Mpangiko ya Kubungakana kwa pa Bula kwa Difuku Dimo

Mutwe wa mwanda wa mpangiko ya kubungakana kwa pa bula kwa difuku dimo kwa mwaka wa mingilo wa 2009 unena’mba “Tá Mutyima ku Bwingidi . . .  ne Kufikijija’bo” wimanine pa Kolose 4:17. Batwe Bene Kidishitu, tukwete na kusumininwa konso uno musoñanya. Kitungo kyetu i kufikijija mwingilo wetu na kikōkeji monka mwāfikijije’o Yesu. (Yoa. 17:14) Mutumibwa Polo nandi wētushidile kimfwa kilumbuluke pa uno mwanda. Wādi usumininwe kuvuija lwendo lwandi mu mwingilo.​—Bil. 20:24.

Kipindi kikanena mutadi wa kipindi kikalombola muswelo ukomenanga basapudi palapala bikoleja byobatananga mu mwingilo wabo. Kupwa dishikulu dinena amba “Tamija Byowakunine” dikalombola patōka muswelo otukokeja kukwasha boba “badi mu ngikadilo mifwaninwe kukamona būmi bwa nyeke.” (Bil. 13:48, NW) Muneni mupempudi ukesambila bidi pa vese ne vese wa 2 Kodinda 6:1-10, mu dishikulu dinena’mba “Motwiendelejanga bu Bengidi.” Kyolwa, ukalombola bemvwaniki dishikulu dinena “Kwata Mwingilo Obe na Mvubu Mikatampe.” Na bubine, ukakankamikwa na dishikulu dinena’mba “Bakulu ne Bankasampe Basepelelanga Mwingilo” ne “Bankasampe Bavuija Mwingilo.” Boba bakimba kubatyijibwa mwanda wa kulombola kwipāna kwabo ku kuno kubungakana kwa mu kipindi, bakayukija’mo mutadi mwimaniji. Kadi ku kubungakana konso ne bitango kekubulwangapo kubandaulwa kwa Kiteba kya Mulami. Nanshi kokilwa kusela mulami obe wa kukefunda mu yenga wa kubungakana kwa pa bula kwa difuku dimo.

Shi tutale byobya byotulonga mu mwingilo wetu, tufwaninwe kutadija shi tumweno ne mingilo mikwabo keijikakanyangapo mingilo itupele Yehova. Bukomo bwitupa Bisonekwa kupityila ku mpangiko ya kubungakana kwa pa bula kwa difuku dimo kuketukwasha twimvwanije byobya byotufwaninwe kulonga mwanda wa tumone mwingilo wetu biyampe ne kuvuija’o ne pa mfulo.