Mitwe ya Bisaka​—Lamai Kibidiji Kiyampe kya Bintu bya ku Mushipiditu

¹ Danyele, nansha byaādi wikele myaka makumi ne makumi mu Babiloni mwādi butōtyi bwa bilezaleza ne mwikadilo wa kiboja, wādi uyukene bu muntu wingidila Yehova “mafuku onso nyeke.” (Dan. 6:​16, 20) Le wālamine namani būmi bwandi bwa ku mushipiditu? Nsekununi ya mu Bible ilombola amba wādi na kibidiji kiyampe kya kwingila mingilo ya mutōtelo wabine. Kifwa, wādi ulombela misunsa isatu difuku ne difuku mu kandimbwa kandi. (Dan. 6:10) Pakubulwa ne kutatana kwine, wādi kadi mwitūdile’ko ne mpangiko ya mingilo mikwabo ya ku mushipiditu, kifwa kutanga Bijila. O mwanda, pāmutene matompo a kyaka kya lufu, wāshele pakubulwa kutelententa kasha ulamata kudi Yehova, ebiya nandi wāmunyongolola na kingelengele.​—Dan. 6:​4-22.

² Ne batwe netu dyalelo mo monka, tufwaninwe kwielela’ko ‘kutengela kitatyi kyonso na kininga.’ (Ef. 6:18) Ino ntanda yotwikele’mo “ilēle mu bukomo bwa umbi.” (1 Yoa. 5:​19, NW) Kulondwalondwa ne matompo bibwanya kwitufikila’nka na mu kukopa kwa diso. Mu bula bwa kyamalwa kibūke, bengidi ba Leza bakekala kitondo kya kutambwa na Koka wa ku Makoka, kyaba’kya, bakamweka bu bampikwa kwa kunyemena. Kino kikalomba kutūla kikulupiji kyonso mudi Yehova.​—Ezek. 38:​14-16.

³ “Kintu kimo kikatampe kidi na bukwashi i kwitūdila butangi bushikate bwa Bible mu kisaka, kifundwa, ne mīsambo, bikale ke dishinda dya būmi bwetu.” Mo mwanenene myanda ya ñanjilo ya drame ya kitango kya distrike yadi inena amba “Bisaka​—Mwitūdilei Butangi bwa Bible bwa Difuku ne Difuku Ke Dishinda dya Būmi Bwenu!” Yaendelele amba: “Shi bisaka byetu bikale kwipāna mu kulonda ino mpangiko kitatyi ne kitatyi, bikwate Bible na makasa abidi bu dibuku dyūmi, bine kifundwa kya Bible kikekala na bukwashi bukatampe mu kisaka. Kiketūbaka na kwitulundila’ko buyuki. Kikakomeja lwitabijo lwetu. Kadi tukasokola’mo bifwa bilumbuluke​—bya bana-balume ne bana-bakaji ba pa kala bālombwele kikōkeji kyabinebine​—byotubwanya kulondela’po, bitupa bukomo bwa kulama mwimanino wetu ukwatañene na bubinebine.” Pano potubandaula bintu bishileshile bya kibidiji kiyampe kya bintu bya ku mushipiditu, mitwe ya bisaka ifwaninwe kutala muswelo umo nansha ibidi ya kulumbulula mpangiko ya bintu bya ku mushipiditu ya byabo bisaka.

⁴ Bandaulai Kinenwa kya Leza Difuku ne Difuku: “Bulopwe bwa Leza pobukaludika pampikwa kinkwa nabo nansha umo, kiswa-mutyima kyandi kilongwa pano panshi na mokilongelwa mūlu, kekukekalapo kadi muntu​—nansha nyema​—ukasusujana, mwanda ‘kebakasanshijapo, nansha kōna kwine.’ (Is. 11:9; Mat. 6:​9, 10)” Bino binenwa bitanwa mu kabuku Tubandaulei Bisonekwa Difuku ne Difuku​—2001 mu nshintulwilo iletelwe pa kisonekwa kya mafuku 11, Kweji 9. Bine, bino binenwa bya kwituvuluja byetusengele pa mutyima mpata! Le abe mutwe wa kisaka, udi na kibidiji kya kubandaula kisonekwa kya Bible ne nshintulwilo yakyo mu kisaka? Kidi na kamweno kakatampe mpata. Shi kebibwanikapo kungwila pamo lubanga, padi mubwanya kubandaula’kyo nansha kyolwa. Shabana umo wanene amba: “Pa bidibwa bya kyolwa po pa kitatyi kiyampe potubandaulanga kisonekwa kya Bible kya difuku.”

⁵ Shi mudi kala na kibidiji kiyampe kya kubandaula kisonekwa kya difuku mu kisaka, nankyo luñanyañanya lwenu. Padi mubwanya kumwena’mo na kubweja’po ne butangi bwa kipindi kampanda kya Bible. Bamo badi na kibidiji kya kutanga shapita yense mutuntulu uselelwe’mo kisonekwa kya difuku’kya. Bakwabo nabo batanga Bible mungya mwilondela mikanda idi’mo. Butangi bwa Bible bwa difuku ne difuku bukakwasha kisaka kyobe kitamije kwakamwa Yehova kwa kutyina kumufityija mutyima ne kutamija mutyima wa kwabila kulonga kiswa-mutyima kyandi.​—Kup. 17:​18-20.

⁶ Bwenu butangi bwa Bible ne bubandaudi bwa kisonekwa kya difuku mu kisaka bukekala na kamweno kakatampe bininge shi mwikale kwitūdila’ko minite kampanda ya kwisambila pa muswelo ubwanya kwimukwasha ino myanda. Dibuku École du ministère dileta uno mulangwe pa paje 60: “Ukokeja . . . kusañuna mavese matyetye mu mpangiko ya butangi bwa Bible bwa yenga, kwisambila pa buluji bwao, ebiya waipangula ne bipangujo bya uno muswelo: ‘Lelo kino kitupa bwendeji muswelo’ka? I muswelo’ka otukokeja kwingidija ano mavese mu mwingilo? Lelo etusokwela kika padi Yehova ne pa muswelo wandi wa kulonga bintu, ne i muswelo’ka oatamija mutyima wetu wa kumufwija’ko?’ ” Mīsambo ya ku mushipiditu ya uno muswelo ikakwasha bonso ba mu kipango kyobe bajingulule “kiswa-mutyima wa Mfumwetu.”​—Ef. 5:17.

⁷ Kifundwa kya Kisaka: Kwendeja kifundwa kya kisaka nyeke yenga ne yenga i muswelo mulumbuluke ku mitwe ya bisaka wa kulombola babo bana amba bintu bya ku mushipiditu byo bya kutūla pa kifuko kibajinji. Nsongwalume umo uvulukanga’mba: “Kyaba kimo Tata wādi ujoka ku kaji mukoke bininge byakolelwa’nka ne kwimana pashikete, ino kifundwa kyādi kifundibwa pakubulwa kubanga byonso’bya, kino kyētukweshe, twājingulula kusumininwa kwakyo.” Ne bana nabo bakokeja kubweja ku muneñenya wa ino mpangiko. Ba mu kisaka kimo badi na bana kitema balangukanga 5:00 kwifunda kifundwa kyabo kya kisaka mwanda i kutupu nsaa mikwabo yokibwanika.

⁸ Pa kusaka amba kifundwa kya kisaka kikale kifike’po, mutwe wa kisaka ufwaninwe ‘kuta kitatyi kyonso mutyima ku bufundiji bwandi.’ (1 Tem. 4:16) Dibuku École du ministère dinena pa paje 32 amba: “Kunena na bubine kifundwa kya kisaka kifike’po kishilulanga na kwifunda bidi kyobe kisaka kine. Lelo ba mu kyobe kisaka bendelelanga namani ku mushipiditu? . . . Kitatyi kyomwendanga mu mwingilo wa budimi na bobe bana, le wibamonanga batūkije mityima beyukanya bu Batumoni ba Yehova ku bakwabo? Lelo basangelanga mpangiko yenu ya butangi ne kifundwa kya Bible bya mu kisaka? Le i balonge dishinda dya Yehova ke dyabo dishinda dya umbūmi? Kubandaula senene kukasokwela patōka bintu byofwaninwe kulonga’po abe mutwe wa kisaka bya kushimatyija ne kutamija ngikadilo ya ku mushipiditu ya umo ne umo wa mu kisaka.”

⁹ Kupwila kwa pa Kipwilo: Kuteakanya kupwila ne kutanwa’ko i kipindi kikatampe kifwaninwe kubadilwa mu kibidiji kyenu kya ku yenga ne yenga. (Bah. 10:​24, 25) Kyaba kimo, mukokeja kuteakanya’ko kupwila kumokumo banwe bonso mu kisaka. Le kemukokejapo kwalwila’ko kwiteakanya kumeso kwa kitatyi, kupita’ko kwiteakanya shi kubashala kitatyi kityetye? Kibidiji kya kulonda ndudi mu bino bintu kikalumbulula buya bwa kwiteakanya kwenu ne byabuyabuya byomukamwena mu kupwila.​—Nk. 21:5.

¹⁰ Buya ne kulongela monka kitatyi kyonso i bilomboji biyukilwanga’po kibidiji kiyampe kya bintu bya ku mushipiditu. Ino shi ngikadilo keimushilapo kyaba kya kuteakanya kupwila konso le mukalonga’po kika? Dibuku École du ministère, pa paje 31, dileta’po uno mulangwe: “Epuka kuponena mu makinga a kwela bya lubilolubilo diso mu myanda ikafundwa mwanda’tu wa kunena amba kyakolwa napu’byo, kadi kibi kutabukidila i kubudidilwa’tu kwifunda nansha imo amba mwanda’po kudipo mwa kupwila’yo yonso. Ino witungile na kusumininwa i bipindi binga byokokeja kwifunda, ebiya kadi wifunde’byo biyampe shē. Longa’nka nankyo yenga ne yenga. Mwenda mafuku, wenda wielela’ko, ubweja’ko kupwila kukwabo.”

¹¹ Shi bisaka bīya ku kupwila kumeso kwa kitatyi, bikapēlelwa kufukatyija mityima mwa kutendelelela Yehova ne kumwena biyampe mu bufundiji bwaleta. Le kyenu kisaka kidi na kino kibidiji? Kilomba kwitūdila’ko mpangiko miyampe ne kwingila kakasa kakasa kipango kyonso pamo. Shi ubamone amba kyobe kisaka kipangilanga, kyafika na mutyima kūlu ku kupwila, lelo kubulwe’po busenduludi kampanda bomukokeja kusendulula’po? Le kubulwe’po bintu bikokejika kulongwa kumeso kwa kitatyi? Shi umo mu kisaka walēmenenwa na bya kulonga, banwe bakwabo mwabulwa’po kumukwasha’ko? Mwene shi umo ne umo ashilule kutaluka kumeso kwa kitatyi bikatyepeja’ko bya kuselasela mutyima kūlu? Ndudi miyampe ipanga bantu ndoe mu kisaka ne mu kipwilo.​—1 Kod. 14:​33, 40.

¹² Mingilo ya Budimi: Kwitūdila’ko bitatyi bya kwenda mu mwingilo i kipindi kikwabo kya kibidiji kiyampe kya bintu bya ku mushipiditu. Nsongwalume umo witwa dya bu Jayson uvulukanga’mba: “Mu kyetu kisaka, Madya Mposo onso lubanga ādi atūdilwe mingilo ya budimi. Bino byādi biyampe kondi mwanda mu kwenda bininge mu mwingilo mo monādi mona buyampe bwa’o kadi mo monādi neusangela bininge.” Bavule batamine mu bipango bya Batumoni nabo banenanga muswelo umo onka, amba kulonda kobādi balonda kitatyi kampanda kya kutambila mu mwingilo yenga ne yenga kwēbakweshe bendelele kumeso bu bengidi bene Kidishitu.

¹³ Kibidiji kya kulonda ndudi kikokeja kadi kwikadija kitatyi kitambila kyobe kisaka mu mwingilo wa busapudi kya nsangaji kadi kilupula bipa bivule. Le bino’bi bibwanya kulongwa namani? Kiteba kya Mulami kya 1 Kweji 7, 1999, paje 31, kyaletele’po uno mulangwe: “Lelo kitatyi kimo mu kifundwa kyenu kya kisaka ukwashanga ba mu kipango kyobe na madingi a mwa kuteakenya mwingilo wa budimi wa mu yenga? Kwibakwasha namino kudi na kamweno kakatampe mpata. (2 Tem. 2:15) Kukwashanga mwingilo wabo wikale kutamina’ko ne kulupula bipa. Kyaba ne kyaba ukokeja kutūla’ko kifundwa kituntulu kimanine’nka pa kuno kwiteakanya. Pakwabo ukokeja kwisambila mu kīpi ne pa miswelo mikwabo ya busapudi ku mfulo kwa kifundwa kya kisaka nansha kyaba kikwabo mu bula bwa yenga.” Lelo kyobe kisaka ke kitompe kulonga namino?

¹⁴ Endelelai Nyeke Kumeso: Mu buno bubandaudi, le ubamone bintu kampanda biloñwanga biyampe na ba mu kyobe kisaka? Wibafwije’ko, kadi mwielele’ko ne kubweja’ko bikwabo. Shi ubamone amba kudi bintu bivule bikimusakila kulumbulula, tonga’po bidi kimo nansha bibidi bya kubadikila nabyo. Shi ubamone ke kibidiji kyenu kya ku mushipiditu, kwata’ko kikwabo kimo nansha bibidi. Ikala na mumweno muyampe ne na mutyima unekena. (Fid. 4:​4, 5) Kushimika kibidiji kiyampe kya ku mushipiditu mu kyobe kipango kulombanga bukomo bwabinebine, ino kudi na kafwila-midimo, mwanda Yehova witukulupija’mba: “Yewa wilongolola mu mwikadilo wandi biyampe nkamulombolanga lupandilo lwa Leza.”​—Mit. 50:23.