Kūminina Kuletanga Mpalo
1 “Ebiya pa [kūminina] po pakumwenamo ne myuya yenu.” (Luka 21:19) Bino bishima, bitanwa mu bupolofeto bwa Yesu bunenena pa ‘kuvuika kwa ngikadilo ya bintu,’ bilombola patōkelela amba pa kulama bululame bwetu, tufwaninwe kwikala beteakanye kukomena matompo mavule. Inoko na bukomo bwitupa Yehova, tubwanya ‘kūminina pototo, ne pa mfulo pene,’ ne ‘kukapanda.’—Mat. 24:3, 13; Fid. 4:13.
2 Kupangwapangwa, misongo, bufudile, ne njia bibwanya kwitususula mobukila mobukila. Inoko ketwakilwai nansha dimo amba Satana ukimbanga kutyumuna bululame bwetu kudi Yehova. Difuku dyonso dyotulama kikōkeji kudi Tata wetu dimukwashanga kulondolola yewa wa lonji umupunika. Bine, i mpalo pa kuyuka amba “impolo” yetu yotusumija mu matompo keidibwangapo! Idi na bulēme ku meso a Yehova, kadi bululame bwetu busangaja mutyima wandi!—Mit. 56:8; Nk. 27:11.
3 Batōkejibwe na Matompo: Masusu abwanya kulombola buzoze bwa lwitabijo nansha tuto twa bumuntu bwetu, kimfwa mitatulo ne kubulwa kitūkijetyima. Pa kyaba kya kukimba kunyema matompo nansha kufudija’o mu muswelo wampikwa kukwatañana na bisonekwa, tufwaninwe kulonda madingi a Kinenwa kya Leza anena amba “lekai kūminina kufikidije mwingilo wako pa mfulo.” Mwanda waka? Mwanda kūminina matompo na kikōkeji kwitukwasha twikale “bakunkane, babwane mu bintu byonso.” (Yak. 1:2-4, NW) Kūminina kubwanya kwitukwasha tutamije ngikadilo ya mvubu, pamo bwa bujalale, kulangila bakwetu, ne kufwila lusa.
4 Buya bwa Lwitabijo Lutompwe: Kitatyi kyotūminina mu matompo, tutambulanga lwitabijo lutompwe ludi na bulēme bukatampe ku meso a Leza. (1 Pet. 1:6, 7) Lwitabijo lwa uno muswelo lwitumbilanga twikale kwimanija mu matompo aketufikila kumeso. Pakwabo kadi, tukemona bu bantu betabijibwe na Leza, ne kino kikaningija kukulupila kwetu, kwaikala ke kwa binebine kotudi.—Loma 5:3-5.
5 Mpalo ya kūminina mipite kulumbuluka i milombolwe patōka mu Yakoba 1:12, amba: “Katōkwe ko kandi yewa muntu ukankamene mu kutompibwa; ke-pantu pa kulumbulukila monka ukatambulanga kilukwa kya būmi.” Nanshi, twendelelei kwimanija mu kutōta Yehova, ne kukulupila amba ukendelela kupala mpalo mikata “boba bamusanswa.”