Endeja Bifundwa bya Bible Byendelela Kumeso
Kipindi 7: Kulombela pa Kwifunda Kifundwa
1. (a) Mwanda waka i biyampe kushilula ne kufudija kifundwa kya Bible na milombelo? (b) Le tukashilula namani kulombela pa kwifunda kifundwa kya Bible?
1 Madyese a Yehova adi na kamweno pa kusaka befundi ba Bible bekale kwendelela kumeso. (1 Kod. 3:6) O mwanda i biyampe kushilula ne kufudija kifundwa ke kimane na milombelo. Divule tukokeja kwanza kulombela tamba ponka potushilula kifundwa na bantu balēmekele myanda ya Leza. Ino na bakwabo padi bikalomba kusansanya i kitatyi’ka kifwaninwe kushilula nabo milombelo. Padi ukokeja kwingidija Mitōto 25:4, 5 ne 1 Yoano 5:14 mwanda wa kukwasha mwifundi emvwanije amba i biyampe kulombela, kadi ukokeja kwingidija Yoano 15:16 pa kumushintulwila mvubu ya kulomba Yehova kupityila kudi Yesu Kidishitu.
2. Shi kaka waenda na tutu mubatyijibwe nansha na musapudi wampikwa kubatyijibwa ku kifundwa, le i ani ufwaninwe kulombela?
2 Le i ani ufwaninwe kulombela pa kwifunda kifundwa kya Bible? Shi tutu mubatyijibwe waenda pamo na kaka ku kifundwa, tutu ye ufwaninwe kulombela, nansha shi i kaka usa kwendeja kifundwa koku upūtyile ku mutwe. (1 Kod. 11:5, 10) Ku mutamba mukwabo, shi i musapudi wampikwa kubatyijibwa wendele na kaka ku kifundwa, papo kaka ukalombela. Ne pano pene kaka ufwaninwe kupūta ku mutwe kitatyi kyalombela ne kyaendeja kifundwa kine kumo.
3. I myanda’ka miyampe kutela mu milombelo yotulombela potwifunda Bible?
3 I Bika Byakutela mu Milombelo: Milombelo ya pa kwifunda Bible keifwaninwepo kwikala milamila, ino ifwaninwe kutenga pa mwanda. Kutentekela pa kulomba madyese a Leza pa kwifunda ne kumufwija’ko pangala pa bubinebine botwifunda, tukokeja ne kutendela’mo Yehova mwanda ye aye Nsulo ya bufundiji bwine. (Is. 54:13) Kadi tukokeja kutela binenwa bilombola amba tutele mwifundi mutyima bya binebine ne amba tufwijanga’ko bulongolodi bwingidija Yehova. (1 Tes. 1:2, 3; 2:7, 8) Kulomba kotulomba Yehova esele mwifundi mwanda wa bukomo bwalonga bwa kwingidija byobya byotwifunda kukakwasha mwifundi amone mvubu idi mu kwikala muntu ‘wa kulonga mwanda.’—Yak. 1:22.
4. Kushilula ne kufudija kifundwa kya Bible na milombelo kudi na byabuyabuya’ka?
4 Milombelo idi na byabuyabuya bivule. Iletanga madyese a Leza. (Luka 11:13) Ikomenejanga mutyika wa kwifunda Kinenwa kya Leza. Kadi pateja mwifundi milombelo yetu, nandi wifundilanga’ko muswelo wa kulombela. (Luka 6:40) Ne kadi, milombelo yetu itamba ku mutyima miyule buswe botuswele Leza ne kufwija kotumufwija’ko pangala pa ngikadilo yandi ya kwanwa ikakwasha mwifundi atamije kipwano kyandi na Yehova.