Mwishidile Kitango Kyendeji na Kitango Kiyukene Mungya Bijila bya Leta

KUPWILA kwa mwaka ne mwaka kwa Watch Tower Bible and Tract Society of Pennsylvania kwāshilwile tamba mu Kweji 1, 1885. Pādi pakikongakanibwa bene Kidishitu bashingwe-māni kutūla ne ku mvuyo kwa myaka ya tutwa 19, batangidiji ne bengidi ba kino kitango bākidi’nka boba badi na lukulupilo lwa kwenda mūlu. I bine, ye mobyadi bikadile nyeke.

Ino shako kwāikele kwishila kyaba kimo. Mu 1940, Hayden C. Covington​—wādi mudingidi wa bijila wa Sosiete kadi umo wa mu “mikōko mikwabo” idi na lukulupilo lwa pano panshi​—wātongelwe bu mutangidiji wa Sosiete. (Yoano 10:16) Wāingile bu mwimaniji mpingakani wa Sosiete tamba mu 1942 kutūla mu 1945. Mu mwine mwaka’o, Tutu Covington wātūla bu mutangidiji mwanda wa kulonda kyokya kyādi kimwenwe mu mine myaka’ya bu kiswa-mutyima kya Yehova​—amba batangidiji ne bengidi bonso ba mu kitango kya Pennsylvania bekale’nka bene Kidishitu bashingwe-māni. Lyman A. Swingle wāpingakena Hayden C. Covington pa bu mutangidiji, Frederick W. Franz nandi wātongwa bu mwimaniji mpingakani.

Mwanda waka bengidi ba Yehova bādi bakulupile amba batangidiji ne bengidi bonso ba Watch Tower Bible and Tract Society of Pennsylvania bafwaninwe kwikala bene Kidishitu bashingwe-māni? Mwanda mu kine kitatyi’kya bādi balanga amba batangidiji ne bengidi ba kitango kya Pennsylvania bafwaninwe kwikala’nka boba badi mu Kitango Kyendeji kya Batumoni ba Yehova, kibundilwe kyonso’nka na bana-balume bashingwe māni a mushipiditu.

Kupwila kwa mwaka kushele mu mānga

Ku kupwila kwa mwaka kwāpwidilwe mu mafuku 2 Kweji 10, 1944, mu Pittsburgh, batutu ba mu kitango kya Pennsylvania bātyipile nkwembo isamba mituntulu yāshintyile mukanda wakyo wa bijila. Uno mukanda wa bijila wādi unena’mba boba bavota i enka batūdile byabuntu bya mukōlo ku mwingilo wa Sosiete, ino busenduludi bwa busatu bwāfundula ino mpangiko. Lapolo wa kupwila kwa mu mwine mwaka’wa wānena’mba: “Bantu babadilwa mu Sosiete kebafwaninwepo kuvula kupita pa 500 . . . Yense utongelwe ufwaninwe kwikala mwingidi wa Sosiete wa kitatyi kyonso nansha mwingidi wa kitatyi kifikile wa kisumpi [kipwilo] kya Batumoni ba Yehova, kadi ufwaninwe kulombola mushipiditu wa Mfumwetu.”

Kupwa, batangidiji ba Sosiete bādi ba kuvotwa mu mwingilo na bantu bepāne byabinebine kudi Yehova, pambulwa kubanga buvule bwa lupeto lobatūdile mwanda wa kwendeleja mwingilo wa Bulopwe kumeso. Kino kyāikele kukwatañana na kwenda kulumbuluka bityebitye kwa muludikilo kwālailwe mu Isaya 60:17, amba: “Nkapingakanya nsahabu pa mukuba, ne ndalama pa lubwe, ne mukuba pa mutyi, ne lubwe pa mabwe; nkapa [batadi] bobe ndoe, ne [ba kupāñana mingilo] bobe ke boloke.” Buno bupolofeto bwa ‘batadi’ ne ‘ba kupāñana mingilo’ bwādi bufunkila pa kulumbulula miludikilo ya bulongolodi budi’mo bantu ba Yehova.

Dino ditabula dikatampe mu kutwala bulongolodi mu ndudi ya kiteokratike dyātabwilwe ku mfulo kwa “tununu tubidi ne tutwa tusatu [twa] byolwa ne bibanga” tutelelwe mu Danyele 8:14. Pa kyokya kitatyi, “kipandulwamo” kyāikala ‘kujokejibwa mu ngikadilo yakyo.’

Nansha byāpwile kupwila kwa mwaka kwa mu 1944 kushele mu mānga, inoko kwādi kukidi bipangujo bya mvubu mikatampe. Kitango Kyendeji byokyādi kikiyukena nakampata ku batangidiji basamba-babidi ba kitango kya Pennsylvania, lelo ko kunena’mba kekwādipo muswelo wa Kitango Kyendeji kubundwa’kyo na bene Kidishitu bashingwe-māni bavule kupita pa basamba-babidi? Pakwabo kadi, batangidiji byobadi batongwa’nka na ba mu kitango kya Pennsylvania, lelo ba mu kino kitango bo badi ba kutonga ba mu Kitango Kyendeji ku kupwila kwa mwaka ne mwaka? Lelo batangidiji ne bengidi ba Watch Tower Bible and Tract Society of Pennsylvania i bantu bamo bonka babundile Kitango Kyendeji’ni, nansha i beshile?

Kupwila kukwabo kwa mwaka kekudi mwa kwidilwa

Bino bipangujo byālondolwelwe ku kupwila kwa mwaka kwāpwidilwe mu difuku 1 Kweji 10, 1971. Ku kuno kupwila, muneni umo wānene amba kitango kyendeji kya “umpika wabinebine ne wamanwa” kyābadikile kwikala’ko tutwa twa myaka, kumeso kwa Watch Tower Bible and Tract Society of Pennsylvania. (Mateo 24:45-47, NW) Kitango kyendeji kyābundilwe mu difuku dya Pentekosa mu 33 K.K., kintu kya myaka tutwa 18 ne musubu kumeso kwa kitango kya Pennsylvania kwikala’ko. Ku ngalwilo, kitango kyendeji kyādi na bana-balume 12, kebādipo 7. Mobimwekela, kibalwa kyabo kyāvudijibwe mwenda mafuku, mwanda twivwana amba “batumibwa ne bakulumpe” bādi baludika mu Yelusalema.​—Bilongwa 15:2, MB.

Mu 1971, muneni umo yenka wāshintulula amba boba babadilwa mu Sosiete Watch Tower kebafwaninwepo kuvota banabetu bashingwe-māni ba mu Kitango Kyendeji. Mwanda waka? “Mwanda,” mungya mwaānenene, “kitango kyendeji kya kabumbo ka ‘umpika’ kekitoñwangapo na muntu shi ani shi ani. Kitoñwanga na . . . Yesu Kidishitu, Mutwe wa kipwilo kyabine kya bwine Kidishitu, Mfumu Mwinē kabumbo ka ‘umpika wabinebine ne wamanwa.’ ” Papo kyāmweka patōkelela amba ba mu Kitango Kyendeji kebadipo mwa kuvotelwa mu mingilo na ba mu kitango kiyukene mungya bijila bya Leta nansha kimo.

Muneni wābwejeje’ko bino binenwa bya mvubu mikatampe amba: “Kitango kyendeji kekidipo na mabilo a bengidi pamo na mwikadile nao kitango kya Batangidiji ba Sosiete, kifwa, mwimaniji, mwimaniji mpingakani, mulembi kadi mubiki wa lupeto ne mukwashi wandi. Ino kikalanga’nka na mwendeji wa kwimanina kupwila.” Myaka mivule, mwimaniji wa kitango kya Pennsylvania ye enka wādi kadi utangidila kumeso mu Kitango Kyendeji. Ino pano kebikikekalapo uno muswelo. Ba mu Kitango Kyendeji nansha byokebadipo na bwino ne bukomo bumo, bafwaninwe kwikala mu ludingo lumo mu myanda itala biselwa. Muneni wābweja’ko amba: “Yewa yense ubadilwa mu kitango kyendeji ukokeja kwikala mwendeji pambulwa kwikala mu kitatyi kimo kyonka mwimaniji wa . . . Sosiete . . . Byonso bikalonda mungya mwishintyilo wa bwendeji mu kitango kyendeji.”

Ku kuno kupwila kwa mwaka kwa mu 1971 kekudi mwa kwidilwa, kwishila kwishidile banabetu bashingwe-māni ba mu Kitango Kyendeji na batangidiji ba mu kitango kya Pennsylvania kwālombwelwe patōka. Ino ba mu Kitango Kyendeji bādi bakyendelela na kwingila bu batangidiji ne bengidi ba Sosiete. Dyalelo, bipangujo i bino: Lelo kudi buluji kampanda bwimanine pa Bisonekwa bulombola amba batangidiji ba Watch Tower Bible and Tract Society of Pennsylvania banenwe kwikala ba mu Kitango Kyendeji?

Kilondololwa i mhm. Kitango kya Pennsylvania ke kitango kimopo kete kiyukene mungya bijila bya Leta kingidijibwa na Batumoni ba Yehova. Kudi bitango bikwabo. Kimo bidi i Watchtower Bible and Tract Society of New York, Incorporated. Kipēlejanga yetu mingilo mu États-Unis. Madyese a Yehova eselwa kino kitango i mamweke nansha byokyendejibwa na batangidiji ne bengidi bavule ba mu “mikōko mikwabo.” Mu Beletanye mwingidijibwanga kitango kikwabo kya International Bible Students Association. Bitango bikwabo biyukene mungya bijila bya Leta bingidijibwanga mwanda wa kwendeleja kumeso tumweno twa Bulopwe mu matanda makwabo. Bino bitango byonso bingidilanga mwa kimo, kadi bidi na kiselwa kya kusambakanya busapudi bwa myanda miyampe ntanda yonso. Kadi konso kobitanwa, bikale biludikwa na batangidiji’ka nansha na bengidi’ka, bilondanga ndudi ya kiteokratike ne kwingidijibwa na Kitango Kyendeji. O mwanda bino bitango bipelwe biselwa bya kwendeleja tumweno twa Bulopwe kumeso.

Kwikala na bino bitango biyukene mungya bijila bya Leta kudi na kamweno kotudi. Bitukwasha tulonde bijila bya ntanda nansha bya kifuko kyotudi’mo monka mwitusoñaninya Kinenwa kya Leza. (Yelemia 32:11; Loma 13:1) Bitukwashanga mu mwingilo wetu wa kusambakanya musapu wa Bulopwe na kutampa mabuku, kifwa Mabible, bitabo, mapepala, mikanda ne bikwabo. Bino bitango bitukwashanga mu kupwija myanda ya bintu byotutelelwa, bukwashi butuminwanga basusuka, bifuko bya kulongela’po bitango, ne bikwabo. Tufwijanga’ko pa mwanda wa mingilo yonso ingila bino bitango.

Dijina dya Yehova kyo kintu kitangidijibwe kumeso

Mu 1944, Mwanda II mu mukanda wa bijila wa Watch Tower Bible and Tract Society of Pennsylvania wāsendulwilwe mwanda wa kukokela milangwe pa bitungo bya kino kitango. Mungya munenena uno mukanda wa bijila, kitungo kibajinji kya Sosiete i kino: “Kusapula evanjile ya bulopwe bwa Leza buludikwa na Kidishitu Yesu ku mizo yonso bu bukamoni bwa dijina, kinenwa, ne bukatampe bwa YEHOVA Leza Mwinē Bukomo Bonso.”

Tamba mu 1926 “umpika wabinebine” i mutangidije kumeso dijina dya Yehova. Nakampata mu 1931 pāitabije Befundi ba Bible dijina dya bu Batumoni ba Yehova. (Isaya 43:10-12) Mu mabuku a Sosiete akokelanga milangwe pa dijina dya Leza mubadilwa ne bino bitabo: Jéhovah (1937), “Que ton nom soit sanctifié” (1964), ne “Les nations sauront que je suis Jéhovah” — Comment ? (1974).

Kintu kyoketwilwapo kutela i Bible Les Saintes Écritures Traduction du monde nouveau, wālupwilwe yense mutuntulu mu Angele mu 1960. Dijina dya Yehova ditanwa’mo ponso padi Masomo Aná mu Bisonekwa bya Kihebelu. Buno bwalamuni i bwaluje kadi dijina dya Leza mu bifuko 237 mu Bisonekwa bya Kingidiki bya bwine Kidishitu ponso palombwele bubandaudi amba kedidipo mwa kubudilwa’dyo kwikala’po. Bine, tufwijei’ko Yehova pa kupa “umpika” ne kyandi Kitango Kyendeji ñeni ya kwingidija mu miswelo pala pala mabuku ne bitango biyukene mungya bijila bya Leta mwanda wa kuyukanya dijina dyandi ntanda yonsololo!

Kwabanya Kinenwa kya Leza kubaloe

Bantu ba Yehova basapulanga nyeke dijina dyandi ne kukwatakanya Kinenwa kyandi na kulupula ne kwabanya midiyo ne midiyo ya mabuku esambila pa Bible, ne Bible mwine kumo. Ku ngalwilo kwa myaka ya 1900, Sosiete Watch Tower wāpelwe lupusa lwa kutampa Bible The Emphatic Diaglott, wa Benjamin Wilson, bwalamuni bwa Bisonekwa bya Kingidiki bya bwine Kidishitu bwa mulongo ne mulongo wa mu Kingidiki mu Angele. Sosiete wālupwile kadi King James Version, bwalamuni bwa Befundi ba Bible bwādi na mapaje a mbwejo 500. Mu 1942, wālupula King James Version na bushintuludi kufula kwa dyani. Ebiya mu 1944, Sosiete wāshilula kutampa Bible American Standard Version wa mu 1901, mudi dijina dya Leza. Dijina dya Yehova dyādi ditanwa kadi ne mu The Bible in Living English, wa Stephen T. Byington, wālupwilwe ne na Sosiete mu 1972.

Bitango biyukene mungya bijila bya Leta bingidijibwa na Batumoni ba Yehova bikwashanga mu kutampa ne kwabanya ano malamuni a Bible onso. Inoko kintu kyotwanya nakampata i kwingila kwingilanga kitango kya Sosiete Watch Tower kakasa kakasa na kisumpi kya Batumoni ba Yehova bashingwe-māni babundile Komite Wimanine Bwalamuni bwa Bible bwa Ntanda Impya. Tudi na nsangaji mpata, mwanda panenwa pano ke kutampwe Mabible 106 400 000 ne kupita, matuntulu nansha bipindi a buno bwalamuni mu ndimi 38. I bine, Watch Tower Bible and Tract Society of Pennsylvania i sosiete ya Mabible!

“Umpika wabinebine” ‘upelwe kipango kyonso kudi mfumwandi.’ Mu kino kipango mubadilwa mobo adi ku kitako kimanine mingilo kidi mu New York State, Amerika, ne mobo a misambo 110 engilwa’mo dyalelo ntanda yonso. Banabetu badi mu kabumbo ka umpika bayukile amba bakeshintulwila kudi Mfumwabo pa muswelo obengidija bino bintu byonso byobapelwe. (Mateo 25:14-30) Ino kino ke kintupo kibwanya kulekela “umpika” kupa batadi babwenye bisakibwa ba mu “mikōko mikwabo” biselwa bya bwendeji ne buludiki biyukene mungya bijila bya Leta. I amo, kino kisa kushila banabetu badi mu Kitango Kyendeji kyaba kya kwipāna “ku milombelo ne ku kufundija kwa myanda.”​—Bilongwa 6:4.

Kitango Kyendeji kimanine “umpika wabinebine ne wamanwa” kikengidija bitango biyukene mungya bijila bya Leta kitatyi kyonso monka mwendela ngikadilo ya ntanda. Bino bitango bidi na bukwashi, inoko ke abyopo bikwete mwingilo. Nansha shi kitango kampanda kiyukene mungya bijila bya Leta kibaipaibwa na kijila kya Leta, busapudi abo bukendelela nyeke. Nansha ke pano, mu matanda mudi kukankajibwa, ne bitango bya kwingidija bine mutupu’byo, musapu wa Bulopwe usapulwanga’mo, bana-babwanga balongwa, ne kutanta kwa mingilo ya kiteokratike kwendelela nyeke kumeso. Bino byonso bilongekanga mwanda Batumoni ba Yehova bakunanga nkunwa ne kusangila’yo mema, ino ‘Leza mwine ye utamijanga’yo.’​—1 Kodinda 3:6, 7.

Pano potukitengele myaka īya kumeso, tukulupile amba Yehova kakabulwepo kupa bantu bandi bisakibwa byabo bya ku ngitu ne bya ku mushipiditu. Aye ne Mwanandi Yesu Kidishitu bakendelela nyeke na kwitupa buludiki butamba mūlu ne kwitukwatakanya mwanda wa tuvuye mwingilo wa kusapula Bulopwe. Bine, byonso byotulonga batwe bengidi ba Leza ketuloñanga’byopo na ‘bukomo nansha na bukomokomo, poso’nka na mushipiditu wa Yehova.’ (Zekadia 4:6) Shi ke pano, tulomba Leza etukwashe, mwanda tuyukile amba na bukomo bupāna Yehova, tubwanya kupwija mwingilo waetupele kwingila mu kino kitatyi kya ku mfulo kino!