Mapu Otudi Nao ku Bakwetu
1 Mutumibwa Polo wēmwene amba udi na mapu a kusapwila bantu. Wādi uyukile amba Yehova i mutūle’ko dishinda dya kupandija bantu ba miswelo yonso kupityila ku mashi malēme a Mwanandi. (1 Tem. 2:3-6) O mwanda Polo wānene amba: “Ngidi mulobekwe [“Ngidi na mapu,” NW] ku baNgidiki, ne ku basenji, ne ku bañeni, ne ku bampikwa ñeni bene kumo.” Pa kino wāingile na bupyasakane ne kukōka mpika mwanda wa kufuta ano mapu aādi nao ku bantu nandi na kwibasapwila myanda miyampe.—Loma 1:14, 15.
2 Bene Kidishitu nabo dyalelo, pamo bwa Polo, basapwilanga bakwabo ponso pobamona mukenga. Byenda bifwena lubilo “kyamalwa kibūke,” tukimbei na kampeja-bukidi boba ba mityima myoloke. Eyo, buswe bwa bine botuswele bantu bwitutonone tutakamene mu uno mwingilo upandija būmi.—Mat. 24:21; Ezek. 33:8.
3 Kufuta Mapu Etu: Muswelo mukatampe otukokeja kusokola bantu i na kusapula ku kibelo ne kibelo. Mu myaba mukomene kutana bantu bavule ku mobo, kusoneka biyampe myanda ibatala ne kwibajokela mu bitatyi bishileshile kuketukwasha mwanda wa kutana bavule. (1 Kod. 10:33) Kadi tukokeja kufikila bantu bavule na kusapula busapudi bwa mu myaba ya busunga, bwa mu bipito, bwa mu biwanza bya mityi, mu bishīko, ne bwa ku telefone. Tubwanya kwiipangula amba, ‘Le noñanga bukomo bwa kwingidija miswelo mivule ya busapudi mwa kupānina musapu uleta būmi?’—Mat. 10:11.
4 Pania umo wadi wimona amba udi na kiselwa kya kufikila bantu bonso ba mu mwaba wabo. Ku njibo imo madidisha adi’nka mashite nyeke, kadi kekwadipo kutanwa muntu. Inoko, dyuba dimo, pania kadipo mu mwingilo, ino wamona motoka wimene kumeso kwa ino njibo keitanwanga’kopo muntu mafuku mavule. Penepa, pa kutyina kubulwa uno mukenga, wakokola ku kibelo’kya. Mwana-mulume umo walondolola ne mīsambo imbajinji yashilula, kadi yatwala kaka pania’wa pamo ne wandi mulume ku kujokela’mo kuvule. Ne ku mfulo, mwana-mulume’wa waitabija kifundwa kya Bible, ne panenwa pano ke tutu mubatyijibwe. Bine, ufwijanga’ko uno kaka mwanda wadi wimona amba udi na mapu a kusapwila bakwabo.
5 Kitatyi byokyenda kipwa lubilo, pano po pafwaninwe kufuta mapu otudi nao ku bantu netu na kulonga buninge mu mwingilo wa kusapula.—2 Kod. 6:1, 2.