Lufu lwa Kidishitu Lusa Kuvulukwa Pano Pantanda Ponso
1 Yehova witupanga byabuntu bivule. Buyampe bwa mutyima wandi i butelwe na bishima bya kutendela amba i “kyabuntu kyandi kya kubulwa ne mwakunenena.” I bine, “buntu bwa Leza” i bupite kulumbuluka, bwitupwe’nka ne bunwa pa kwibushintulula.—2 Kod. 9:14, 15.
2 Kyabuntu Kyandi Kikatakata: Yesu Kidishitu, Mukūdi wa muzo wa muntu, kyo kyabuntu kikatakata kutabuka byonso. Yehova wālombwele buswe bukatampe bwaswele ntanda ya bantu na kupāna wandi Mwana muswedibwe, wabunka. (Yoa. 3:16) I bine, kino kintu kilēme kyaitupele kifwaninwe kuvulukwa pano pantanda ponso! Le kikavulukwa kitatyi’ka ne kwepi? Kyolwa kya dya Buná, difuku 1 Kweji 4, 1999, bene Kidishitu ba pano pantanda ponso bakavuluka Bidibwa bya Kyolwa bya Mfumwetu ne kutanwa ku Kivulukilo kya kitapwa kikatakata kutabuka byonso.—1 Kod. 11:20, 23-26.
3 Kidishitu wētufwidile “po twakidi bipya-mambo.” Nanshi netu tumufwijei’ko na kutanwa ku Kivulukilo kya lufu lwandi ne na kwita bakwetu bāye batanwe netu ku uno mwanda wa mvubu mpata.—Loma 5:8.
4 Mwanda wa Mvubu Mikatampe: Dibajinji, kivulukilo kya lufu lwa Kidishitu kilombola patōka amba i mukwate bubikadi bwa Leza makasa abidi. Kituvuluja monka’mba tukokeja kwikala na mwimanino utōka ku meso a Yehova na kulombola lwitabijo mu kitapwa kya Yesu, ne kukulupila kukamona lupandilo. (Bil. 4:12) I bine, uno i mwanda wa mvubu mikatampe mu mwaka onso mutuntulu!
5 Buswe botuswele bantu netu bukelombola patōka na kwibeta kotukebeta bāye batanwe netu ku Bidibwa bya Kyolwa bya Mfumwetu. Tuyukei amba byabuyabuya bya kinkūlwa bidi’ko, bitengele kupebwa midiyo ya bantu befunda mvubu yakyo mikatampe. (Fid. 3:8) Boba bonso betabije kitapwa kya Kidishitu badi na lukulupilo lukomo lwa kukapebwa būmi bwanyeke.—Yoa. 17:3.
6 Kitatyi kya Kivulukilo kyo kyotumonanga mikenga ya pa bula ya kulombola’mo kutendela kotutendela buntu bukatakata bwa Yehova. Kyo kitatyi kilumbuluke kya kusapula myanda miyampe ya Bulopwe bwa Leza na bupyasakane. Mwanda kudi byabuyabuya bivule bitengele boba bonso balanguluka ne kulombela pa kyabuntu kya Yehova kitabukile kunengela, bakwete mpangiko ya kukatanwa uno mwaka ku Kivulukilo kya Bidibwa bya Kyolwa bya Mfumwetu.