Malondololo ku Bipangujo Byenu

◼ Le Tufwaninwe Kulombela ku Njibo ya Mwifundi wa Bible?

Kulombela kumeso ne ku mfulo kwa kifundwa kya Bible kudi na byabuyabuya bivule. Tulombanga mushipiditu wa Yehova witukwashe mu misambo yetu kupityila ku milombelo. (Luka 11:13) Kadi milombelo ilombolanga otwifunda nandi amba kifundwa kyandi kya Bible kidi na bulēme ne imufundijanga nandi muswelo wa kulombela. (Luka 6:40) O mwanda i biyampe kushilula bukidibukidi na milombelo. Inoko ngikadilo byo ishintanga, mwendeji ufwaninwe kwikala na bujalale pa kuyuka shi ukalombela ku njibo ya mwifundi wa Bible.

Kintu kya mvubu kifwaninwe kubandaula i kifuko kyomwifundila’po. Shi mwifundilanga kwa bunka bwenu, mukokeja kushilula nansha kufudija kifundwa na kulombela na bunwa milombelo mīpi. Inoko shi kulombela uno muswelo kukoka milangwe ya betutala nansha kulengeja mwifundi eivwane bibi, i biyampe padi kwilaija kitatyi kyomukefundila kwa bunka bwenu. Ekale shi i kwepi komwifundila, mufwaninwe kwikala na kusansanya mwa kuyukila kitatyi kyomukokeja kushilula na milombelo. Tala Mwingilo Wetu wa Bulopwe wa Kweji 3, 2005, paje 6.