Bine Tudi na Kingidilwa Kipya kya Kushilula Nakyo Bifundwa!
1 Mwana-mukaji umo mwine Amerika wadi mwine Katolika Loma mwipāne. Wadi ubingija nyeke bufundiji bwa kyabo kipwilo. Wakatyimpa’nka ne lwayo mu Vatika. Ino difuku dyafikile Kamoni wa Yehova umo ku kyandi kibelo, waitabije kifundwa kya Bible kya ku njibo. Mwanda waka? Mwanda wadi usaka kuyuka binena Bible, ino kyabo kipwilo kekyadipo kifundija bantu kifundwa kya Bible kya ku njibo. Lelo uno mwanda mumweke usa kwitufundija kintu’ka? I kino: Ketudipo mwa kuyukila i wepi umo uketabija kifundwa kya Bible kya ku bitupu.—Mus. 11:6.
2 Lelo kashā kwekakile kunena bantu amba nsakanga kwanza kwifunda Bible na yewa yense usangela’ko? Lelo bantu bonso ba mwenu bayukile amba tukimbanga ba kwifunda nabo kino kifundwa kya ku bitupu? Le tusa kuyuka namani amba nabo basangela’ko? Bine, tusa kuyuka na kwingidija kingidilwa kimo kipya! I trakte usangaja, wa mapaje asamba udi na mutwe wa mwanda unena amba Aimeriez-vous en savoir plus sur la Bible ? (Lelo Nobe Usaka Kuyukila’ko Bintu Bivule Bitala pa Bible?) Tubandaulei bidi uno trakte, kamutwe ka mwanda kamo ne kamo.
3 “I Kika Kisakilwa Kutanga Bible?” Uno trakte uleta buluji bukoka bantu mpata. Ushintulula amba Bible udi na “bufundiji bupāna Leza na buswe,” bulombola muswelo wa kumufwena mu milombelo ya kulomba bukwashi ne mwa kumwena kyabuntu kyandi kya būmi bwa nyeke. (1 Tes. 2:13) Uno trakte i mutenge myanda mivule ya “bubinebine buleta kitōkeji” budi mu Bible, kifwa ya kuyuka kwendanga bantu pobafwanga, ne kikadile’ko kavutakanya kavule pano pa ntanda. Ulombola “misoñanya ya Leza idi mu Bible” iletelanga boba bengidija’yo byabuyabuya bya ku ngitu, būmi bwa nsangaji, lukulupilo ne ngikadilo mikwabo yanibwa. Uno trakte utenga kadi buluji bukwabo buneñanine kutanga Bible—bupolofeto bwa būmi bwa kumeso bulombola mwikadile bintu bitukungila kumeso’ku.—Kus. 21:3, 4.
4 “Bukwashi bwa Kwivwanija Bible”: Uno trakte unena’mba: “Batwe bonso tusakilwa bukwashi bwa kwivwanija Kinenwa kya Leza.” Kupwa ushintulula mwifundilo wetu wa Bible, amba: “Pavule i kipite buya kwifunda Bible mungya matabula, kushilula na bufundiji bwa kyalwilo.” Uno trakte, nansha byanena pakubulwa kafinda amba “Bible ye kapwabijo,” ulombola patōka amba boloshile Kisaka Leza ubwanya kukwasha mwifundi ‘emvwanije Bisonekwa biletelwe pa myanda mishileshile.’ Kamutwe ka mwanda kalonda’po kalangula kipangujo kimo kikabe.
5 “Le Nobe Usangelanga Kupityija’ko Kitatyi ku Yenga ne Yenga mu Kwivwanija Bible?” Uno trakte ushintulula amba kifundwa kya Bible, kikale kya pa kasuku, kikale kya ku njibo, nansha ke kya ku telefone, i kipite buya kwitungila’kyo pa kitatyi ne kifuko kifwaninwe mwifundi. I ani ubwanya kulondolola pa mīsambo? Uno trakte ulondolola amba i “kisaka kyenu kyonsololo. Balunda nobe bo-bonso bosangela kwita babwanya nabo kulondolola’po. Nansha kadi shi usakile, mīsambo ibwanya kwisambwa’nka na abe’wa kete.” Lelo kifundwa kimo kibwanya kwija nsaa inga? Uno trakte ushintulula’mba: “Bavule betūdilanga nsaa umo ku yenga ne yenga wa kwifunda Bible. Shi ubwanya kupityija kitatyi kilampe nansha shi kitatyi i kikutyepele ku yenga ne yenga, Batumoni abo bene bakalonga bukomo bwa kukukwasha’ko.” Bine kintu kipēlejanga bino byonso kidi’ko! Tusangelanga kusendulula mpangiko yetu mungya ngikadilo ya mwifundi ne mwifundi.
6 “Lwito lwa Kwifunda”: Kudi kapindi katyibwa kaletelwe kabwanya yewa upelwe trakte kulomba nako boloshile Kisaka Leza nansha bupempudi bwa kushintulwilwa mpangiko yetu ya kifundwa kya Bible kya ku njibo kya ku bitupu. I palombolwe ne kibalu kyonso kya boloshile Kisaka Leza monka mokikadile. Mwene ubaivwana kinenenwa amba uno trakte kakabulwepo kukwasha bantu bavule ba mityima myoloke nabo betabije bukwashi botusaka kwibakwasha? Penepo, i muswelo’ka otukokeja kwingidija senene kino kingidilwa kipya?
7 I Bāni Bokokeja Kupa Uno Trakte? Uno trakte ukokeja kutambikwa bantu abo bene nansha kushīlwa boba batanwa ku mobo kutupu’bo. Ukokejika kwabanibwa ku njibo ne njibo, mu bipito, ne mu myaba ya bya busunga. Pa’ye bantu, bekale bapelanga etu mabuku, nansha betabijanga’o, abe wibapa’ye bidi. Tweja’ye mu mapepala nansha mu mabuku makwabo apānwa. Vungila’ye mu mikanda yotumina ba kutumina. Laya boba bowisamba nabo ku telefone kwibatumina’ye. Wilamije kitatyi kyonso matrakte a kwabanya kitatyi kyodi mu kīkwe, kyoselwa mu byendwa nabyo, ne kyosapula busapudi bwa kiponka na ponka. Pa’ye muntu ye-yense wiya ku kyenu kibelo. Pa’ye bobe balongo, bekalwa-nabo, bengilwa-nabo, bomufunda nabo, ne bakwabo bomwiyukile nabo. Longa buninge bwa kushiya uno trakte mu makasa a muntu ye-yense otana! Kupwa ke kulonga bika?
8 Shi Abaitabija’ye Ponka na Ponka: Bantu bamo baketabija ponka na ponka kwifunda nabo Bible. Nanshi, kitatyi kyonso kyoputumina mu mingilo ya budimi, longa buninge bwa kwilamija nyeke maboloshile abidi a Kisaka Leza—umo wa mwifundi, mukwabo obe. Shi muntu’wa usangedile kifundwa, nankyo shilwididila nandi’nka ponka’pa. Pūtula munda mwa kibalu, mutange nandi “Muswelo wa Kwingidija Uno Mukanda.” Kupwa nyemena ku kifundwa 1, umulombole mwifundilwanga kifundwa. I kyepi kipēla?
9 Shi Mwisambi Nobe Usakilwa Kitatyi kya Kukalanga’po: Pokepaijije kitatyi kilampe, po pa kwielela’ko kukamutala’ko monka. Kumeso kwa kukamutala, wilamije boloshile Kisaka Leza. Mulombole kifunka kidi munda mwa kibalu. Muleke atonge mutwe wa mwanda umweka bu umusangaja kupita. Pūtula’po, mushilwididile nandi kwisambila pa kifundwa kyaatonga’kya.
10 Londa Boba Bapelwe Mapepala: Shi washidile muntu trakte pamo na mapepala, ubwanya kujoka na bino binenwa’mba: “Difuku dyotwemwene’dya, nasangele ponakushidile Kiteba kya Mulami. Padi wamwene amba mutwe wa mwanda onso mutuntulu wa dino dipepala i Kiteba kya Mulami Kisapula Bulopwe bwa Yehova. Dyalelo naila kukushintulwila mwikadile buno Bulopwe ne i bintu’ka byobukemulongela, abe’wa ne kyenu kisaka.” Kupwa pūtula boloshile Kisaka Leza pa kifundwa 6. Shilulai na musāngo umbajinji, mwenda mutanga, mwisambile’po mungya kitatyi kidi na mwisambi nobe. Kupwa mwipe nandi kilayeno kya kujoka difuku dingi dya kwiya kupwa nandi kifundwa.
11 Kemukibulwai Ano Matrakte: Mutadi wa mingilo ne batutu bemanine mwingilo wa mabuku bafwaninwe kulama kitatyi kyonso pa kipwilo kibalwa kibwanine kya uno trakte Aimeriez-vous en savoir plus sur la Bible ? Sela’ko amo mu ditumba nansha mu mpotomoni, mu motoka otelelwa, ku kaji, ku masomo, kubwipi na kibelo kutambilwa—po-ponso poapēla kusomonwa. Ne kadi, sela amo mu sakoshi obe wa busapudi a kukapāna shi ubasambakana muntu obwanya kwisamba nandi myanda ya mu Bible.
12 Yehova Etwesele mu Bukomo Botulonga: Kitungo kiyampe kya bene Kidishitu bonso i kufundija bubinebine ku bantu bakwabo. (Mat. 28:19, 20) Lelo ano mafuku nobe wendejanga kifundwa kya Bible kya ku njibo? Shi wendejanga’kyo, lelo kukokejapo kumona’ko kitatyi kya kwendeja kikwabo mu mpangiko yobe ya mu yenga? Shi pano kwendejangapo kifundwa, bine wabilanga amba shi nadi’po nakyo. Lomba Yehova akwesele mu bukomo bolonga bwa kusokola muntu obwanya kwifunda nandi. Kupwa, longela mungya milombelo yobe.—1 Yoa. 5:14, 15.
13 Bine tudi na kingidilwa kipya kya kushilula nakyo bifundwa! Wiibidije’kyo. Abanya’kyo pakubulwa kwishisa. Longa bukomo bobe bonso ulonge ‘biyampe, senene, mwa kwikadila mpeta mu mingilo milumbuluke, ne mutyima wa kupyasakana mu kupāna’ byobya byofundijibwanga pa mwanda utala Kinenwa kya Leza.—1 Tem. 6:18.
[Kapango pa paje 8]
BYABA BYA KUPĀNA UNO TRAKTE
◼ Mu mīsambo ya difuku ne difuku
◼ Petabija muntu dibuku dyetu
◼ Pabulwa muntu ku njibo
◼ Potwenda mu kujokela’mo kupya
◼ Potusambakana muntu mu busapudi bwa mu bipito
◼ Potusapula mu mwaba wa bya busunga
◼ Potusapula busapudi bwa kiponka na ponka
◼ Potutumina ba mikanda
◼ Potuselwa mu byendwa nabyo
◼ Pāya muntu ku kyetu kibelo
◼ Potwisamba na balongo, bekalwa-nabo, bengilwa-nabo, botufunda nabo, ne bakwabo botwiyukile nabo