Mwa Kwingidila Kisaka Kyonso Pamo Senene —Mu Kifundwa kya Bible
1 Bubinebine buletanga buluji ne kitungo kyabine mu būmi bwa kisaka. Ino, nansha byotwingidila Yehova, tuyukei amba kulupula bipa biyampe kekwiilangapo ako kwine. Kūbaka kipango kikomo kumushipiditu kulombanga kitatyi ne kininga. O mwanda i biyampe bantu bonso ba mu kisaka bengidile pamo senene. Kino kyo kishinte kibajinji kya mu bisatu bikesambila pa muswelo ukokeja bisaka kwingidila pamo mwa kutamijija bibidiji bilumbuluke mu myanda ya kifundwa.
2 Na Kutanga Bible Difuku ne Difuku: Nkindi 24:5 unena’mba “muntu wa kuyukidija ubaija bukomo.” Buyuki bulupulwa mu butangi bwa kitatyi ne kitatyi bwa Kinenwa kya Leza bupānanga bukomo bwa mu mutyima bwepeja miketo yasa Satana ku būmi bwetu bwa kumushipiditu. (Mit. 1:1, 2) Lelo kisaka kyobe kitañanga Bible pamo difuku ne difuku? Ku Mpangiko ya Masomo a Mwingilo wa Kiteokratike kutandikilwe ne “Mpangiko ya Butangi bwa Bible bwa Ntentekelo” ya ku yenga ne yenga mu bula bwa mwaka onso. Shi musaka kulonda’yo mu kisaka, nankyo mwitūdilei nansha’tu minite dikumi ku difuku. Tongai kitatyi kifwaninwe, kifwa nsaa ya bidibwa bya lubanga, kupwa bidibwa bya kyolwa, nansha kumeso kwa kulāla, mwanda wa kutanga Bible ne kubandaula kisonekwa kya difuku mu kabuku Tubandaulei Bisonekwa Difuku ne Difuku. Tūlai kino kifundwa mu mpangiko ya bintu byomuloñanga nyeke mu kisaka.
3 Na Kwifunda Pamo Yenga ne Yenga: Kitatyi kya kwifunda Bible mu kisaka kifwaninwe kwikala kyaba kya mvubu mikatampe mu mpangiko yonso ya mu yenga. Muntu yense mu kisaka ufwaninwe kwikikwatakanya na kulondolola’ko na mutyima umo. I biyampe mutwe wa kisaka abandaule bisakibwa bya kyandi kisaka mwa kutongela myanda ya kwifunda, difuku, nsaa, ne bula bwa kifundwa. Kifundwa kya kisaka kyo kifwaninwe kutūlwa kumeso kwa bintu byonso mu kisaka. Kokileka myanda ya mvubu mityetye ikivutakanye.—Fid. 1:10, 11.
4 Shabana umo wadi witwa nyeke ku telefone pa myanda ya busunga, wādi usomona telefone shi kebalonga kifundwa. Ino shi bampotyi abaiya ku njibo, wādi wibanena balonde kifundwa nansha kwilaija bidi kipwe. Uno shabana wādi mutyipe amba kekudipo kintu nansha kimo kikavutakanya kifundwa kya kisaka. Kino kyatengele ne bana bene; na bya dyese, ne busunga bwandi bwine bwatubuluka.
5 Bine, kwingidila pamo kisaka kyonso kituntulu mu myanda ya kumushipiditu keko kuleta nsangaji! Kadi bukomo botulonga nyeke mwanda wa kulondolola biyampe shē ku kifundwa kya kisaka buketupeja madyese makatampe atamba kudi Yehova.—Mit. 1:3.