Kufikila Bantu Bavule Bene
1. I bika byālongele bene Kidishitu babajinji pa kufikila bantu bavule bene na myanda miyampe?
1 Balondi babajinji ba Yesu bādi bakimba na mikeketo kusambakanya musapu wa Bulopwe. Bātabwile matabula mafwaninwe mwa kufikijija myanda miyampe ku bantu bavule bene. Balembi ba Bible bene Kidishitu bālembele bilembwa bya ku bukomo bwa mushipiditu mu Kingidiki kimvwanwa na bonso, ludimi lwādi lutelekwa mu mizo yonso ya Umbikalo wa Loma. Kadi, basapudi bapyasakane ba mu myaka ya katwa ka bubidi ne ka busatu K.K. bāikele batulāla-ntanda mu kwingidija kodekishi (codex), yādi ipēla kwingidija kupita’ko mivungo pa kutana bisonekwa.
2, 3. (a) Isaya 60:16 ufikidilanga namani mu ano mafuku? (b) Le busendwe i bukwashe namani kwendeleja mutōtelo utōka kumeso?
2 Kwingidija Busendwe: Yehova wālaile kupityila kudi mupolofeto Isaya amba: “Abe nobe ukāmwa mabele a mizo.” (Is. 60:16) Mu kufikidila kwa buno bupolofeto dyalelo, bengidi ba Yehova bengidijanga bintu bya mvubu bya mizo mwanda wa kwendeleja kumeso mwingilo wa kusapula. Kimfwa, mu 1914, myaka mivule kumeso kwa masinema kutumba’o mu bansunga, Befundi ba Bible bāshilwile kala kulombola “Foto-drame ya Bupangi.” Ino yādi sinema ya nsaa mwanda ya bifwatulo bijina, miyule misombelo ne mawi, ne kadi yāletele bukamoni bukomo ku midiyo ne midiyo ya bantu.
3 Dyalelo, bantu ba Leza bengidijanga bitampilo bilupula bitabo bivule ne bingidilwa bya makompyuta mwanda wa kwabanya Mabible ne mabuku esambila pa Bible mu tutwa na tutwa twa ndimi. Byendwa nabyo bya bukidi nabyo bitwalanga mabuku esambila pa Bible ku bifuko bya kulampe bya ntanda, ku bantu ba mu matanda 235. Yehova, kupityila ku mushipiditu sandu wandi, ukunkanga bengidi bandi bengidije bino bingidilwa bya busendwe, mwanda wa kuyukanya bubinebine bwa mu Bible ku bantu bavule bene kutabuka mu mānga yonso ya muntu.
4. I busenduludi’ka bwisendulwile bamobamo mwanda wa kufikila bantu bavule na myanda miyampe?
4 Busenduludi ku Umo ne Umo: Batōtyi ba bine nabo i bafikile pa kwisendulula umo ne umo mwanda wa kufikila bantu bavule bene na myanda miyampe. Bavule i bapēleje būmi bwabo mwa kwipānina ne pa mfulo mu mwingilo wa busapudi. Bamo i bavilukile kokwa kusakibwa basapudi ba Bulopwe bavule. Bakwabo nabo i batandabule mwingilo wabo na kwifunda ludimi lweni.
5, 6. I bika byokokeja kulonga pa kufikila bantu bavule bene mu mwaba wenu?
5 Ne kadi, tukokeja kufikila bantu bavule bene na myanda miyampe shi tusapula kitatyi kidi bantu ku mobo ne kokwa kobatanwa. Shi bantu bavule kebatanwangapo ku mobo mu mwinya mu mwaba wenu, mwene ukokeja kusendulula mpangiko yobe mwa kusapwila ku kyolwa? Le kudi biwanza mungwilanga bantu mokokeja kusapula? Le kodi mutompe busapudi bwa ku telefone nansha kusapula mu mikenza ya busunga? Lelo ubulwepo kukimba mikenga ya kusapula bya kiponka na ponka?
6 Bine, tudi na dyese dya kwingila na bengila mu kusapula bukamoni butala pa dijina dya Yehova ne pa Bulopwe bwandi! Nanshi twendelelei na kusapula bubinebine bupāna būmi budi mu Kinenwa kya Leza ku bantu bavule bene.—Mat. 28:19, 20.