Ingidija Bible Biyampe
1. I kika kyokokeja kulonga powilongolola kwenda mu mwingilo wa budimi?
1 Nansha shi twibetungile kupāna mabuku’ka mu mwingilo, i kya kamweno kutonga’ko mulangwe umo wa mu kisonekwa ulanguluja wa kwisambila’po na boba betwivwana. (Bah. 4:12) Kutonga kisonekwa kitelelwe mu dibuku dyopāna kikakukwasha mwa kusambulukila senene ku dibuku’dya. Mu bifuko bimo, basapudi bamonanga amba i biyampe kusela Bible ku makasa kitatyi kyobafwena muntu nansha kyobasapula ku njibo ne njibo.
2. (a) I muswelo’ka otubwanya kushilula busapudi na kisonekwa? (b) Le i myanda’ka ya mu Bisonekwa isangajanga bantu ba mu wenu mwaba?
2 Shilula na Kisonekwa: Basapudi bamo bashilulanga kusapula na kwipangula mwivwaniki kipangujo kipēla kya kusaka alombole mwalangila pa kisonekwa kyobapwa kutanga. Kino kikokelanga milangwe bukidibukidi ku Kinenwa kya Leza. Lelo ntwelelo pamo bwa ino ilonda’ko’i ibulwe’po kwikala mifwaninwe mu wenu mwaba?
◼ “Shi wadi’mba abe ye udi na bukomo bwa kuleta kuno kushinta, mwene longa kodi mupwe kwikuleta?” Tanga Kusokwelwa 21:4.
◼ “I kika kinenenwa’mba yotudi’mo ino yo mine myaka ya malwa?” Tanga 2 Temote 3:1-5.
◼ “Ulanga namani shi bantu bonso badi balonda ano madingi, mwene longa batwe bonso twadi ba kwikala senene mu kibundi?” Tanga Mateo 7:12.
◼ “Lelo ulanga’mba bobe bana babwanya kukekala mu ngikadilo ilombwelwe pano’i?” Tanga Mitōto 37:10, 11.
◼ “Molangila, le kukekalanga kitatyi kikafikidilanga bino binenwa?” Tanga Isaya 33:24.
◼ “Lelo ujingulwile kala kushinta kwa bulopwe butelelwe pano’bu?” Tanga Danyele 2:44.
◼ “Lelo nobe kasha kwaikele kwipangula Leza kino kipangujo?” Tanga Yoba 21:7.
◼ “Lelo tukokeja dikwabo kumona baswe betu bafwile?” Tanga Yoano 5:28, 29.
◼ “Lelo bafu bayukile bilonga bōmi?” Tanga Musapudi 9:5.
3. I muswelo’ka otukakwasha bantu bevwanije bisonekwa byotutanga?
3 Shintulula, Leta Kimfwa, Lombola Mvubu: Shi muntu wasangela kwisamba nandi, kokiyumbila kutwela mu mīsambo. Witūdile’ko bidi kitatyi kya kushintulula, kuleta kimfwa, ne kulombola mvubu ya kisonekwa kyowatanga amba ekivwane. (Neh. 8:8) Shi bantu abaivwana ne kwitabija byobya bifundija Kinenwa kya Leza, babwanya kushinta būmi bwabo mu muswelo utendelwa.—1 Tes. 2:13.
4. I muswelo’ka otubwanya kwingidija Bible senene mu kujokela’mo kupya?
4 Endelela kwingidija Bible senene kitatyi kyotamija kusangela. Kitatyi kyoenda mu kujokela’mo kupya, ingidija ano manwa onka: (1) Tonga kisonekwa kimo kifwaninwe. (2) Ipangula’ko kipangujo kimo kipēla kadi kilanguluja pa kisonekwa’kya. Kupwa tanga’kyo. (3) Shintulula’kyo, leta kimfwa, ne kulombola mvubu yakyo. Kitatyi kyonso kyopempula muntu, longa buninge bwa kumubweja’ko buyuki bwa Kinenwa kya Leza. Shilula kwendeja kifundwa kya Bible kwampikwa kwija!