“Katōkwe ko Kandi Yewa Muntu Ukankamene mu Kutompibwa”
1 Bene Kidishitu bonso batanwanga na matompo. (2 Tem. 3:12) Matompo amo akokeja kwikala misongo, kubulwa lupeto, byongo, kupangwapangwa, nansha a miswelo mikwabokwabo. Matompo etuletela Satana ekalanga etufikija ku kuzoza, ku kulengwa mwingilo wetu wa Bwine Kidishitu, nansha ku kuleka’byo kwingidila Leza. (Yoba 1:9-11) Penepa kukankamana mu kutompibwa kuletanga katōkwe namani?—2 Pet. 2:9.
2 Witeakanye ku Matompo: Yehova i mwitupe Kinenwa kyandi kya bubinebine, mudi ne mānga ya būmi ne bufundiji bwa Yesu. Shi tuteje byānene Yesu ne byaālongele, nabya tukāla kyalwilo kikomo ne kwiteakanya ku matompo. (Luka 6:47-49) Kadi, tumwenanga mu mpangiko mikwabo—banabetu Bene Kidishitu, kupwila kwa pa kipwilo, ne mabuku esambila pa Bible alupulwa na kabumbo ka umpika wa binebine ne wa manwa. Tudi kadi na kyabuntu kya kulomba Leza kyaba kyonso.—Mat. 6:13.
3 Pakwabo kadi Yehova i mwitupe lukulupilo. Wivwane tutamije lwitabijo lukomo mu milao ya Leza, nabya lukulupilo lwetu lukekala “bwa kikwatyijo kya masua. I lukomo kadi i lwa binebine” ku myuya yetu. (Bah. 6:19, MB) Mu myaka ya kala, masua keadipo abwanya kushunuka shi keadipo na kikwatyijo, nansha shi kūlu kudi biyampe. Mwanda shi luvula lubapukuma mu kitulumukila, kikwatyijo kyo kikakwasha masua aleke kwitema ku mabwe. Mo monka ne kutamija lwitabijo lwetu mu milao ya Leza tamba pano nako, kuketukwasha tuleke kusunkanibwa pakapukuma kivula. Makambakano abwanya kulupuka na mu kukopa kwa diso. Myanda yāshintyile lubilo lonka pāile Bayuda balwana nansha byādi bisapula ba Polo ne Banabasa senene shē pobafikile mu Lesetala.—Bil. 14:8-19.
4 Kūminina Kuletanga Katōkwe: Kwimanija nshinkidingi mu mwingilo nansha shi tulondwalondwa kwitupanga ndoe ya mutyima. Tusepelelanga mwanda tutongelwe kala kukobakanibwa pa dijina dya Kidishitu. (Bil. 5:40, 41) Kūminina matompo kutamijanga motudi ngikadila pamo bwa kwityepeja, kikōkeji, ne kutyumwina bintu umanwi. (Kup. 8:16; Bah. 5:8; Yak. 1:2, 3) Kwitufundijanga tuyuke kwiubija mudi Yehova, kukulupila mu milao yandi, ne kunyemena kudi aye wa kwitukinga.—Nk. 18:10.
5 Tuyukile amba matompo i a kakitatyi katyutyu. (2 Kod. 4:17, 18) Matompo etupanga mukenga wa kulombola amba tuswele Yehova ne pa mfulo. Shi tukankamane na kūminina, nabya tubabepulula bubela bwa Satana. Nanshi ketwakizozai! “Katōkwe ko kandi yewa muntu ukankamene mu kutompibwa; ke-pantu pa kulumbulukila monka ukatambulanga kilukwa kya būmi.”—Yak. 1:12.