Kukumba Luombe Lwa Leza Umbumo

Bamo-bamo beipangulanga’mba: ‘Kipwilo kya ba Tumoni twa Yehova kujokoloka ntanda yonso lelo kyendejibwanga namani?’ Twibalondolola’mba: Bwendeji bwa mingilo bulondanga enka kimfwa kya kipwilo kya bwine-kristu kya mu myaka katwa imbajinji.

Mu myaka ya 1870, Charles T. Russell ne balunda nandi bāshilwile kusambakanya konso konso bubinebine bobādi basokola mu bwifundi bwabo bwa Bible kupityila ku busapudi ne ku mikanda mitampwe. Mu ntanda yonso, boba bāitabije kwilunga ku uno mwingilo bādi bakulupile Russell ne bakwabo bādi bengila nandi pamo amba kyo kitango kya bana-balume bapotolwele bininge mwa kwingidila mwingilo wa Mfumwetu ne amba ko kwa kukimba madingi atala mingilo yabo.

Mu myaka ya 1884, kitango kya Zion’s Watch Tower Tract Society kyāpebwa lupusa mungya bijila na bulongolodi bwa Commonwealth bwa mu Pennsylvania. Russell ne bemaniji bakwabo bādi bengila nandi, ye abo bādi bemanine byabinebine mwingilo wa kwendeja ino Sosiete senene ne mingilo ya Befundi ba Bible. Mu 1909 bāvilwila kitako kya mingilo yabo ku Brooklyn mu New York. Bemaniji ba Sosiete Watch Tower ne bakwabo bobengidila nabo pamo, i bana-balume bashingwe-māni babwanye bisakibwa bya kumushipiditu, bengilanga bu kitango kyendeja mingilo ya ba Tumoni twa Yehova umbula bwa myaka mivule.

Kitango Kyendeji i kibundwe na kibumbo kya bakristu bana-balume bashingwe-māni (mu 1992 bādi 12) kubadila’mo ne bantu 7 bengila mingilo ya buludiki bwa mingilo ya Sosiete Watch Tower. Bano bo bemanine mingilo ya ba Tumoni twa Yehova kujokoloka ntanda yonso. Kitatyi kyobesambanga, kebatentamwangapo na mushipiditu wa Leza, mhm, omwanda bakokeja kwiluba, inoko bemanine pa Kinenwa kibwaninine kya Leza amba kyo akyo kidi na lupusa lutabukile byonso pano pantanda, kadi badi na bwino butamba ku kulāla myaka mivule mu kukōkela ku kiswamutyima kya Leza. Umo ne umo umbukata mwabo kemupityije kubwipi kwa myaka 50 mu mwingilo wa kitatyi kyonso na ba Tumoni twa Yehova.

Kitango Kyendeji ye akyo kitala mabuku onso alupulwa na Sosiete. Byonso bilembwa, bimanine pa kulondolola ku bisakibwa bya kumushipiditu bya luombe, kadi i bipa bitamba ku bwifundi ne ku kukimbakimba mu Kinenwa kya Leza ne milombelo pamo. Bano bana-balume byobendelelanga nyeke na kwifunda Bible, na kubandaula muswelo wenda ulongeka mpango ya Leza, kufikidila kwa bupolofeto mu myanda ipita pano pantanda ne ngikadilo idi’mo bantu ba Leza, kyaba kimo bakokeja kumona’mba kifwaninwe kulemununa mwivwanino nansha lufundijo kampanda ne kuleta’po bujadiki bupya mungya kitōkeji. Mu uno muswelo, buyuki butala pa bubinebine bwendanga bwilundila’ko.—⁠Mitōto 97:11; Nkindi 4:18; Danyele 12:⁠4.

Kitango Kyendeji i kitūle’ko Komite wa Musambo ubundilwe na bana-balume basatu nansha ne kupita, babwanye bisakibwa bya kumushipiditu, mwanda wa kutala mingilo mu umo ne umo wa mu misambo 100 ne kupita idi pano pantanda, itala mingilo mu matanda 200 ne kupita ne bisanga kumo. Ino misambo isambulwilanga mawi na bipwilo bidi munshi mwa bulami bwayo. Makomite a Misambo esambulwilanga mawi kitatyi ne kitatyi na Kitango Kyendeji, kadi badi mu Kitango Kyendeji bekalanga benda ne kukapempula misambo mishileshile ku mwaka ne mwaka mwanda wa kuyuka myanda ipita’mo.

Bano bana-balume ke bamfumupo ba lwitabijo lwa bakwabo, ino i bengidi bengila bikomo mwanda wa bavule bakwabo nabo bayuke Kinenwa kya Leza. Kebengidilangapo kumwena’mo lupeto, ino bapebwanga bisakibwa byabo bya kungitu pamo’nka na mobipelwanga bengidi bonso ba mu bisaka bya Mabetele. Kiyukeno kilombola’mba bengilanga na kikōkeji i bupyasakane bwabo, bumo bwabo, mwiendelejo wabo ya bu-ujila, ne lulamato lwabo ku mfundijo ya mu Bible ilonda ba Tumoni twa Yehova kujokoloka ntanda yonso.

​—⁠1 Kodinda 3:​5-9; 4:​1, 2; 2 Kodinda 1:24; 3:​1-3; 1 Petelo 5:2, 3.

• I mpangiko’ka ya buludiki itūdilwe’ko?

• I bāni bengila mu Kitango Kyendeji dyalelo, ne badi na biselwa’ka?

• Mwingilo wendejibwanga namani mu matanda makwabo?

[Kapango pa paje 26]

Bemaniji bakala ba Sosiete Watch Tower

C. T. Russell, 1884-1916; J. F. Rutherford, 1917-1942

N. H. Knorr, 1942-1977; F. W. Franz, 1977-1992

● Matanda avuija’mo ba Tumoni twa Yehova kiswamutyima kya Leza

[Kapango pa paje 27]

Mabilo matyetye a mu misambo 100 ne kupita atala mingilo ya ba Tumoni twa Yehova ntanda yonso

Kanada, Zambia, Alemanye, Japon, Ostrali, Brezile