Malondololo ku Bipangujo Byenu
◼ Lelo kifundwa kya Bible kya kisaka kikokeja kutwejibwa mu lapolo utūlwa ku kipwilo?
Shi mbutwile mwine Kidishitu wendejanga kifundwa kya Bible kya kisaka kidi’mo ne bana bampikwa kubatyijibwa, nankyo ukalemba lapolo yampikwa kupita pa nsaa umo ku yenga, kujokela’mo kupya kumo pa yenga, ne kifundwa kya Bible kya ku njibo kimo ku kweji. Ukalemba namino nansha shi kifundwa kyendejibwa mu mansaa mavule ku difuku, misunsa mivule ku yenga, nansha’tu shi kifundijibwa bana wa pandi wa pandi.—Tala dibuku Notre ministère, p. 105.
Ino shi ba mu njibo bonso i batumoni babatyijibwe, nabya nansha nsaa nansha kifundwa kine kebikatwejibwapo mu lapolo ya mwingilo wa budimi (poso bikale’mba kudi mwana ukivuya kifundwa kya kitabo kya bubidi kupwa kwa kubatyijibwa). Kilongelwa nenki i mwanda lapolo wa mwingilo wa budimi wa kipwilo ulombolanga dibajinjibajinji byobya bilongwa mu busapudi bwa myanda miyampe ne mu kufundija bubinebine bwa Bible ku boba kebaikele kwipāna ne kubatyijibwa bu bengidi ba Yehova. (Mat. 24:14; 28:19, 20) Inoko kino kekifwaninwepo nansha namani kutyepeja mvubu ya kwendeja kifundwa kya kisaka kitatyi ne kitatyi.
Bambutwile bene Kidishitu badi na kiselwa kya kwifunda na babo bana abo bene. Boba bakimba bukwashi bwa mwa kushilwila nansha bwa kulumbulula kifundwa kyabo kya kisaka bakokeja kulomba’bo kudi bakulumpe. Shi mungya ngikadilo bilomba’mba musapudi mukwabo endeje kifundwa kya Bible kya mwana wampikwa kubatyijibwa wa mu kisaka kya bwine Kidishitu kya pa kipwilo, nabya bifwaninwe bidi kukamona mutadi mwimaniji nansha mutadi wa mingilo. Shi kifundwa’kya kibaitabijibwa, nabya yewa wendeja’kyo ukokeja kutweja’kyo mu lapolo pamo’nka na mwabadilanga bifundwa bikwabo bya Bible.
Kutamijija bana mu mashinda a Yehova kulomba kitatyi kivule ne bukomo kupita ne byobya bitūlwanga pa lapolo wa mingilo. (Kup. 6:6-9; Nk. 22:6) Bambutwile bene Kidishitu bafwaninwe kufwijibwa’ko pa mwanda wa kiselwa kyabo kilēma kya kutamijija babo bana monka “mu madingi, ne mu lufundijo lwa Mfumwetu.”—Ef. 6:4.