“Wiye Unonde”
1. Le i bika byotusa kumwena mu Kifundwa kya Bible kya Kipwilo mu makweji aya’ko?
1 Maevanjile aná asekununa būmi bwa Yesu bwa pano panshi bulombola mwine mwādi mwikadile Mwanā Leza. Bene Kidishitu banenwe ‘kumulonda mu mayo andi,’ o mwanda tusaka kwiteakanya biyampe mwa kulondela na katentekeji potukefunda dibuku “Wiye Unonde” mu Kifundwa kya Bible kya Kipwilo, kikashilula kwifundwa mu yenga ushilula na difuku 1 Kweji 3 mu ndimi imo. (1 Pet. 2:21; Mako 10:21) Bubandaudi bwa pa bula bwa ngikadila ya būmi bwa Yesu bubwanya kwitukankamika mu mwingilo.
2. Le i bika byotumwena mu kimfwa kya Yesu kya kūminina?
2 Kimfwa Kishile Yesu: Lelo kashā kebakulondolwele bibi mu busapudi bwa ku njibo ne njibo? Kitatyi kyobetupela uno muswelo, tukavuluka binenwa bya Yesu bya amba: “Monka mo bampangilapangila ami ne bānwe nenu mo monka.” (Yoa. 15:20) Shako na bubine, kulondololwa bibi konso kekushintululapo kupangwapangwa. Inoko Yesu, nsangaji yādi mimutūdilwe kumeso yamukweshe ōminine masusu ne matompo a miswelo yonso. Batwe netu, tufwaninwe kumona mu ñeni muswelo usepelela Yehova na kwitwitabija ne mpalo yawitupala pangala pa kikōkeji kyetu. Kino kiketukwasha kutyina’mba ‘twakēnda tukōka ne kupungila pa mityima yetu.’ (Bah. 12:2, 3; Nk. 27:11) Kadi ponso potūminina mu mwingilo, tukakulupila amba Kidishitu Yesu uketukwasha.—Mat. 28:20.
3. Le tukeula Yesu namani pa muswelo waādi umona mwingilo?
3 “I Akyo Kyonka kyo Natalwilwa”: Yesu wādi utūdile mwingilo wa busapudi pa kifuko kibajinji mu būmi bwandi. (Luka 4:43) Wādi wiēlelele bininge mu mwingilo. Wādi wiumwene bu wa kampeja-bukidi, o mwanda wādi ukimba mikenga yonso ya kwisambila pa Bulopwe. Byotudi balondi ba Yesu, lelo kulonda mu mayo andi kuketutwala kwepi? Lelo kokwa kotwibidile kwenda mobukila mobukila kudi bantu botubwanya kusapwila myanda miyampe? Bine, buswe bwa Kidishitu bwituningila tusapule kutabukididila myanda miyampe mu kwabanya tukanda twa lwito!—2 Kod. 5:14.
4. I muswelo’ka otubwanya kulumbulula musapwilo wetu?
4 “Kutupu Muntu Wakunena Namino”: Mufundijijo wa Yesu wādi utulumuna bemvwaniki bandi. (Yoa. 7:46; Mat. 7:28, 29) Le i bika byāmushiyañenye na bafundiji bakwabo? Wādi usenswe bubinebine bwaādi usapula, bantu baādi usapwila, ne kwingidija manwa mavule mu bufundiji. Tukokeja kulumbulula musapwilo wetu na kwiula Mufundiji Mukatampe.—Luka 6:40.
5. Le tufwaninwe kwikala na kitungo’ka potwifunda dibuku “Wiye Unonde”?
5 Bino i byabupeta bimobimo’tu bitusokwedilwe pangala pa būmi bwa Yesu. Le i byabupeta’ka bikwabo byokokeja kutana? Pokenda ubandaula būmi bwa Yesu mu Kifundwa kya Bible kya Kipwilo, witūdile’ko kitungo kya ‘kuyuka abo bwine buswe bwa Kidishitu’ na kwiula binenwa ne bilongwa byandi.—Ef. 3:19.