Mpangiko ya Kubungakana kwa pa Bula kwa Difuku Dimo

Mutwe wa mwanda wa mpangiko ya kubungakana kwa pa bula kwa difuku dimo mu mwaka wa mingilo wa 2008 unena’mba “Batwe Twi Dilongo​—Yehova Ye Umbumbi Wetu,” wimanine pa Isaya 64:8. Madingi a mu Bisonekwa akaletwa mu ino mpangiko aketukwasha twivwanije tunangu, boloke, bukomo ne buswe bwa Yehova, Umbumbi wetu Mukatampe.

Mutadi wa kipindi ukanena dino dishikulu, “Kwingila Mingilo Pamo bwa Bingidilwa bya Bulēme,” kadi dikalombola bantu bavule mobangwila dyese dikatampe dya Yehova pa kuyuka bubinebine ne pa kusapwila’bo bakwabo. Dishikulu “Kulanguluka Kukemulama” dikasokola patōka muswelo witulama kulanguka kotulangulukila bikatampe pa misoñanya myoloke ya Yehova. Muneni mupempudi ukalombola bemvwaniki ino myanda inena’mba “Kemukīkala Kudingakanibwa na Bapanopantanda” ne amba “Itabija Kubumbwa na Umbumbi Mukatampe.” Bambutwile ne bankasampe nabo bakakankamikwa na bino bipindi binena’mba “Bankasampe Bakamweno Kudi Yehova” ne “Mwingilo wa Mvubu wa Bambutwile mu Kubumba Bana.” Kupityila ku bya kumwena’ko ne bwipangudi, tukevwana batutu ne bakaka mobengidila wabo mwingilo. Boba bakimba kupāna būmi bwabo kudi Leza na kubatyijibwa mu mema bafwaninwe kala kuyukija mutadi mwimaniji kumeso kwa kitatyi. Kokelwa kusela kyobe Kiteba kya Mulami kikefundwa mu mwine yenga wa kubungakana kwa pa bula kwa difuku dimo.

Byonso bilayanga Umbumbi wetu Mukatampe bifikidilanga. Ino umo ne umo ufwaninwe kutonga shi uketabija nansha kupela kubumbwa na aye. Boba bakōkela misoñanya ne busenduludi bwa Yehova na tunangu bo bakokeja, pamo bwa umbumbulu wa dilongo mu kininga kya umbumbi, kubumbwa, kulumbululwa, ne kwalamunwa bu kingidilwa kya bulēme. Ekale twingile kakasa kakasa na Yehova, nabya tukatumbija bubikadi bwandi ne kutambula madyese mavule mene.