‘Longelai Byonso pa Mwanda wa Myanda Miyampe’
1. Le musapudi wa Bulopwe usakanga kulongela bakwabo bika, ne mwanda waka?
1 Mutumibwa Polo wāmwene amba wādi na kiselwa kya kusapwila bakwabo myanda miyampe. (1 Kod. 9:16, 19, 23) Ne batwe netu, mutyima wetu wa kusakila bantu bakamone būmi bwa nyeke witutononanga tulonge bukomo bonso bwa kwibasapwila myanda miyampe.
2. I bika byotusaka kushinta potusapula, ne mwanda waka?
2 Sapula mu Kifuko ne Kitatyi Kitanwa’ko Bantu: Kiluwe muyampe ulobanga nansha kuta bwanda popa pabwanya kutanwa mwita ne mu kitatyi kyoudi’po, ke pa kifuko’po nansha pa kitatyi kyasaka aye mwine. Netu byotudi “biluwe bya bantu,” i biyampe tushinte mpangiko yetu mwanda wa kutana bantu ba mu mwaba wetu ne kuvuija ne pa mfulo mwingilo wetu wa kukwata “mwita wa lui wa miswelo yonso.” (Mat. 4:19; 13:47, MB) Tubulwe’po kwingidija kitatyi kya kyolwa kukatana bantu ku mobo abo nansha kya lubanga bininge mwanda wa kusapula mu bipito? Polo wādi na kitungo kya “kusapula myanda miyampe” ne pa mfulo, kadi ponso paādi umona mikenga wādi usapwididila ne pa mfulo.—Bil. 17:17; 20:20, 24.
3, 4. Kitatyi kyotudi mu busapudi, i muswelo’ka otubwanya kushinta, ne i bika byotukamwena’mo?
3 Kwatañanya Musapwilo Obe Mungya Bosapwila: Kitatyi ne kitatyi babiluwe bashintanga buluwe mwanda wa kukwata mwita kampanda. Le tukasapula namani myanda miyampe mu muswelo ukoka bantu ba mu wetu mwaba? Tufwaninwe kushilula na mwanda utēle’ko bantu bavule mutyima, kupwa twateja na katentekeji byobalanga pa mwanda’wa. (Yak. 1:19) I biyampe kwipangula kipangujo kya kwibaloba tudi mu kanwa mwanda wa banene’po. (Nk. 20:5) Nabya tukakwatañanya musapwilo wetu wa myanda miyampe mu muswelo utenga myanda yobalwa nayo. Polo wādi “bu-bintu byonso” ku “bantu bonsololo.” (1 Kod. 9:22) Kushinta ne kukwatañanya musapwilo kudi na kamweno pa kutenga mityima ya bantu.
4 Bine, i nsangaji mikatampe pa kusapwila bantu “myanda miyampe ya dyese”! (Is. 52:7) Nanshi ‘tulongei byonso pa mwanda wa myanda miyampe’ amba tufikile bantu bavule nakampata.—1 Kod. 9:23.