Tulamei Mutyima wa Kupēlakana!
1 Yesu wādi uyukile amba kitatyi kyandi kya kwingila mwingilo wa Shandi kyādi na mikalo. (Yoa. 9:4) O mwanda wāingile’o na mutyima wa kupēlakana, kadi wāfundije bandi bana ba bwanga nabo bengile na kampeja-bukidi. (Luka 4:42-44; 8:1; 10:2-4) Kudi aye, maloa a bintu bya ku ngitu ādi pa kifuko kya bubidi. (Mat. 8:20) Kino kyo kyāmulengeje avuije mwingilo wāmupele Yehova.—Yoa. 17:4.
2 Kitatyi Kidi na Mikalo: Kitatyi kya kusapula myanda miyampe “panopantanda ponso” nakyo kidi na mikalo. (Mat. 24:14) Bupolofeto bwa Bible bulombola amba ketudi bende palampe mu kitatyi kya mfulo. Panopano ponka, “boba bampikwa kuyūka Leza, ne ku boba bampikwa kukōkela myanda-miyampe ya Mfumwetu Yesu, . . . bakamona malwa ne malwa a konakanibwa kwa nyeke na nyeke.” (2 Tes. 1:6-9) Buno butyibi busa kufika’nka na mu kukopa kwa diso. (Luka 21:34, 35; 1 Tes. 5:2, 3) O mwanda bantu bafwaninwe kuyuka ngikadilo ya kyaka yobadi’mo. Batwe bo badi na kiselwa kya kwibakwasha bakimbe Yehova pakidi mema mu manwi.—Zef. 2:2, 3.
3 Tulongei Bukomo Bwetu Bonso: Byotuyukile amba “kubashala kitatyi kityetye tu,” batwe bengidi ba Leza tufwaninwe kutangidija busapudi kumeso. (1 Kod. 7:29-31, MB; Mat. 6:33) Bamo balekanga kukimbakimba lupeto ne kulondalonda tumweno twabo mwanda wa kutandabula mwingilo wabo. (Mako 10:29, 30) Bakwabo bendelelanga na ‘kuvudilwa bya kulonga mu mingilo ya Mfumwetu’ nansha byobekonda na matompo a endaenda. (1 Kod. 15:58) Bavule bene basapulanga myanda miyampe pano ke makumi a myaka kupungila mpika. (Bah. 10:23) Bine, Yehova kedilwepo kwipāna konso kobepāna mwanda wa kukwatakanya tumweno twa Bulopwe.—Bah. 6:10.
4 Kwimanija būmi bwetu’nka mu butōtyi bwa Yehova, mubadilwa ne mwingilo wa kusapula, ko kwitukwasha tulame mu ñeni difuku dya Yehova. Kadi ko kwitukinga tuleke kulabikwa na ntanda ya Satana ino kwitupanga mutyima wa kusumininwa kulama mwiendelejo wetu ujila. (2 Pet. 3:11-14) Bine, kuvuija mwingilo wetu na mutyima wa kupēlakana ko kupandija būmi, bwetu ne bwa boba betwivwana bene kumo.—1 Tem. 4:16.