Lelo Ukokeja Kutandabula Mwingilo Obe?
1. Le i bika byotusaka na kampeja-bukidi mu mwingilo wa budimi, ne mwanda waka?
1 Yesu pa kumona kibumbo kya bantu kisangela myanda miyampe ya Bulopwe, wālombola bandi bana ba bwanga amba “lombelai bidi amba mwine byangulwa alundule bakuputumina mu byangulwa byandi.” (Mat. 9:37, 38) Netu byotudi ku mfulo ya mwangulo, mwingilo wetu ulomba kwingila na kampeja-bukidi kutabuka. Ko kunena amba tufwaninwe kulombela ne kwibandaula shi twingilanga ne pa mfulo mu mwingilo wa budimi.—Yoa. 14:13, 14.
2. Lelo bamo betabanga namani ku milombelo yotulomba bengidi bavule mu mwingilo wa budimi?
2 Mwa Kutandabwila Mwingilo: Bavule i babwanye kushilula mwingilo wa bu pania na bukwashi ne buludiki bwa Yehova. (Mit. 26:2, 3; Fid. 4:6) Bamo bekankilanga’ko kwingila bu pania mukwashi mu kweji umo nansha makweji mavule pa mwaka. Uno i muswelo mulumbuluke wa kutandabula mwingilo wabo. Dyese dyobamwena mu uno mwingilo i difikije bavule ku kwikala bu bapania ba lonso.—Bil. 20:35.
3. Shi waingile bu pania myaka kunyuma, lelo ubwanya kulangulukila pa bika?
3 Ubulwe’po Kujokela mu Mwingilo wa Bupania?: Shi waingile bupania myaka kunyuma, kubudilwepo kuvuluka byabuyabuya byowamwenine’mo kyokya kyaba. Le kodi mulanguluke ne kulombela ponka shi ubwanya kujokela mu mwingilo wa bu pania? Padi bikambija bya kulengeje uleke bu pania ke bipwe. Pano kodi padi na kitatyi kya kwikala monka na dino dyese dya pa bula.—1 Yoa. 5:14, 15.
4. Le i mukenga’ka wa pa bula otupelwe batwe bonso?
4 Mwingilo wa mwangulo pano ke usa kufula. (Yoa. 4:35, 36) Nanshi tubandaulei ngikadilo yotudi’mo tuyuke shi tukokeja kujadika mingilo yetu ya difuku ne difuku mwa kutambila bininge mu mwingilo wa budimi. Kadi shi ketukokejapo kutandabula mwingilo wetu, le tubulwe’po kukimba mikenga ya kulonga nansha bityetye mu uno mwingilo? (Mako 12:41-44) Bine, dino shadyo dyo dyese ku boba bonso badi mu ngikadilo ibapa mukenga wa kwingidijibwa na Yehova mu uno mwingilo wa pa bula!—Mit. 110:3.