Ubwanya Kwikala Mufundiji!
1. Le musapudi ense wa Bulopwe i mupebwe mwingilo’ka?
1 Kintu kileta nsangaji kutabuka mu mwingilo wetu i kufundija muntu bubinebine. Twikalanga na nsangaji pa kumona muntu witabija musapu wa Bulopwe ne potumukwasha afwene kudi Mfumu wa diulu ne ntanda. (Yak. 4:8) Kufundija muntu udi na nzala ya kuyuka bubinebine ne kumumona wenda walamuna bumuntu, mwikadilo ne mwiendelejo wandi kyo kitungo kifwaninwe kwikala nakyo musapudi ense wa Bulopwe.—Mat. 28:19, 20.
2. Mwanda waka bamo bevwananga moyo wa kwendeja bifundwa bya Bible, ne i bika bikebakwasha banekenye uno mwanda?
2 Kulupila Yehova: Pa kala, kwādi bengidi bamo ba kikōkeji bēmwene bu kebabwanyapo kwingila mingilo yobāpelwe. Kukulupila Yehova Leza kwākweshe Mosesa, Yelemia, Amose ne bantu bakwabo banekenye moyo ne malangalanga, ino bavuije mwingilo wa mvubu. (Div. 4:10-12; Yel. 1:6, 7; Am. 7:14, 15) Mutumibwa Polo nandi ‘wakankamene ne kukankamana,’ pa bute pa bute ko kunena’mba, “kākidipo na moyo wa kwisamba.” Muswelo’ka? Aye mwine’mba i monka “mudi Leza wetu.” (1 Tes. 2:2) I bine, batwe bonso tukokeja kukulupila mudi Yehova wa kwitukwasha, kwitupa ñeni ne bukomo botusakilwa pa kwendeja bifundwa bya Bible byendelela kumeso.—Is. 41:10; 1 Kod. 1:26, 27; 1 Pet. 4:11.
3, 4. Le i bufundiji’ka butūdilwe’ko mwanda wa kwitukwasha kufundija Kinenwa kya Leza?
3 Itabija Kufundijibwa: Yehova Leza, Mufundiji Wetu Mukatampe, witufundijanga kupityila ku mpangiko yetu ya bukile bukya ya bufundiji bwa ku mushipiditu mwa kwikadila bafundiji babwanya byonso. (Is. 54:13; 2 Tem. 3:16, 17) Itabija kufundijibwa na kumwena ne pa mfulo mu mukenga onso wa kutandabula kwimvwanija kobe kwa Bisonekwa ne kulumbulula bwino bobe bwa kufundija bubinebine bwa mu Bible. Nansha Masomo a Mwingilo wa Kiteokratike ne Kupwila kwa Mingilo byobimanine pa kwitufundija uno muswelo, ino kupwila konso kwitukwashanga tufundije Kinenwa kya Leza.
4 Longa bukomo bwa kufundija bintu bikomo bya ku mushipiditu mu muswelo upēla. Dibuku Masomo a Mwingilo, paje 227 dinena’mba: “Ufwaninwe bidi abe mwine kwivwanija senene mwanda okanena shi usaka bakwenu nabo bakevwane’o biyampe.” Kulondolola ku kupwila kwitukwashanga tutentekele myanda mikatampe mwa kukengidijija’yo. Nanshi wilongolole senene, nankyo bityebitye ukesumbidila’mba ubwanya kufundija.
5. Lelo i bufundiji’ka bukwabo botupebwanga mu kipwilo pa mwanda wa kwitukwasha twendelele mu bufundiji?
5 Tamba ku ñanjilo, bengidi Bene Kidishitu beiulanga pobenda mu mwingilo wa kulonga bana ba bwanga. (Luka 10:1) Shi bikokejika, enda mu mwingilo wa kwendeja bifundwa bya Bible na basapudi ba bwino, kubadila’mo bapania, bakulumpe, ne batadi bendakana. Tala muswelo obengidija byelekejo bipēla ne bingidilwa bikwabo bya kufundija nabyo bitanwa mu mabuku otufundija nao mwanda wa kushintulula bubinebine bwa mu Bisonekwa. Wibalombe madingi a muswelo okokeja kwikala mufundiji muyampe. (Nk. 1:5; 27:17) Itabija buno bufundiji bonso, ke pantu butambanga kudi Leza.—2 Kod. 3:5.
6. Lelo i bika bilombwa nakampata pa kwikala mufundiji wa Kinenwa kya Leza?
6 Kulupila Yehova, ne kumwena mu bufundiji bwandi. Lombela pa mwanda wa kwendelela kobe. (Mit. 25:4, 5) Nobe ukamona nsangaji ya kukwasha muntu ekale bwa abe, mufundiji wa Kinenwa kya Leza!