Malondololo ku Bipangujo Byenu

◼ Le bambutwile bonso babidi babwanya kutūla lapolo wa nsaa ya kifundwa kya kisaka?

Nansha kiselwa kya kutamija bana “mu madingi, ne mu lufundijo lwa Mfumwetu” byokidi dibajinji kya bashabana, ino i bambutwile bonso babidi bebafundijanga. (Ef. 6:4) Bible ukankamika bana’mba: “Wami mwana, ivwana bulombodi bwa shobe; kadi kokazobololapo lufundijo lwa inobe.” (Nk. 1:8) Kipindi kya mvubu mikatampe mu bufundiji butamba kudi bambutwile i kifundwa kya Bible mu kisaka.

Pa kala, enka mbutwile wendeja kifundwa kya kisaka na bana bampikwa kubatyijibwa ye wadi ubwanya kutūla nsaa’ya ku lapolo, nansha shi i bambutwile bonso badi befunda nandi pamo. Inoko, pano i palemununwe. Shi bambutwile bonso babidi bafundija babo bana kya pamo, bakabala nsaa umo ku yenga na wa mwingilo wa budimi. Na bubine, bambutwile bapityijanga kitatyi kitabuke ne pa nsaa umo ku yenga na kufundija babo bana. Kufundija bana kulomba bambutwile bonso babidi bekale nyeke kutakamana. (Kup. 6:6-9) Inoko, lapolo wa mwingilo wa budimi utūlwanga ku kweji ne kweji ufwaninwe dibajinji kulombola bilongelwe mu budimi. Nanshi, kekifwaninwepo monka kubala nsaa mitabuke nsaa umo ku yenga, nansha shi kifundwa kibatabuka ne pa nsaa umo mwine, nansha kadi shi i kifundwe misunsa mivule umbula bwa yenga, nansha kadi shi mwaikele kwifunda na bana bifundwa palapala. Enka mbutwile umo ye ukabala kifundwa kya Bible mu kisaka bu kujokela’mo kumo kete ku yenga ne yenga wefundilwe.