La Révélation : le grand dénouement est proche !
1 “Wa katōkwe kandi i yewa utangamo, ne boba bēvwana myanda ya mu uno umbangilo uno, ne kulama bisonekwe bidimo; ke-muntu mwaka ke udi pa bwipi ponka.” (Kus. 1:3) Bino binenwa bilombola kamweno kadi mu mukanda wa Kusokwelwa, nakampata mu ano mafuku otudi’mo, kitatyi kifikidila bupolofeto buvulevule. O mwanda i kyendele’mo nanshi twifunde kitabo La Révélation : le grand dénouement est proche ! mu Kifundwa kya Kitabo kya pa Kipwilo tamba mu yenga ushilula na mafuku 8, Kweji 1, 2007.
2 Tamba kasha twefundile kitabo Révélation : dénouement mafuku kunyuma mu Kifundwa kya Kitabo, mwikadilo wa ntanda pano ke mushinte mu miswelo mivule. (1 Kod. 7:31) Ne kadi, bavule belungile mu mulongo wa basapudi ba myanda miyampe ya Bulopwe kebafundile mukanda wa Kusokwelwa vese ne vese. Nanshi kwifunda monka kitabo Révélation : dénouement kuketukwasha batwe bonso twikale balanguke ne kutala kiya na mbwa ku kanwa.—Kus. 16:15.
3 Kwata kitungo kya kutanwa’ko yenga ne yenga. Ino myanda iketukwasha tukeshe, kadi misapu ya Yesu ku bipwilo bisamba-bibidi nayo iketukinga ku ngikadilo ibwanya kwitona ku mushipiditu ne kwitonena busapudi bwetu.—Kus. 1:11, 19.
4 Witeakanye Biyampe: Kumeso kwa kukefunda kitabo, tanga mavese a mukanda wa Kusokwelwa akabandaulwa. Tala Bisonekwa biletelwe mwanda wa kushintulula’o. Longa buninge bwa kwivwanija myanda mikatampe itenga ku mutyima. (Neh. 8:8, 12) Witūdile’ko kitatyi kya kulanguluka ne kwiipangula’mba: ‘Le i bika byonefunda padi Yehova ne pa kufikidila kwa mpango yandi? I muswelo’ka ombwanya kulonga kukwatañana na mpango yandi ne kukwasha bakwetu?’
5 Pano kepadi myaka 92 tamba kasha “difuku dya Mfumwetu” dishilwila mu 1914. (Kus. 1:10) Bimbidikita bya ntanda byālailwe mu mukanda wa Kusokwelwa kebisa kufikidila. Kwifunda kwa kitabo Révélation : dénouement kukatūkija mityima ne ñeni yetu kadi kukakomeja lwitabijo lwetu amba “divita dya difuku dikatakata dya Leza” ne ntanda yandi impya bibafwena pabwipi.—Kus. 16:14; 21:4, 5.