kumwena bisakibwa byetu bya ku ngitu.
3 Ntanda ya Satana itompanga kwituningila mumweno wayo munyengakane wa biyampe ne bibi, kadi idi na kavutakanya mwanda keiyukilepo kya mvubu i kyepi. (Is. 5:20) Mashikulu alonda’ko: “Mwilamei ku Bintu Byabituputupu bya Umbūmi” ne “Mwijibei Bibi—Ikalai Balongi ba Biyampe” aketukwasha tuningishe kusumininwa kotusumininwe kufikila pa misoñanya ya peulu ya Yehova.—Am. 5:14.
4 Pakaleta Yehova mfulo ya ino ngikadilo imbi ya bintu po pene bengidi bandi bakasakilwa kumukulupila byabinebine. Uno mwanda ukalombolwa patōka mu dishikulu dya bantu bonso dinena amba, “Kunyongololwa ku Tusua twa Ino Ntanda Kubafwena.” Kupwa kwa dino dishikulu, baketukankamika tuyuke kwibandaula batwe bene, na kipindi kinena amba, “Lelo Ukekala Mufwaninwe Bulopwe bwa Leza?” Mpangiko ikafula na binenwa bikankamika amba, “Tukulupilei mu Milao ya Yehova.”
5 Kipindi kikatampe mpata kya ku kubungakana ne kubungakana i dishikulu dya lubatyijo. Yewa yense usaka kubatyijibwa ufwaninwe kulombola mutadi mwimaniji kumeso kwa kitatyi nandi amone mwa kukwatyila mpangiko pa uno mwanda.
6 Mu bino bitatyi bikabakane, Yehova ye nsulo imo kete ya kikulupiji ne būmi bujalale. (Mit. 118:8, 9) O mwanda batwe bonso tuningishei kikulupiji kyetu mudi aye na kukatanwa ku mpangiko yonso mituntulu ya kuno kubungakana kwa kipindi.