Tutei Bakwetu Mutyima—Na Kusapula Pakubulwa Mboloji
1 Mutumibwa Yoano wāmwene mu kimonwa mwikeulu wipapa umbukata mwa mūlu usapula myanda miyampe ya nyeke ku “mizo yonso, ne bisaka byonso, ne ndimi yonso, ne bantu bonso bēne kumo.” (Kus. 14:6) Le tulondanga bwendeji bwa uno mwikeulu na kusapula pakubulwa mboloji? Padi ne kuyuka mpika, tumonanga kala bakwetu bingi ne kwibafwatakenya bingi. Muswelo otumona bantu botwitana nabo ukokeja kusendeka ne muswelo otwibasapwila myanda miyampe mwine. O mwanda i biyampe tuswe bya binebine bantu ba miswelo mishileshile botusapwila.
2 Tala Bidi mu Mwaba Wenu: Le mu mwaba wenu mudi beni nansha bapando banyemene divita? Kebo kuvulaminibwa bipēla byonka. Ino abe kwata mulangwe wa kwibakimba kadi tompa kwibayuka senene. I bika byobasaka ne byobabila, byobaswele ne byobashikilwe, byobatyina ne byobafwatakanya? Longa buninge bwa kukwatañanya bino na musapwilo obe wa musapu wa Bulopwe. (1 Kod. 9:19-23) Mu kimfwa kya mutumibwa Polo, tufwaninwe kwimona amba tudi na kiselwa kya kusapwila yense udi mu mwaba wetu myanda miyampe, kubadila’mo ne bantu batambile mu ntanda ya bweni, boba badi na bibidiji bishile na byetu, boba banena ludimi lungi, nansha ke bampeta bakatampe bene.—Loma 1:14.
3 Ino le ukasapwila boba banena ludimi lwa bweni bukamoni namani? I na kwingidija biyampe kabuku Une bonne nouvelle pour des gens de toutes nations. Ukokeja kadi kusela matrakte nansha maboloshile amoamo a mu ndimi inenwanga divule mu mwaba wenu. (Tala Mwingilo Wetu wa Bulopwe wa Kweji 7, 2003, p. 4, mus. 2-3.) Ne kadi basapudi bamobamo baloñanga bukomo bwa kuyuka lwimu ne musapwilo upēla mu ndimi mikwabo. Pavule bantu basangalanga shi bevwana muntu ulonga bukomo bwa kwisamba mu lwabo ludimi, nansha shi kayukidije’lopo biyampe, kadi kino kikokeja kwibafikija ku kuteja myanda miyampe.
4 Iula Yehova: Potulonga buninge bwa kufikila bantu ba miswelo yonso, twiulanga Yehova Leza wampikwa mboloji, “usakila bantu bonso kupanda, bafike ne pa kuyūkidija kwa binebine.”—1 Tem. 2:3, 4.