Mpangiko Impya ya Kupwila
1, 2. Lelo kupwila kukashinta namani tamba Kweji 1, 2009?
1 Mu yenga wa mafuku 21-27 Kweji 4, 2008, banabetu ba ntanda yonso baivwene musapu usangaja. Amba: “Kushilwila mu difuku 1 Kweji 1, 2009, kupwila kwa Kifundwa kya Kitabo kya pa Kipwilo kukalongelwa pamo na Masomo a Mwingilo wa Kiteokratike ne Kupwila kwa Mingilo. Dijina dya Kifundwa kya Kitabo dikashinta ke Kifundwa kya Bible kya Kipwilo.”
2 Mpangiko ya Kuno Kupwila kwa Yenga ne Yenga: Kuno kupwila konso kubadila’mo ne ñimbo ne milombelo kukekala na nsaa 1 ne minite 45. Kupwila kukashilula na lwimbo ne milombelo (Min. 5), ebiya ke Kifundwa kya Bible kya Kipwilo (Min. 25). Kukalonda Masomo a Mwingilo wa Kiteokratike (Min. 30). Kupwa kukekala lwimbo (Min. 5) lwa kushilula nalo Kupwila kwa Mingilo (Min. 35). Kupwila kukafula na lwimbo ne milombelo (Min. 5). Mpangiko ya Kifundwa kya Bible kya Kipwilo, Masomo a Mwingilo wa Kiteokratike, ne Kupwila kwa Mingilo ikalupulwa kweji ne kweji mu Mwingilo Wetu wa Bulopwe, mwanda wa kwimukwasha mwa kwiteakenya.
3. Lelo Kifundwa kya Bible kya Kipwilo kikendejibwa namani?
3 Kifundwa kya Bible kya Kipwilo: Kuno kupwila kukendejibwa monka mwendejijibwanga Kifundwa kya Kiteba kya Mulami. Kekudi kisakibwa kupituluka mu byafundilwe yenga mupite. Inoko, kupwila kukashilula’tu na ntwelelo mīpi. Kino kikakwasha kwilamina’ko kitatyi amba bonso bamone mwa kulondolwela’ko mu kīpi. Mutadi mwimaniji ukabila mukulumpe ne mukulumpe yenga wandi wa kwendeja kuno kupwila.
4. Lelo i bika bikashinta mu mpangiko ya Kupwila kwa Mingilo?
4 Kupwila kwa Mingilo: Kupwila kwa Mingilo kukashala enka mokwendejibwanga, inoko bipindi bikekala bīpi. Misapu ikekala enka na minite itano mafuku onso. Kino kitatyi kikapityijibwa enka ku misapu ya mvubu kete ne mikanda imoimo itamba ku musambo. Misapu pamo bwa yoya itala mpangiko ya kutambila mu busapudi, bukundwe, lapolo wa mikolo, ne mikanda īyanga kitatyi kyonso ku bilo ya musambo, keikatangibwapo ku lukala, ino ikalamikwa ku tabulo wa misapu, ko kukatangila’yo banabetu. Boba bapebwa bipindi bafwaninwe kwiteakanya senene, kulama kitatyi kibapelwe, ne kulonda bulombodi buletelwe.
5. Lelo mpangiko ya kupwila mu bupempudi bwa mutadi wa kipindi ikapityijibwa namani?
5 Bupempudi bwa Mutadi wa Kipindi: Mpangiko ya mu yenga wa bupempudi bwa mutadi wa kipindi keikashintapo. Mu Dya Bubidi, mukalonga Masomo a Mwingilo wa Kiteokratike ne Kupwila kwa Mingilo, bikalondwa na lwimbo. Kupwa mutadi wa kipindi ukanena dishikulu dya minite 30. Difuku dikwabo kyolwa kukekala Kifundwa kya Bible kya Kipwilo kikalondwa na lwimbo ne dishikulu dya mingilo dya mutadi wa kipindi, monka mobilongelwanga nyeke mu yenga wa bupempudi. Kupwila kukafula na lwimbo ne milombelo.
6. Lelo mutadi wa kisumpi ukekala na mwingilo’ka?
6 Kupwila kwa Kwenda mu Mingilo ya Budimi: Kitango kya bakulumpe kikatonga’ko batadi ba bisumpi ba kwimanina mingilo ya busapudi mu bisumpi ne ya kukumba boba badi mu bisumpi byabo. Shi mwingidi wa mingilo wapebwa kino kiselwa, nabya uketwa bu “mwingidi wa kisumpi.”
7. Lelo i bika byotutengele na kipyupyu pa bitala mpangiko mipya ya kupwila?
7 Ino mpangiko iketukwasha tutambule bufundiji bwa bidibwa bya mu kyolwa byūbaka ku mushipiditu. Kino kiketukwasha twikale basapudi ne bafundiji balumbuluke, bafundijibwe mwa kupela bipa bivule mu mwingilo.—Ef. 4:13, 14; 2 Tem. 3:17.
8. Lelo kwiteakanya kumeso kwa kitatyi kudi na kamweno’ka kotudi ne ku bakwetu?
8 Kwiteakanya kumeso kwa kukapwila kuketukwasha tute mutyima ku myanda mikatampe ikakomwa ku kupwila ne kupwila. Kadi kuketupa muswelo wa kulondolola, mwanda wa kwikankamika kwa batwe bonso senene. (Loma 1:11, 12; Bah. 10:24) Kitungo kyetu kifwaninwe kwikala kya ‘bantu bonso bamone motwendela tutamina’ na ‘kolokela monka mu mwanda wa binebine.’—1 Tem. 4:15; 2 Tem. 2:15.
9. Lelo twi basumininwe kulonga bika, ne mwanda waka?
9 Tudi na nsangaji pangala pa kuno kushinta kwa mvubu kwa mpangiko ya kupwila. Nanshi i biyampe twendelele na kulonda buno buludiki bwitupa “umpika wa binebine, udi na manwa” ne kulamatyidila kudi Mukumbi wetu Mukatampe wituteakanya mwa kukapityila ku “kyamalwa” kibūke kyafwena’ki.—Mat. 24:21, 45; Bah. 13:20, 21; Kus. 7:14.