Kampanye ka pa Bula ka Kwabanya Boloshile Umpya
1 Dyalelo bantu bavule i bavutakanibwe ñeni na ngikadilo ya ntanda, ino enka batyetye kete bo bemvwanije mwanda waka bintu bidi uno muswelo, i bika bitutengele kumeso, ne i bika byotufwaninwe kulonga shi tusaka kupanda ku kidye kiya kumeso. (Ezek. 9:4) O mwanda pa kusaka kwibakwasha bano bantu bayuke nshintulwilo ya bino bitatyi, tukalonga kampanye ka kwabanya boloshile umpya Endelelai na Kukesha! tamba mu difuku Dya Mwanzo, mafuku 18 Kweji 10 kutūla ne mu Dya Yenga, mafuku 14 Kweji 11.
2 Tukokeja kwabanya uno boloshile potudi mu mwingilo wa ku njibo ne njibo, mu kujokela’mo kupya, mu busapudi bwa kiponka na ponka, ne mu bifuko mudi bantu bavule. Inoko, Endelelai na Kukesha! kakabanibwapo ku muntu ye-yense, mhm. Ano maboloshile akapebwa enka boba basangela binena Bible pa mwanda utala nshintulwilo ya binkumenkume bya ntanda. Boba basangela bityetye musapu bakokeja kupebwa kakanda (trakte).
3 Ukokeja kutweja muntu mu mīsambo na kunena’mba:
◼ “Bavule batele mutyima ku makambakano makatampe ne ku binkumenkume bya ntanda bilongeka dyalelo. [Tela kimfwa kiyukilwe kwenu.] Lelo uyukile amba bino bintu byālailwe kala mu Bible? [Muleke alondolole. Kupwa tanga kisonekwa kikwatañene na kimfwa kyowatelanga, padi i Mateo 24:3, 7, 8; Luka 21:7, 10, 11; nansha 2 Temote 3:1-5.] Bible ulombola nshintulwilo ya bino bitatyi ne byobya bitengele bana ba bantu kumeso. Le usaka kuyukila’ko bivule? [Muleke alondolole. Penepa mupe boloshile shi wasangela musapu.] Uno boloshile tupāna’ye ku bitupu. Inoko shi nobe uswile kuleta’ko kyabuntu kya kukwatakanya mwingilo wetu wingilwa ntanda yonso, nabya tukasangela’kyo.”
4 Pakwabo kadi ukokeja kushilula namino:
◼ “Bantu bavule dyalelo batenekwanga na binkumbulu nansha na bibafikila mu ino ntanda. Bamo beipangulanga mwanda waka Leza kakankajapo bino bintu. Ino Bible witukulupija amba Leza usa kunyongolola bantu ku masusu panopano ponka. Tala byabuyabuya bikapebwa bantu na Leza. [Tanga Mitōto 37:10, 11.] Lelo usakile kuyukila’ko bikwabo?” Fudija monka mokilombwedilwe kūlu’ku.
5 Longa bukomo bwa kuyuka dijina ne adelese ya muntu ne muntu witabija boloshile, kadi kwata mpangiko ya kumujokela mwa kutamijija kusangela kwandi. Madingi a mwa kulongela kino akaletwa mu Mwingilo Wetu wa Bulopwe wa Kweji 11, 2004. Shi muntu wasangela mpata musapu mu kwitana kubajinji, ukokeja kushilwididila kifundwa mu boloshile Endelelai na Kukesha! nansha mu dibuku dikwabo, kimfwa boloshile Kisaka Leza.
6 Maboloshile mapya akekala’ko kinondanonda na Kupwila kwa Mingilo kukefundwa kino kishinte. I biyampe basapudi ne bapania basele bidi maboloshile mabwanine obasakilwa enka mu mafuku mabajinji a kampanye. Tulomba Yehova esele uno mwingilo wa pa bula ku ntumbo yandi ne ku kamweno ka ba mityima miyampe ba pi na pi.—Mit. 90:17.