Masomo Etukwasha Tuyuke Kwingidija Myanda Umbūmi
1 Ponso potukabandaula myanda mipangwe ku Masomo a Mwingilo wa Kiteokratike mu 2006, tukalonga buninge bwa kumwena mu bufundiji bwa Bisonekwa butala mwingilo wetu ukola ne pa būmi bwetu bwa mobukila mobukila. Kyotusaka i batwe kulonda bintu byotwifunda.—Yoa. 13:17; Fid. 4:9.
2 Kuleta Bushintuludi: Mpangiko ya uno mwaka i mibwejeje’ko bemvwaniki munite mukwabo wa kwisamba mu myanda mikatampe ya mu Bible. Ko kunena’mba tutu ukapebwa kunena myanda mikatampe ufwaninwe kutadija mwanda wa kuvuya kipindi kyandi mu minite itano pa kyaba kya isamba. Boba baleta bushintuludi nabo bafwaninwe kuta mutyima ku kulama kitatyi. Na kubadikila kala kuta’ko mutyima, muntu yense uleta nshintulwilo ubwanya kunena myanda ikwasha mu masekonde asenselela ku 30. Namino bantu kubwipi kwa dikumi bakamona mukenga wa kuleta bushintuludi bwa myanda ya mvubu mu minite itano ipelwe bemvwaniki kwisamba.
3 Bipindi Bipāna Bufundiji: Myanda mikatampe ya mu Bible ne mwisambo wa bufundiji bifwaninwe kwimanina pa myanda ya mvubu yotukokeja kwingidija mu mwingilo wetu ne mu būmi bwetu bwa mafuku onso. Muneni kafwaninwepo enka kulombola bemvwaniki bitupu bya kulonga. Ino ufwaninwe kulombwedidila bine bisakwa, mwa kwibilongela, ne byabuyabuya bimwenwa mu kulonga’byo. Kimfwa, ukokeja kunena amba, “Kino kisonekwa kitukwasha uno muswelo,” nansha’mba, “Tukokeja kwingidija ano mavese mu mwingilo uno muswelo.” Bakulumpe ne bengidi ba mingilo bayukile ngikadilo ya pabo babwanya kulombola senene mwa kwingidijija myanda’ya umbūmi mu muswelo mupotoloke.
4 Kutela bimfwa bya mu Bible kubwanya kukwasha bininge mu kulombola muswelo wa kwingidija myanda umbūmi. Shi muneni wapu kutela kimfwa kya mu Bisonekwa, ukokeja kunena amba, “Padi nobe udi mu ngikadilo pamo na ino.” Inoko, ufwaninwe kujingulula shi kimfwa kyonso kya mu Bible kyaingidija i kikwatañane na myanda inenenwa’po na Bible, ne na byonso bilupula “umpika wa binebine, udi na manwa.”—Mat. 24:45.
5 I kya ñeni kwikala na bwino bwa mwa kwingidijija buyuki ne kwivwanika. “Kintu kitabukile bulēme i ñeni.” (Nk. 4:7) Monso motumwena tunangu kupityila ku byotwifunda ku Masomo a Mwingilo wa Kiteokratike, tuvudijei kadi ne busendwe bwa kupāna’to ku bakwetu.