‘Londai mu Mayo Andi’
1. I muswelo’ka otukekala bengidi bayuke’byo?
1 Yesu Kidishitu kāfundilepo masomo a Balabi, ino i Mwingidi mukatampe mu mānga yonso. Tudi na dyese mwanda mānga milembwe ya mwingilo wa Yesu yālaminwe pangala pa kamweno ketu. Pa kusaka amba netu twikale bengidi bayuke’byo, tunenwe “kumulonda . . . mu māyo andi.”—1 Pet. 2:21.
2. I muswelo’ka otukokeja kutamija buswe bwa kuswa bantu na bwādi na Kidishitu?
2 Sanswa Bantu: Yesu wādi utele bantu mutyima na buswe. (Mako 6:30-34) Bavule mu mwaba wetu ‘babinzanga’ ne kadi badi na kyumwa kikatampe kya bubinebine. (Loma 8:22) Tukendelela na kwibasapwila shi tulangulukila pa ngikadilo imbi yobadi’mo ne pa muswelo wibatele Yehova mutyima na buswe. (2 Pet. 3:9) Pakwabo kadi, bantu baketaba lubilo ku musapu wetu shi bamona amba twi batele mutyima bya binebine.
3. I kwepi kwādi kusapwila Yesu bantu?
3 Nena Ponso Pomona Mukenga: Yesu wādi uboya mukenga o-onso wa kusapwila bakwabo myanda miyampe. (Mat. 4:23; 9:9; Yoa. 4:7-10) Mo monka, netu tufwaninwe kwilongolola mwa kwisambila bubinebine ponso potudi mu mingilo yetu ya bukile bukya. Bamo baselanga Bible ne bitabo ku maboko mwa kupānina bukamoni ku kaji, ku masomo, pobenda ñendo ne pobenda mu nsoko, ne konsokonso.
4. Le i muswelo’ka otukalonga Bulopwe bu mutwe wetu wa mwanda wa busapudi?
4 Imanina pa Bulopwe: Myanda miyampe ya Bulopwe o wādi mutwe wa mwanda wa busapudi bwa Yesu. (Luka 4:43) Nansha shi ketutelelepo kishima Bulopwe nansha kukumuna’ko, i biyampe tukwashe mwinē njibo amone amba usakilwa’bo. Nansha shi tubatela ngikadilo imbi ya ntanda ilombola amba tudi mu mafuku a mfulo, kine’ko kyotusapula i “myanda-miyampe ya bintu bilumbuluke!”—Loma 10:15.
5. Pa kusaka amba twikale basapudi bayuke’byo, le tukengidija namani Bible?
5 Nyemena mu Kinenwa kya Leza: Mu mwingilo wandi onso, Yesu wādi unyemena mu Bisonekwa. Kānenepo bya aye mwine. (Yoa. 7:16, 18) Wādi udya Kinenwa kya Leza ne kwingidija’kyo ponso pādi pamulwa Satana. (Mat. 4:1-4) Batwe netu pa kusaka tuyuke’byo kufundija bakwetu, tufwaninwe kutanga Bible difuku ne difuku ne kulonda byanena. (Loma 2:21) Kadi potulondolola bipangujo mu mwingilo, tufwaninwe kutela kisonekwa kikwatañane na byotunena, kadi shi bibwanika kutangididila’kyo mu Bible. Tusaka otwisamba nandi amone amba ketunenangapo bya batwe bene, ino tulamete ku milangwe ya Leza.
6. Lelo i bika byādi bilonga Yesu pa kutenga mityima ya bemvwaniki?
6 Tenga Mityima Pofundija: “Kasha kekwaikelepo unena bwa uno muntu.” (Yoa. 7:46, MB) Mo mwānenene bamudyavita pobālondolwele bapidishitu bakulu ne Bafadiseo bebātumine kukakwata Yesu, ino bakomenwa. Yesu kādipo ufundija myanda kūlukūlu, ino wādi utenga ne mityima ya boba baādi ufundija. (Luka 24:32) Wādi wingidija bimfwa bimweke mwanda wa bantu bemvwanije musapu. (Mat. 13:34) Yesu kādipo ulundikila bemvwaniki bandi myanda kapwila. (Yoa. 16:12) Kadi wādi ukokela milangwe padi Yehova, ke padi aye mwinepo. Netu pamo bwa Yesu tukokeja kwikala bafundiji bayampe shi tuta mutyima ku “lufundijo” lwetu.—1 Tem. 4:16.
7. Mwanda waka Yesu wāūminine mu mwingilo?
7 Ūminina Pampikwa Kubanga Bapumpunya ne Bakulondalonda: Bavule kebātejejepo Yesu, nansha byaālongele bintu bivule bikatakata. (Luka 10:13) Enka ne banababo na Yesu bālangile amba “i kilubi.” (Mako 3:21) Nansha namino, Yesu wāūminine. Kāshintyilepo mumweno wandi mwanda wādi uyukile amba udi na bubinebine bukūla bantu ke banapabo. (Yoa. 8:32) Na bukwashi bwa Yehova, batwe netu twi basumininwe kuleka kupungila.—2 Kod. 4:1.
8, 9. Tukeula namani Yesu mu kwipānina pangala pa myanda miyampe?
8 Wipāne Mwa Kwingidila ne pa Mfulo: Yesu wāshile bituntwa pa mwanda wa mwingilo. (Mat. 8:20) Kitatyi kimo wādi usapula kufika ne ku kyolwa, kukōka mpika. (Mako 6:35, 36) Yesu wādi uyukile amba kitatyi kyandi kya kwingila i kityetye. Netu “mwaka ubaī,” nanshi twiulei Yesu na kupāna bitatyi byetu, bukomo, ne bituntwa.—1 Kod. 7:29-31.
9 Bene Kidishitu ba mu myaka katwa kabajinji bādi bengidi bayuke’byo mwanda bāfundijibwe na Yesu. (Bil. 4:13) Netu tukokeja kuvuija mwingilo wetu shi twiula Mwingidi mukatampe mu mānga yonso.—2 Tem. 4:5.