Byobya Bilonga Mwingilo Wetu
1. Lelo Yehova umonanga namani mwingilo wetu, ne bantu betabanga’ko namani?
1 Kinenwa kya Leza kilombola’mba bene Kidishitu bendanga banekenya mu mwingilo wa Yehova, pamo bwa bantu badi mu mulongo wa boba batambwile bushindañani. (2 Kod. 2:14-16) Kitatyi kyotwenda tuyukanya buyuki bwa Leza, mwingilo wetu otwingila udi pamo’nka bwa kusoka ensense isangaja Yehova. Bantu bamo bakokwanga na butobaji bwa myanda miyampe; bakwabo nabo bapela’yo. Ino shi bavule balondolola bibi kekishintululapo amba mwingilo wetu ubakankalwa. Tubandaulei byobya bilonga mwingilo wetu.
2. Mwingilo wetu witukwashanga kulombola bika?
2 Kutendela Yehova: Satana upatananga amba bantu bengidilanga Yehova pa mwanda wa kamweno ka abo bene. (Yoba 1:9-11) Ino mwingilo wa bwine Kidishitu witupanga mukenga wa kulombola’mba kwipāna kotwipēne kudi Leza i kwa binebine. Basapudi bavule bendelelanga na kukōkela ku mbila ya kusapula ne kulonga bana ba bwanga nansha byobatananga makambakano nansha buñumauma bwa bantu bavule. Bine, kūminina kwa uno muswelo kusangajanga mutyima wa Yehova!—Nk. 27:11.
3. Mwanda waka kwendelela kuyukija dijina dya Leza ne mpango yandi kudi na mvubu mpata?
3 Kadi mwingilo wetu udi na mvubu mikata mu kufikidija mpango ya Leza. Yehova unena pa bitala konakanibwa kwa ntanda ya Satana kwiya’ku amba: “Mizo ikayuka’mba ami ne Yehova.” (Ezek. 39:7) Pa kusaka’mba mizo iyuke kino, kifwaninwe enka bengidi ba Leza bendelele kusapula dijina dyandi ne mpango yandi ku “mizo yonso, ne bisaka byonso, ne ndimi yonso, ne bantu bonso bēne kumo.”—Kus. 14:6, 7.
4. Lelo mwingilo wa busapudi po pemanine butyibi namani?
4 Po Pemanine Butyibi: Busapudi bwa myanda miyampe bo bwimanine’po butyibi. Mutumibwa Polo wānene amba Kidishitu Yesu ukalubwila kinongo “boba bampikwa kuyūka Leza, ne ku boba bampikwa kukōkela myanda-miyampe ya Mfumwetu Yesu.” (2 Tes. 1:8, 9) Bantu bakatyibilwa mambo mungya muswelo obetaba ku myanda miyampe. Bine, kino i kitwike bengidi ba Leza kiselwa kilēma! Ketufwaninwepo kujokela kunyuma mu kuyukija bantu uno musapu wa Bulopwe upandija būmi, kutyina’mba twakalambikwa mashi.—Bil. 20:26, 27.
5. Le lusa lwa Leza lumwekanga namani mu mwingilo wetu?
5 Bukomo botwendelela kulonga mwanda wa kukwasha bakwetu nabo betabijibwe na Yehova bulombolanga lusa lwandi. (1 Tem. 2:3, 4) Tuyukile amba būmi bwa bantu bwalamukaalamukanga, o mwanda twibendelanga divulevule ne kwibadyumuna bakimbe Yehova pokukidi kitatyi pano. Potulonga namino, tulombolanga “lusa lwa Leza wetu,” aye “kasakilepo’mba, nansha umo ōneke, mhm, poso’mba, bonsololo bafikile pa kwalamuka pa mutyima.”—Luka 1:78; 2 Pet. 3:9.
6. I muswelo’ka otumwenanga mu kuputumina mu mwingilo wa Yehova?
6 Tumwenanga’mo Batwe Bene: Kuputumina mu mwingilo wa Yehova i bulami kotudi. Kwitukwashanga twikale “bakutengela ne kusakidila byamalwa kwiya kwa difuku dya Leza” ne kutyina kubolejibwa na ino ngikadilo ya bintu imbi. (2 Pet. 3:11-14; Tet. 2:11, 12) Nanshi, ‘tukankamanei, ne kujina kwine mpika, tuvudilwe pakatampe pene, mafuku onso nyeke, monka mu mīngilo ya Mfumwetu,’ pa kuyuka’mba, kuputumina kwetu kwa mu mwingilo wa bwine Kidishitu kekudipo kwa bitupubitupu, ehe.—1 Kod. 15:58.