Kusapula Kwitukomejanga ku Mushipiditu
1. Lelo i bika byotumwenanga mu mwingilo wa kusapula?
1 Kwikala na bupyasakane mu mwingilo wa busapudi kwitukomejanga ku mushipiditu ne kwituvudijija nsangaji. Shako, bubinga bukatampe botusapwilanga i mwanda wa kusangaja mutyima wa Yehova. Inoko, potukōkela ku musoñanya wa ‘kusapula mwanda,’ tweselwanga na Yehova kadi tumwenanga’mo mu miswelo mikwabo. (2 Tem. 4:2; Is. 48:17, 18) Penepa le kusapula kukokeja kwitukomeja ne kwitupa nsangaji muswelo’ka?
2. Lelo busapudi bwitukomejanga muswelo’ka?
2 Tukomejibwanga ne Kweselwa: Kusapula kwitukankamikanga tubambile meso etu pa madyese a Bulopwe kupita’ko pa mitabakano idi’ko dyalelo. (2 Kod. 4:18) Kushintulula bufundiji budi mu Bible kukomejanga lwitabijo lwetu mu milao ya Yehova kadi kwitukwashanga tukwate bubinebine na mutyika. (Is. 65:13, 14) Potukwasha bakwabo batame ku mushipiditu ne baleke kwikala ‘ba ino ntanda,’ tukomejanga ne mutyima wetu wa kusansana nyeke na ino ntanda.—Yoa. 17:14, 16; Loma 12:2.
3. Lelo mwingilo wetu witukwashanga namani tutamije ngikadila ya Bwine Kidishitu?
3 Kutambila mu mwingilo wa busapudi kwitukwashanga tutamije ngikadila ya Bwine Kidishitu. Kimfwa, kulonga bukomo bwa ‘kwalamuka bu bintu byonsololo ku bantu bonsololo’ kwitukwashanga twikale na kwityepeja bininge. (1 Kod. 9:19-23) Kitatyi kyotwisamba na boba ba “kususuka, ne kusansana badingakana pamo na mikōko yampikwa mukumbi,” kwitukwashanga tuyuke kulangila bakwetu ne kwibakwatyila bulanda. (Mat. 9:36) Twifundanga kūminina potwendelela kusapula mu bantu ba bujundu nansha ke mu kukankajibwa kwine. Nsangaji yetu ilundilanga’ko potwipāna mwanda wa kukwasha bakwetu.—Bil. 20:35.
4. Lelo umwene namani mwingilo obe wa kusapula?
4 Bine, tudi na dyese’po kashā dya kwingila mwingilo utendela mwine Umo kete otufwaninwe kutōta! Mwingilo wa busapudi witukomejanga. Uletanga madyese a ntanda ne miseke ku boba bepāna ne mutyima umo mu “kusapula myanda-miyampe” ne pa mfulo.—Bil. 20:24.