Bukwashi ku Bisaka

1. Le bisaka bya Bene Isalela byādi bimwena namani mu Sabado ya yenga ne yenga?

¹ Kulama Sabado yādi mpangiko ya buswe ya Yehova yādi imwena’mo bisaka. Bene Isalela bādi bakōkolokwa ku mingilo yabo ya bukile-bukya ne kumona kitatyi kya kulangulukila pa buyampe bwa Yehova ne pa kipwano kyobapwene nandi. Bambutwile babwanya kumwena mu uno mukenga mwanda wa kukomeneja Bijila mu mityima ya babo bana. (Kup. 6:6, 7) Sabado yādi ipa bantu ba Yehova kitatyi kya kuta mutyima ku būmi bwabo bwa ku mushipiditu yenga ne yenga.

2. Le Sabado witufundija bika bitala padi Yehova?

² Bine, Yehova kakisakengapo bisaka bilame Sabado. Inoko, kino kijila kitufundija kintu kampanda padi Leza wetu. Kilombola amba Aye utele nyeke mutyima ku būmi bwa ku mushipiditu bwa bantu bandi. (Is. 48:17, 18) Dyalelo, muswelo umo ulombola Yehova amba utele’ko mutyima na buswe i kupityila ku Butōtyi bwa Kisaka bwa kyolwa.

3. Le Butōtyi bwa Kisaka bwa kyolwa budi na Kitungo’ka?

³ Le Butōtyi bwa Kisaka bwa Kyolwa Budi na Kitungo’ka? Mu Kweji 1, 2009, Kifundwa kya Kitabo kya Kipwilo kyashilwile kupityijibwa mu difuku dimo dyonka na Masomo a Mwingilo wa Kiteokratike ne Kupwila kwa Mingilo. Bubinga bumo bwa buno bujadiki, i kupa bisaka mukenga wa kukomeja būmi bwabo bwa ku mushipiditu na kutūla’ko kyolwa kimo yenga ne yenga kya butōtyi bwa kisaka. Kisaka ne kisaka i kikankamikwe kutūla kifundwa kyabo kya kisaka mu kyolwa kyobadi befunda kifundwa kya kitabo, shi bibwanika, ne kwingidija kino kitatyi mwa kwisambila pa Bible ne kwifunda myanda ikwatañene na bisakibwa bya mu kisaka.

4. Le mīsambo ya kisaka ifwaninwe kukadikila enka pa nsaa umo? Shintulula.

⁴ Pa kukatanwa ku Kifundwa kya Kitabo kya Kipwilo, twadi tusakilwa kitatyi kya kuvwala, kya kwenda, ne bikwabo. Bavule motudi, kutanwa ku kuno kupwila kwa nsaa umo kwadi kwibasela kitatyi kilampe kyolwa’kya. Na buno bujadiki bwa mpangiko ya kupwila kwetu, pano kino kyolwa ketwikingidija mwanda wa kutōta Yehova mu kisaka. Nanshi, bwetu Butōtyi bwa Kisaka bwa kyolwa kebukakadikilapo pa nsaa umo kete. Tufwaninwe kulangulukila pa bisakibwa ne mikalo ya kisaka kyetu ne kutūla kitatyi mobyendele.

5. Le kitatyi kyonso kikapityijibwa enka mu mīsambo ya kisumpi? Shintulula.

⁵ Le Kitatyi Kyonso Kikapityijibwa Enka mu Mīsambo ya Kisumpi? Shi ba mulume ne mukaji, ne bisaka bidi na bana besambila myanda ya mu Bisonekwa pamo, bekankamikanga umo ku mukwabo. (Loma 1:12) Kisaka kikefwena pabwipi. Nanshi mīsambo ya mu Bisonekwa yo ifwaninwe kwikala kitako kine kya Butōtyi bwa Kisaka bwa kyolwa. Inoko, umo ne umo wa mu kisaka ufwaninwe ne kupityija kitatyi kya kifundwa kya kasuku. Kimfwa, pa kupwa kwa mīsambo ya kisumpi, kisaka kikokeja kushala pamo koku umo ne umo wifunda pa kasuku, padi uvuya kuteakanya kupwila nansha kutanga mapepala. Bisaka bimo bitoñanga kubula televijo kyolwa’kya kyonso.

6. I muswelo’ka ukendejibwa mīsambo?

⁶ I Muswelo’ka Ukendejibwa Mīsambo? Butōtyi bwa kisaka kebukemaninapo’tu enka pa mwisambo wa bipangujo ne malondololo. Pa kusaka’mba Butōtyi bwa Kisaka bwa kyolwa bwikale butobala kadi busangaja, bisaka bivule bikalanga na mpangiko iifwene na ya kupwila kwetu kwa pa bukata bwa yenga. Babanyanga mīsambo yabo mu bipindi bivule ne kupityija’byo mu miswelo mishileshile. Kimfwa, bakokeja kutanga Bible pamo, kulongolola kipindi kya ku kupwila, ne kwiibidija bipindi bya mu mwingilo. Paje 6 uleta’ko madingi amoamo.

7. I mwikadilo’ka ufwaninwe bambutwile kulama?

⁷ I Mwikadilo’ka Ufwaninwe Bambutwile Kulama? Kisaka kyobe kikefunda biyampe mu mwikadilo wa buswe ne ndoe. Mubwanya kyaba kimo kwifundila panja shi padi biyampe. Mudi na bwana-pabo bwa kukōkolokwa’ko bityetye shi bidi na mvubu. Bisaka bimo bikalanga bipwija mukose pa kupwa kwa mpangiko. Nansha bambutwile byobakepuka kwingidija Butōtyi bwa Kisaka bwa kyolwa bu mukenga wa kufuna nansha kutopeka, shako babwanya kwisambila pa kushinta nansha pa mwanda kamukaya obajingulula. Inoko, i biyampe kwisamba pafula na mwana myanda iteneka imutala bunka bwandi mu kitatyi kikwabo mu bula bwa yenga, kutyina’mba wakafwa bumvu kumeso a banababo. Butōtyi bwa Kisaka bwa kyolwa kebufwaninwepo kwikala buyayate, bupungija, ino bufwaninwe kulombola Leza wa nsangaji mwine otutōta.​—1 Tem. 1:11.

8, 9. Le i kwiteakanya kwa musuelo’ka kulombelwe mitwe ya bisaka?

⁸ I Muswelo’ka Uketeakanya Mutwe wa Kisaka? Kisaka kikamwena’mo bininge shi mutwe wa kisaka uteakanyanga kumeso kwa kitatyi Butōtyi bwa Kisaka bwa kyolwa, mwa kuyukila i bika bikesambilwa’po ne muswelo mwendele’mo wa kwibibandaula. (Nk. 21:5) Mulume ukabandaula uno mwanda pamo na wandi mukaji. (Nk. 15:22) A mitwe ya bisaka, le mwabulwa’po ne kwipangula masakila a benu bana? Shi ulonge namino, ukajingulula myanda yobatele’ko mutyima ne ibatala.

⁹ Mu mayenga mavule, kebikalombepo mutwe wa kisaka kupityija kitatyi kilampe bininge witeakanya. Padi, kisaka kikasangela kwifunda myanda ya muswelo umo onka yenga ne yenga, kadi mutwe wa kisaka kakasakilwapo kwiya na mpangiko mipya kitatyi ne kitatyi. Ukokeja kumona’mba bidi na mvubu kwiteakanya pa kupwa kwa kifundwa ne kifundwa, kitatyi kikidi bisakibwa bya ku mushipiditu bya kyandi kisaka mu ñeni. Mitwe ya bisaka imo isonekanga mu kīpi myanda yobakesambila’po ne kwiilamika popa pakokeja kisaka kumona bukidibukidi, kimfwa ku fidigo nansha ku lubumbu dya ku mulondo. Kino kiletanga kipyupyu ne kupa kisaka kitatyi kya kwiteakanya shi bidi na mvubu.

10. Le boba badi bunka bakokeja kwingidija namani bwabo Butōtyi bwa Kisaka bwa kyolwa?

¹⁰ Le Bikekala Namani shi Ngidi Bunka mu Kisaka? Boba badi bunka bakokeja kwingidija Butōtyi bwa Kisaka bwa kyolwa bu kifundwa kya kasuku. Mu bwifundi buyampe bwa kyalwilo mukekala butangi bwa Bible, kuteakanya kupwila, ne kutanga Kiteba kya Mulami ne Réveillez-vous ! Basapudi bamo batentekelanga’po ne mpangiko ya kifundwa kya kasuku. Kyaba kimo, bakokeja kwita musapudi mukwabo nansha kisaka baye belunge nabo mu mīsambo ya mu Bisonekwa yūbaka.

11, 12. Le i byabuyabuya’ka bimo bidi mu kwikala na Butōtyi bwa Kisaka bwa kyolwa bwa kitatyi ne kitatyi?

¹¹ I Byabuyabuya’ka Bidi mu Butōtyi bwa Kisaka bwa Kyolwa bwa Kitatyi ne Kitatyi? Boba bepāna na mutyima onso mu butōtyi bwa bine bafwenanga pabwipi na Yehova. Kadi, bisaka bitōta kya pamo biningijanga bijimba byabo mu kisaka. Kisaka kimo kyasonekele bitala madyese obemwenine amba: “Byotudi ba mulume ne mukaji bapania bampikwa bana, tutele bine mutyima ku bwetu Butōtyi bwa Kisaka bwa kyolwa. Twiivwananga’mba kipwano kyetu kyendanga kityita mu bukata bwetu kadi tufwenanga pabwipi ne kudi Tata wetu wa mūlu. Pano shi tubabuka lubanga mu difuku dya kwifunda pamo, twiipangulanga’mba: ‘I bika bitutengele kino kyolwa? Butōtyi bwa Kisaka bwa kyolwa!’”

¹² Kwikala na mpangiko ya butōtyi bwa kisaka kukwashanga ne bisaka bidi na bivule bya kulonga. Inabana umo ulela bandi bana babidi bunka koku wingila bu pania wa lonso wasonekele amba: “Mafuku kunyuma, kifundwa kyetu kya kisaka kyazobele. Kyadi kya na dimodimo kadi kiyayate mwanda wa bukōke. Nkyadipo ndyukile mwa kwikilumbulwila. Pa kino, nemusonekela mwanda wa kwimufwija’ko bikatampe pa Butōtyi bwa Kisaka bwa kyolwa. Pano tubabwanya kwikala na kifundwa kya kisaka kitatyi ne kitatyi kadi twimwenanga’mo byabuyabuya.”

13. Kyenu kisaka pa kumwena mu ino mpangiko, bilondanga mungya bika?

¹³ Pamo bwa Sabado, Butōtyi bwa Kisaka bwa kyolwa i kyabuntu kya kwa Tata wetu wa mūlu kibwanya kukwasha bisaka. (Yak. 1:17) Muswelo wādi umwena ku mushipiditu bisaka bya Bene Isalela mu Sabado wādi ukwatañana na muswelo obengidija’yo. Netu, kisaka kyetu kikamwena’mo mungya muswelo otwingidija kyolwa kitupelwe mwanda wa butōtyi mu kisaka. (2 Kod. 9:6; Ngat. 6:7, 8; Kol. 3:23, 24) Shi mwingidije biyampe ino mpangiko, kisaka kyenu kikeimvwana na mwēivwanine mulembi wa mitōto wānene amba: “Ino i kinengelele ami kufwena kudi Leza; namwene Mfumwami Leza, ke mumpakala mwami.”​—Mit. 73:28.

[Bushintuludi pa paje 5]

Butōtyi bwa Kisaka bwa kyolwa kebufwaninwepo kwikala buyayate, bupungija, ino bufwaninwe kulombola Leza wa nsangaji mwine otutōta

[Kapango pa page 6]

LAMA

Milangwe Imo Imo Itala Butōtyi bwa Kisaka bwa Kyolwa

Bible:

• Tangai pamo kipindi kya butangi bwa Bible bwa ku yenga ne yenga. Shi myanda’ya inenenwe na bantu bavule, nabya umo ukatanga bu mubangi, bakwabo nabo bakatanga binenwa bya bantu palapala.

• Engelekejai kipindi kya butangi bwa Bible.

• Abila umo ne umo wa mu kisaka atange kumeso kwa kitatyi mashapita a mu Bible atongelwe, asoneke ne kipangujo kimo nansha bibidi byadi nabyo pa myanda yaatanga. Kupwa longai bukimbi pamo pa bipangujo bya umo ne umo.

• Teakanyai yenga ne yenga papye, mwandike’po vese wa mu Bible kupwa tompai kukwatyila’ye pa mutwe ne kushintulula’ye. Kongakanyai mapapye, mupituluke’mo yenga ne yenga mwanda wa kuyuka i bisonekwa binga byomuvulukile.

• Londelai mu Mabible enu butangi bwa Bible bwa mawi makwatwe kala.

Kupwila:

• Teakanyai pamo kupwila.

• Imbai ñimbo ya Bulopwe idi ku mpangiko ya yenga wiya’ko.

• Shi umo mu bukata mwenu udi na kipindi ku Masomo a Mwingilo wa Kiteokratike nansha kya kumwena’ko ku Kupwila kwa Mingilo, mwisambilei pa milangwe yakanena nansha kupituluka’mo ku meso a kisaka.

Bisakibwa bya Kisaka:

• Bandaulai myanda ya mu dibuku Les jeunes s’interrogent nansha Boila Ñeni Kudi Mufundiji Mukatampe.

• Mwiibidijei mwa kupwijija mwanda ubwanya kulupuka ku masomo.

• Mwiibidijei na kwishinta biselwa; bana balonga bya bambutwile, bambutwile nabo bya bana. Bana balonga bukimbi pa mwanda kampanda kupwa kebalanguluka na bambutwile.

Mwingilo:

• Mwiibidijei mu musapwilo omukengidija Dya Mposo ne Dya Yenga.

• Mwisambilei pa bitungo bipotoloke bibwanya kwitungila kisaka pa kutandabula mwingilo kitatyi kya kivulukilo nansha kya konje.

• Shila umo ne umo wa mu kisaka minite mityetye ya kulonga bukimbi bwa mwa kulondolwela ku bipangujo palapala bikokeja kulupuka mu mwingilo, kupwa mwiibidijei.

Madingi Makwabo:

• Tangai pamo kishinte kya mu mapepala a panopano.

• Umo ne umo mu kisaka atange kumeso kwa kitatyi kishinte kimusangeje kya mu mapepala a panopano, kupwa asekunune’kyo.

• Kyaba kimo ita musapudi umo nansha ba mukaji ne mulume batanwe ku Butōtyi bwa Kisaka; mubwanya ne kwibepangula nabo.

• Talai video wetu umo ne kwisambila’po.

• Mwisambilei pamo pa bishinte “ Les jeunes s’interrogent ”, nansha “ Apprenons en famille ” bya mu Réveillez-vous !

• Mwisambilei pamo pa bishinte “Fundija Bobe Bana” nansha “ Pour nos jeunes lecteurs ” bya mu Kiteba kya Mulami.

• Tangai ne kwisambila pa kipindi kya mu Annuaire wa panopano nansha dibuku dyalupwilwe ku kitango kya distrike kyapityile.

• Kupwa kutanwa ku kitango nansha ku kubungakana, pitulukai mu myanda mikatampe.

• Bandilai bidi bupangi bwa Yehova, ne kwisambila pa byobya byobwitufundija padi Yehova.

• Talai pamo bintu, kimfwa bifwatulo, kalata, nansha tabulo.