“Twela mu Lupungu Lwami”
1 Mu ino ntanda miyule mitabakano ne kuzumbija mutyima, twibatūkijibwe mutyima na kwitaba ku lwito lwa kyanga lwitwityile Yesu amba tumone mityima mitūke mu lupungu lwandi. (Mat. 11:29, 30) Kwitabija lupungu lwa bu mwanā-bwanga i ne kwingila mwingilo ulēma ao’ko utūkija mutyima. I mwingilo wa kusapula myanda miyampe ya bulopwe ne kukwasha bantu bakwabo nabo bamone kutūkijibwa mutyima mu lupungu lupēla lwa Yesu.—Mat. 24:14; 28:19, 20.
2 Mwingilo Utūkija Mutyima: Yesu kādipo wita balondi bandi mwanda wa kwibabweja kiselwa kilēma ku kyobādi kala nakyo. Wēbetyile mwanda wa kwibatūla kisēlwa kyabo kilēma ne kwibapa kyandi kipēla. Ketukilēmenenwepo na kuzumbija mutyima ne kubulwa kikulupiji kwa mu ino milongelo ya bintu; kadi ketukipenenekangapo na mingilo na kukimba bupeta bwa kubulwa ne mwakukulupidila mwine. (Luka 21:34; 1 Tem. 6:17) Nansha byotwikalanga na byakulonga bivule, tufwaninwe kwingila mwa kumwena byakwikwasha nabyo, kutōta Leza kyo kintu kitabukile mvubu mu būmi bwetu. (Mat. 6:33) Tukendelela kumona busapudi bu mwingilo utūkija mutyima, pa kyaba kya kwiumona bu kiselwa kilēma, shi twiumona bu kintu kya mvubu kutabuka.—Fid. 1:10.
3 Divule dine, tusangelanga kwisambila pa bintu byotutele’ko mutyima. (Luka 6:45) Bene Kidishitu bonso batele mutyima mpata kudi Yehova ne ku madyese a Bulopwe aetulaile. Nanshi, kwisambila pa “myanda-miyampe ya bintu bilumbuluke” ne kubulwa kulangulukila pa bikambija bya mobukila mobukila potudi mu busapudi kutūkijanga mutyima kashā! (Loma 10:15) Na bubine, shi tulonga kintu kimokimo kitatyi kyonso, manwa endanga avula, ne nsangaji nayo yenda ilundila’ko. Nanshi, kupityija kitatyi kivule mu mwingilo wa busapudi, shi tudi na bukomo, kukabweja kwitutūkija mutyima. Ne kitatyi kitabija bantu busapudi bwetu, kino kitutūkijanga mutyima binebine! (Bil. 15:3) Nansha shi tubatana buñumauma nansha kupelwa, uno mwingilo uketutūkija mutyima ku mushipiditu shi tuvuluka’mba buninge botulonga busangajanga Yehova ne amba bipa biyampe byonso bilupuka’ko bitamba ku madyese andi.—Bil. 5:41; 1 Kod. 3:9.
4 Tudi na dyese dya kwingila bu Batumoni ba Yehova na kwitabija lwito lwa Yesu ne kwingidila pamo nandi. (Is. 43:10; Kus. 1:5) Bine, kekudipo kintu kikwabo kitūkija mutyima pamo bwa kino!