Bengidi Bene Kidishitu Bafwaninwe Kulombela
1. Le i kika kyotusakilwa pa kwingila mwingilo wetu?
1 Ketubwanyapo kwingila mwingilo na bukomo bwa batwe bene. Yehova ye witupanga bukomo bwa kwingila. (Fid. 4:13) Witukwashanga kupityila ku bamwikeulu bandi amba tutane bantu badi bwa mikōko. (Kus. 14:6, 7) Yehova ye utamijanga nkunwa ya bubinebine yotukuna ne kusangila mema. (1 Kod. 3:6, 9) Bine, i biyampe bengidi Bene Kidishitu banyemene kudi Tata wetu wa mūlu kupityila ku milombelo!
2. Le i bintu’ka bimobimo byotukokeja kulomba mu milombelo?
2 Batwe Bene: Tufwaninwe kulombela kitatyi kyonso kyotusapula. (Ef. 6:18) Le i bintu’ka bimobimo byotukokeja kulomba mu milombelo? Tukalomba amba twikale kumona mwaba wetu senene ne kwingila pakubulwa moyo. (Bil. 4:29) Tubwanya kulomba Yehova etuludike ku bantu ba mityima myoloke botukokeja kwifunda nabo Bible. Shi otwisamba nandi wetwipangula kipangujo, tukokeja kulombela milombelo mīpi ya mundamunda amba Yehova etukwashe tulondolole biyampe. (Neh. 2:4) Tukalomba kadi ñeni ya kubadikija kumeso mwingilo. (Yak. 1:5) Kadi, Yehova usangalanga shi tumufwija’ko mu milombelo pa dyese dya kwikala bengidi bandi.—Kol. 3:15.
3. Le kulombela pa mwanda wa bakwetu kwendejanga kumeso mwingilo wa busapudi namani?
3 Bakwetu: Tufwaninwe kadi “ne kwilombelela,” pakwabo ne kutelelela’tu majina a bengidi netu pokifwaninwe. (Yak. 5:16; Bil. 12:5) Lelo misongosongo ikukankajanga kulonga byowadi ubwanya mu mwingilo wa busapudi? Nankyo lombela pa mwanda wa bengidi nobe badi na bukomo. Kokatyepeka bulēme bwa milombelo yowibatela’mo! Kadi i kyendele’mo kulombelela ne bakatampe ba lupusa bamone biyampe mwingilo wetu wa busapudi amba banabetu bamone “mwakwikadila biyampe, talala, nyā, nyā.”—1 Tem. 2:1, 2.
4. Mwanda waka tufwaninwe kushikilwa monka mu milombelo?
4 Kusapula myanda miyampe pa ntanda yonso ke mwingilopo upēla. Shi ‘tushikilwe monka mu kulombela,’ tukengila mwingilo na bukwashi bwa Yehova.—Loma 12:12.