Ingidija’ye Kyaba Kyonso
1. Lelo trakte Kuyuka Bubinebine ukwashanga pa kulonga bika?
1 Trakte Lelo Usaka Kuyuka Bubinebine? i mulupulwe mwanda wa kwitukwasha pa kushilula bifundwa bya Bible. Ino kadi i kingidilwa kya mvubu kyotukokeja kwingidija pa kukusa nkunwa ya bubinebine. (Mus. 11:6) Tala pano madingi amo aketukwasha twingidije’ye biyampe.
2. Le tukengidija namani trakte pa kushilula mīsambo?
2 Pa Kushilula Mīsambo: Ukokeja kupa mwisambi nobe trakte, wamufunka bipangujo bisamba bidi pangala, komwipangula’mba: “I kipangujo’ka pa bino kyowiipangulanga abewa?” Pa kupwa kuteja malondololo andi, bandaula mu trakte malondololo aleta Bible ku kipangujo kyatonga mwisambi, utange ne kisonekwa kimo mu bitelelwe. Tanga nansha kunena mu kīpi bidi pa paje wa mfulo, ebiya mupe dibuku Bifundija Bible. Nansha shi ketabijepo dibuku, watambulanga kala trakte, ubwanya kulengeja bubinebine bwale miji mu wandi mutyima.—Mat. 13:23.
3. Shi mwisambi netu kadipo na kyaba, le tukalonga’po namani?
3 Shi Mwisambi Nobe Kadipo na Kyaba: Ukokeja kunena’mba: “Kitatyi byokidi kibi, nsaka nkushile uno trakte. Mudi bipangujo bikatampe bisamba biipangulwangwa divule, kadi uleta malondololo a Bible ku kipangujo ne kipangujo. Potusa kwimona monka, nsaka ndyuke molangila’po.”
4. I bika byotukokeja kunena potupāna trakte mu busapudi bwa mu bipito?
4 Potusapula mu Bipito: Ukokeja kunena’mba: “Wakomapo. Le kodi mwiipangule kipangujo nansha kimo pa bino’bi? [Muleke alondolole.] Uno trakte uleta malondololo apēla kadi asangaja atanwa mu Bible.” Shi muntu’wa keyumbilangapo, mukokeja kwisambila pa malondololo amo mu adi mu trakte penepa ke kumupa dibuku Bifundija Bible.
5. Le i muswelo’ka otubwanya kwingidija trakte ku mobo kwampikwa bantu?
5 Ku Mobo Kwampikwa Bantu: Mu myaba imo, basapudi bebidile kushiya mabuku ku mobo kwampikwa bantu, kepamonwepo na bapita. Shi ye mo mulongelanga ne mu kyenu kipwilo, mwabulwa’po kushiya trakte Kuyuka Bubinebine? Polonga kujokela’mo, ukokeja kunena’mba: “Kitatyi kyotwapityile dibajinji, kwadipo’po, o mwanda twashile uno trakte munshi mwa obe mulango. I kipangujo’ka pa bino kyosaka uyuke malondololo?”
6. I kika kilengeje trakte Kuyuka Bubinebine ekale kingidilwa kya mvubu mu busapudi?
6 Trakte Kuyuka Bubinebine wisambila pa bubinebine mu muswelo upēla, kadi wivwanikwa. Usangajanga bantu ba mitōtelo ne bibidiji byonso. Upēla kupāna; nansha ke bana ne basapudi bapya bene babwanya kupāna’ye. Le wingidijanga’ye mu kyaba kyonso kifwaninwe?