Malondololo ku Bipangujo Byenu

◼ Lelo i kyendele’mo bipwilo nansha bantu kwingidija biyukeno bya bitango bingidijibwa na Batumoni ba Yehova biyukene mungya bijila bya leta?

Kiyukeno kīsambilwa’po pano i dijina, kifwatulo, nansha kayukeno ka kuyukilapo bintu bya sosiete kampanda. Kayukeno ka kifwatula kya Kiteba kayukanyanga sosiete Watch Tower Bible and Tract Society of Pennsylvania ne bitango bikwabo bingidijibwa na bulongolodi. Kitango Christian Congregation of Jehovah’s Witnesses kingidijanga kayukeno ka Bible muputulwe kūlu kwa mikanda itumwa. Bitango bikwabo bingidijibwa na Batumoni ba Yehova bidi na biyukeno bishile.

Bipwilo nansha bantu kebafwaninwepo kwingidija biyukeno nansha majina a bingidilwa bya bulongolodi biyukene mungya bijila, nansha biyukeno biifwene nabyo, pa abo Mobo a Bulopwe, pa bilomboji, kūlu kwa mikanda, pa bintu bya muntu kampanda, nansha kukwabokwabo. Kwingidija biyukeno bya bulongolodi namino kukokeja kuleta kavutakanya mu ñeni ya balupusa, basapudi, ne bakwabo pa bitala kipwano kya mungya bijila kidi pa bukata bwa kipwilo na bino bitango bya bulongolodi biyukene mungya bijila. Mo monka ne mikanda itumwa ikamonwa bibi bu mitabijibwe nansha bu mitambe ku kité kya ntanda yonso nansha ku bilo ya musambo.

Kiyukeno kya Kiteba kya Mulami, nansha kikwabo kiifwene nakyo, kekikalamikwapo pa Njibo ya Bulopwe mikwabo ikobakwa nansha byoidi ya kitango kya Watch Tower. Bipwilo bidi kala na Mobo a Bulopwe padi kiyukeno kebaningilwepo amba enka batalule’kyo ponka na ponka, mwanda padi kulamuna’kyo kukalomba kushinta bintu bikwabo ne kitatyi kivule, bukomo, ne lupeto. Inoko, i biyampe kuta’ko mutyima ne kushinta shi kekilombepo mwingilo mukatampe. Shi bitupu, kikatalulwa kitatyi kya kulongolola Njibo ya Bulopwe.