Twingidijei Matrakte pa Kushilula Mīsambo
1 Mwene uyukile amba bukamoni bulupulanga bipa bilumbuluke i bobwa bwimanine nakampata pa bunwa bokwatanga bwa kushilula mīsambo? Kikomanga i kusokola bishima bya kunena muntu nandi asolokwe mutyima atwele mu mīsambo. Le i muswelo’ka otukokeja kwisamba na muntu bishima bibwanya kumusolokeja mutyima?
2 Basapudi bavule i bayuke amba kwingidija bishima bityetye ino abyo’ko bitongwe senene pa kupāna trakte mu matrakte otudi nao emanine pa Bible i kyalwilo kiyampe pa kushilula mīsambo. Mitwe ya myanda idi’mo i isangaja, ne bifwatulo nabyo monka na monka, bisombelwe na misombelo miyampe kutala’ko. Trakte kadipo na myanda mivule ibwanya kupungija muntu amba pa kusaka mpwe kutanga yoi yonso. Inoko misapu inenwe mu kīpi idi mu matrakte ikalanga nyeke isangaja bantu, tubwanya kushilula nayo bifundwa bya Bible.
3 Ivwana mwalangile’po kaka umo Kamoni: “Mu ino ntanda mivudilwe twaji, bantu kebakisakepo kushikata kijabanda usoma’nka kusoma, inoko matrakte adi na myanda mibwanine, abwanya kwibapa musapu wa mvubu pampikwa kwibapungija abo kebatangile’o. Ami natangile matrakte mavule, mwenda mafuku nafula ne ku kwifunda bubinebine.” Kokatyepeka bukomo bwa Kinenwa kya Leza kishintulwilwe mu kīpi mu ino misapu mitampwe.—Bah. 4:12.
4 Matabula Aná Apēla: Bavule balupulanga bipa bilumbuluke na kwingidija ntwelelo ipēla’tu. (1) Mulombole matrakte amo mu odi nao, ebiya umwipangule i wepi umusangaja’po. (2) Shi wapu kutonga’po umo, mwipangule kipangujo kyowadi uteakenye kitenga mulangwe umo mukatampe udi mu trakte. (3) Pa kulondolola ku kino kipangujo, tanga musāngo ukwañene nakyo nansha kisonekwa kampanda kidi mu trakte. (4) Shi wakulondolola biyampe, mwisambilei nandi pa myanda itanwa mu trakte nansha kunyemena ku mukanda Kisaka Leza nansha ku shapita umo udi mu dibuku Buyuki uletela’ko nshintulwilo mikwabo. Namino ubwanya kumufikija ku kifundwa kya Bible. Ano madingi alonda’ko abwanya kukukwasha witeakanye mwa kunenena pa kupāna ano matrakte aná.
5 Mutwe wa mwanda wa trakte unena’mba “Ino Ntanda Lelo Iludikwanga na Ani?” ukokeja kwipangulwa bu kipangujo.
◼ Shi yewa omwisamba nandi walondolola’mba i “Leza” nansha’mba “nkiyukilepo,” tanga nandi misemwa ibidi ya ñanjilo idi pa paje wa 2 ne musāngo umbajinji udi pa paje wa 3. Mushintulwile 1 Yoano 5:19 ne Kusokwelwa 12:9. Shi waitabija amba Satana Dyabola udi’ko nansha watatana amba kadi’kopo, nansha waitabija’mba Satana ye aye kalenga byanzwe bilongeka mu ino ntanda, ukokeja kwendelela nandi na mulangwe udi munshi mwa kamutwe ka mwanda kanena’mba “Kileta Makambakano mu Ino Ntanda” mwa kulungulukila na mīsambo yenu. Shi wasangela byomusapwila, mushintulwile kwatambile Dyabola i kwepi, ingidija myanda itanwa pa paje wa 3 ne wa 4 mu uno trakte.
6 Trakte unena’mba “Le tukokeja kukemona na bakena-betu bafwile?” ubwanya kulangula kusangela musapu kwa muntu. Tompa kushilula mīsambo na kino kipangujo:
◼ “Le ulanga’mba ketukikemonepo na bakena betu bafwile?” Shi wapu kukulondolola, sambukila ku musāngo ulonda’ko pa paje wa 4, utange ne Yoano 5:28, 29. Kupwa shintulula amba kino kitukwasha twivwanije kamutwe ka mwanda kabajinji kadi mu uno trakte. Papo musapwile amba usaka kwisambila’po nandi.
7 Trakte “Sepelelai mu Būmi bwa Nsangaji mu Kisaka” i trakte umo usangelanga bisaka mpata. Shi koingidija’ye, ubwanya kunena’mba:
◼ “Mobimwekela, nobe ubwanya kwitabija’mba kisaka kidi mu bulwi dyalelo. Le molangila i kika kibwanya kulongwa kikokeja kuningisha kipwano mu kisaka?” Shi wapu kulondolola, kokela milangwe yandi ku musāngo umbajinji pa paje wa 6. Tyakula’po kisonekwa kimo pa bidi mu trakte pa paje wa 4 ne wa 5, shintulula ne buluji bwakyo. Kupwa munene kwifunda nandi kifundwa kya Bible.
8 Mukokeja kwingidija Trakte “Mwanda waka kifwaninwe kukulupila mu Mukanda Ukola” na ino ntwelelo:
◼ “Bantu bavule ke bayuke mānga ya ba Kena ne Abele itanwa mu mukanda umbajinji wa Bible. Ino mānga idi mu Ngalwilo isekununanga ne myanda ya mukaja Kena. Le kasha kweipangwile i kwepi kwaātambile?” Shi koleta kilondololwa, ingidija musāngo wa mfulo udi pa paje wa 2. Shintulula’mba uno trakte wisambila ne pa nsekununi ya mu Bible itala pa būmi bwetu bwitutengele kumeso. Shilula na musāngo wa busatu udi pa paje wa 5, ingidija bisonekwa bimanine’po mwanda, kupwa endeleja mīsambo.
9 Kwabanya matrakte emanine pa Bible i mwingidilo wa tamba kala, ulupulanga bipa biyampe kyaba kisapulwanga myanda miyampe. Byoapēlanga kusela konso kotwenda, tubwanya kwingidija’o biyampe mu busapudi bwa ku kibelo ne kibelo ne mu busapudi bwa kiponka na ponka. Matrakte engilanga mwingilo mukatampe mu uno mwingilo wetu otwingila. Sela matrakte meshileshile, pāna’o ku buntu mwa kushilwila nao mīsambo.—Kol. 4:17.