Mpangiko ya Kubungakana kwa Kipindi

Tuyukile amba Yehova Leza ye ufwaninwe buswe bwetu ne kulamatwa enka aye. Inoko ntanda ikimbanga kwitongola tuleke kwendeleja kipwano kyetu na Yehova. (Yoa. 17:14) Pa kusaka kuloeja buswe botuswele Yehova, ne kuningija bukomo bwa kukomena bintu bya ino ntanda bitūla būmi bwetu bwa ku mushipiditu mu kyaka, mpangiko ya kubungakana kwetu kwa kipindi kwa mu mwaka wa mingilo wa 2001 ikekala na mutwe wa mwanda unena amba “Swai Leza​—⁠Kemukiswai Bintu bya Ino Ntanda.”​—⁠1 Yoa. 2:​15-17.

Buswe bwa mushike botuswele Yehova bwitukunkanga tusapule bukamoni bwa padi aye. Eyo, mwingilo wa budimi ke mwingilopo upēla ku bavule mu bantu ba Leza. Mu kipindi kinena amba “Buswe Botuswele Leza Bo Bwitutononanga mu Mwingilo Wetu,” tukafunda’mo muswelo unekenyanga banabetu bavule bumvu ne bijika bikwabo, ebiya kebatambila mu mwingilo senene.

Lelo mikadila myoneke ya ino ntanda ituteñanga muswelo’ka? Bilongwa byādi bimwenwe bu bibi pano kebitelwa bu mwikadilo wa bantu bonso. Kishinte “Bantu Baswele Yehova Bashikilwe Bubi” ne kishinte kya mapingu “Bintu bya mu Ino Ntanda​—⁠Lelo Twibimwene Muswelo’ka?” biketukwasha tuninge na kupela bilokoloko bibi.

Masomo a Mwingilo wa Kiteokratike ne Kupwila kwa Mingilo bya kulondela’po bikatwejibwa mu mpangiko, pamo ne kishinte kya Kiteba kya Mulami kya kwifunda mu mwine yenga’wa kikanenwa mu kīpi. Kishinte kya bantu bonso, “Buswe ne Lwitabijo Mobyanekenyenya Ntanda,” kiketukankamika twiule Yesu wānekenye bikambija bya ino ntanda. (Yoa. 16:33) Vuluka kwita bowifundanga nabo Bible bāye batanwe’ko. Yewa yense ukimba kubatyijibwa ufwaninwe kuyukija mutadi mwimaniji kumeso kwa kitatyi, nandi mwa kumwena kyaba kya kuteakanya’ko mpangiko.

Kuno kubungakana kwa kipindi kukakokela milangwe yetu nakampata pa kuyuka i pepi pafwaninwe kwimanina buswe bwetu nabya tukamone kukeselwa madyese a ntanda ne ntanda na Yehova. Kokabulwa kutanwa ku kipindi nansha kimo!