Mpangiko ya Kisaka​—Kifundwa kya Kisaka

¹ Kyabuntu kikatampe kyokokeja abe mbutwile mwine Kidishitu kupa bobe bana i buswe bobe boswele Yehova. Kyaba kipite buya kibwanya kwibapebwa kino i “pa kushikata mobe mu njibo,” ne kwifunda nabo kifundwa kya Bible mu kisaka yenga ne yenga. (Kup. 6:​5-7) Wikale na mwinē pobe mwitabije, nansha shi udi mu kisaka kikalañane mu mutōtelo, nansha shi ulelanga bana kasuku, ubwanya kukwasha bobe bana bafwene kodi ne kudi Yehova shi udi na kifundwa kya kisaka kya kitatyi ne kitatyi.

² Mwa Kushilwila: Ditabula dibajinji i kwikala na kibidiji kya kwifunda pamo mu kisaka. Shi utatana pa nsaa ya kwifunda, mwene ukokeja kwisambila pamo na kisaka kyonso? (Nk. 15:22) Shi udi na bana batyetye, nabya padi mukefunda mu bitatyi bīpi bīpi mu bula bwa yenga. Tadija i mpangiko’ka yendeka mu kipango kyobe. Tandika nsaa mipotoloke ya kwifunda mu mpangiko yenu ya kisaka, kadi sumininwa kwiilonda.

³ Le i bika byomukokeja kwifunda? Bamo bateakanyanga bikefundwa ku Kifundwa kya Kitabo kya pa Kipwilo kīya’ko nansha Kifundwa kya Kiteba kya Mulami. Bakwabo nabo befundanga myanda itala nakampata bana. Shabana umo ubutwile bana babidi, mwana-mulume ne mwana-mukaji, wanene amba: “Kintu kimo kisangelanga bana mu kifundwa kyetu mu bula bwa yenga i kukaya myanda ya mānga isekunwinwe mu Dibuku Dyami dya Mānga ya mu Bible. Mushike wivwanwa nao myanda ne kutenga koitenga ku mutyima i bipite kulampe kwine misango mulwi yomukokeja kwifunda.”

⁴ Kwifunda Yenga ne Yenga: Kifundwa kya kisaka kifwaninwe kwifundwa nyeke ne kifwaninwe kutengelwa na nsangaji na bonso ba mu kisaka. Busenduludi bwa difuku ne kitatyi bukokeja bwaikala’ko mungya ngikadilo ya kubulwa kulaya. Kadi kyaba ne kyaba myanda ifundwa ikokeja padi kusendululwa shi i kyendele’mo. Ino, kusendulula ko-konso kekufwaninwepo kwenda mulela mulampe wa kushetula mpangiko itandikilwe ya kifundwa kya kisaka. Nsongwakaji wa mu kipango kimo unena’mba: “Shi kitatyi kya kifundwa kyetu kibashinta, Tata utūlanga’ko nyeke kitatyi kikwabo na kulamika kakanda pa mulango wa fidigo mwanda wa batwe bonso tuyuke’yo.” Bine, buno bukomo bwa kulama nyeke kifundwa kya kisaka i bwa kutendelwa! Nenu pomutamija benu bana “biyampe monka mu madingi, ne mu lufundijo lwa Mfumwetu,” mukalombola amba muswele benu bana ne Tata wetu wa mulu mwine kumo.​—⁠Ef. 6:⁠4.