Lelo Mwifundilanga Pamo mu Kisaka?

¹ Mulumya bene umo mwine Kidishitu walombwele mukulumpe umo amba: “Nsakanga kifundwa kya kisaka kikale’ko kitatyi ne kitatyi, ino bibakoma. Kyaba kimo i ami mwine wipaya’kyo nansha wami mukaji kasakepo kwifunda, pakwabo i bana badi na bintu bikwabo bya kulonga, enka nabya. Mayenga apwa apunguluka kutupu nansha kulonga buninge bwabinebine bwa kujokeja monka mpangiko ya kifundwa kya kisaka kya kitatyi ne kitatyi. Ndyukile amba tufwaninwe kwikala nakyo, o mwanda tusaka betupe’ko bidi madingi ne milangwe kampanda tuyuke mwa kulongela.” Lelo bino binenwa bibakuvuluja kintu kampanda? Padi bibakuvuluja’kyo, mwanda bisaka bivule bitanwanga na ano makambakano amo onka a kwikala na kifundwa kya Bible kya mu kisaka kya kitatyi ne kitatyi.

² Ino languluka bidi pa bino bipangujo: Mwanda waka kifundwa kya kisaka kya kitatyi ne kitatyi kidi na kamweno, ne bitungo byakyo bine i bitungo’ka? I ani ufwaninwe kwikyendeja? I mabuku’ka afwaninwe kwifunda? Tukalonga namani pa kusaka amba kifundwa kikale kisangaja kadi kiloe, nakampata shi mutanwa bana ba myaka mishileshile? Mwanda waka kifundwa kifwaninwe kulongwa kitatyi ne kitatyi?

³Kiselwa kya Bambutwile: Bisonekwa kebifindilepo mwine ufwaninwe kutangidila ne kufundija bana. Binena’mba: “Bānwe bashabo . . . mwibatamijei biyampe monka mu madingi, ne mu lufundijo lwa Mfumwetu.” (Ef. 6:⁠4) Bashabana bafwaninwe nanshi kwitabija kino kiselwa ne kusaka na mutyima umo kupāna buyuki ne madingi ku babo bana. Shi shabana i wakubulwa kwitabija, mukaji mwine Kidishitu ufwaninwe kulonga buninge bwa kwendeja kifundwa kya kisaka ne kufundija bana. (2 Tem. 1:⁠5) Pakwabo, bikalomba kaka mwine etwike biselwa byonso bya kufundija bandi bana. (Nk. 1:⁠8) Inoko mokyendele, shabana, nansha bambutwile bonso babidi, bo bapēlwe kiselwa kya kufundija, kwiija bana mingilo, ne kwibalela biyampe.​—⁠Kup. 6:​6, 7; 1 Tem. 3:​2, 4.

⁴ Kushinta ne Kupēleja Myanda: Mu kifundwa kya kisaka, mubwanya kutwejibwa butangi ne mīsambo ya banwe bonso īmanine pa bipindi kampanda bya mu Bible, nansha kubandaula myanda kansangwa ya mu bishinte bya mapepala nansha bya mabuku makwabo a Sosiete. Mufwaninwe kutonga myanda ya kwifunda kukwatañana na bisakibwa bya kyenu kisaka. Myanda ya bankasampe, kifwa ya kuningilwa bintu na bakwabo ba ku masomo, kwikaila na bantu ba ngitu ingi, kutanwa ku makayo nansha mafetyi ateakanibwa ku masomo, mazua a kwitamuna ngitu, butongi bwa minjiki, myondele ne myanda ya busekese, bino byonso bikokeja kutwejibwa mu bintu bya kwifunda. Kwifunda misoñanya ya mu Bisonekwa nansha kwibepangula mobalangila’po kubwanya kwikala kuyampe, nakampata pa kuteakanya bankasampe bayuke mwa kulwila na bikambija bibatengele kumeso.

⁵ Eyo, kifundwa kya kisaka kekifwaninwepo kwikala kisumininwe pamo bwa kupwila kwa pa kipwilo, inoko kifwaninwe kūbaka. Longai kifundwa kikale kitatyi kya nsangaji; ke kitatyipo kya kutopeka bana. Kankamika bana balondolole mu bishima bya abo bene, kino kikebakwasha bendelele bininge. Nansha shi bana batyetye kebabwanyapo kwivwana ne kujingulula byonso binenwa, mufwaninwe kwilombola amba mwibatele mutyima mwanda wa kutanwa kobatanwa’ko ne kwibakwasha nabo banene mu kifundwa. Bambutwile batunangu bakata mutyima ku bisakibwa bya babo bana bonso, ku mwivwanino wabo, ku luté lwabo ne kutala shi bapēlelwanga pa kwisamba. Wivwane mwielele’ko byabinebine na buswe, kisaka kyenu kikekutyila umbumo, kadi kikekala kikomo ku mushipiditu.

⁶ Kemwakilekai’byo! Mwanda waka kutakamana kudi na mvubu mu myanda ya kifundwa kya kisaka? Mwanda būmi bwitulombolanga bintu bivule bipuakanya ñeni, bikwabo bibwanya kupalankanya mpangiko ya kifundwa yotukwete. Ketwakilekai bino bintu byabituputupu bikuje mu mpangiko yonso yotukwata mu kisaka.

⁷ Kifundwa kya Bible kya kitatyi ne kitatyi kifundijanga betu bana ne kwibakumbanya mwa kulwila na myanda ya umbūmi. Bambutwile, i banwe bafwaninwe kukwasha benu bana na kusela biselwa byobemupele kudi Leza. Yehova nandi kakabulwepo kwimwesela shi mulonge buninge bwenu bonso bwa kwikala na kifundwa kya Bible kya kitatyi ne kitatyi.