Sapulai Ntumbo ya Yehova
1 Mulembi wa Mitōto wāsapwile’mba: “Imbai kudi Yehova ntanda yonso. Sapulai ntumbo yandi umbukata mwa mizo, ne mīngilo yandi ya kutendelwa umbukata mwa bantu bonso.” Kitatyi kyotulangulukila pa byobya bilongele kala Yehova, pa byalonga pano, ne pa byaketulongela, bine, mityima yetu itutononanga tusapule ntumbo yandi!—Mit. 96:1, 3.
2 Mu Mwingilo Wetu: Batumoni ba Yehova badi na madyese a kusela dijina dya Leza ne kwiditumbija patōkelela kujokoloka ntanda yonso. (Mal. 1:11) Bine, kino i kishile na bendeji ba Bipwilo bya Kine Kidishitu, batalulanga na mwididi dijina dya Leza mu malamuni abo a Bible! Mwingilo wa kuyukanya dijina dya Leza i wa kampeja-bukidi, mwanda bantu bafwaninwe kwita pa dijina dya Leza na lwitabijo mwanda wa bakapande ku kyamalwa kikatakata kīya kumeso’ki. (Loma 10:13-15) Pakwabo kadi, ndoe ya ntanda yonso, kubadila’mo ne ndoe idi umbukata bwa bekadi ba ino ntanda, imanine pa kutumbija dijina dya Leza. Ne kutatana kwine mpika, mingilo yonso ya Leza i mikwatañane na dyandi dijina.
3 “Yehova i mukatampe, wakutendelwa pakatampe pene.” Ino pa kusaka’mba bantu bekale ‘kupāna kudi Yehova ntumbo mifwaninwe dijina dyandi,’ bafwaninwe kuyuka bubinebine bumutala. (Mit. 96:4, 8) Inoko, bamo batunanga amba Leza i kutupu’ye. (Mit. 14:1) Bakwabo bamufutululanga amba kadipo na bukomo, nansha kulanga amba katelepo mutyima ku myanda ya bantu. Kitatyi kyotukwashanga boba ba mityima miyampe bekale na buyuki bwa kuyuka Umpangi wetu, mpango yandi, ne kulēmeka bumuntu bwandi, i kutumbija kotutumbijanga Yehova.
4 Na Mwiendelejo Wetu: Kwikala na būmi bukwatañene na misoñanya myoloke ya Yehova kumupejanga bulēme. Mwiendelejo wetu mulumbuluke umonwanga mpata na bantu. (1 Pet. 2:12) Kimfwa, mumwekelo wetu utōka, wa dyangi shē ukokeja kunenenwa maya na bakwabo, ne kwitupa mukenga wa kwisambila pa mvubu idi mu kwikala na būmi bwa kulonda misoñanya idi mu Kinenwa kya Leza. (1 Tem. 2:9, 10) Bine, tuloelelwanga bininge shi bantu bakwabo ‘bamona mingilo yetu miyampe, nabo ke batumbija Tata wa mūlu’!—Mat. 5:16.
5 Kupityila ku binenwa ne bilongwa, tutumbijei Leza wetu wa kutendelwa difuku ne difuku, na kwitaba ku luno lwito lwa nsangaji lunena’mba: “Imbai kudi Yehova, mutōtei dijina dyandi; lombolai lupandilo lwandi mafuku onso, mo bukila, mo bukila.”—Mit. 96:2.