Twingidijei Matrakte Mwanda wa Kusalaja Myanda Miyampe
1. Le i muswelo’ka waingidijibwe matrakte na bantu ba Leza?
1 Matrakte esambila pa Bible engidijibwanga tamba kala na bantu ba Yehova mwanda wa kusalaja myanda miyampe. Mu 1880, C. T. Russell ne bapwani nandi bashilwile kulupula Matrakte a Befundi ba Bible (Bible Students’ Tracts) kadi apelwe batangi ba Kiteba kya Mulami beabe ku bantu. Matrakte adi amonwa na mvubu mwanda mu 1884 C. T. Russell kitatyi kyaayukenye mungya bijila bya Leta kitango kyampikwa busunga na kitungo kya kutubulula tumweno twa Bulopwe, kishima “trakte” kyabwejibwe mu dijina Zion’s Watch Tower Tract Society, pano kitwanga bu Watch Tower Bible and Tract Society of Pennsylvania. Mu 1918, Befundi ba Bible baabenye matrakte midiyo 300 ne musubu. Matrakte akidi nyeke bu kingidilwa kifike’po kya kusapula nakyo.
2. Mwanda waka matrakte imafikile’po?
2 Kinenenwa Amba Imafikile’po: Matrakte adi na musombelo ne kadi akoka meso. Misapu inenwe’mo mu kīpi ikalanga nyeke isangaja ne iboilwa’ko ñeni. Asangajanga besambi netu badi na moyo wa kutanga mapepala etu nansha dibuku. Matrakte apēlanga kupāna nansha ke na basapudi bapya ne bana. Kadi Matrakte kealēmangapo, apēlanga kusela.
3. Sekununa mwanda mumweke owimwenine nansha wa mu mabuku ulombola mvubu ya matrakte.
3 Bantu bavule bayukile bubinebine kupityila ku trakte. Kimfwa, mwana-mukaji umo mwine Haiti wamwene trakte wetu umo mu dishinda. Waboya’ye, watanga, kupwa wanena amba, “Natana bubinebine!” Mwenda mafuku, waenda ku Njibo ya Bulopwe, washilula kwifunda Bible, ku mfulo wabatyijibwa—byonso bino pa mwanda wa bukomo bwa Kinenwa kya Leza bwaatene mu trakte.
4. Kitatyi kyotupāna matrakte bu kya kupāna kya kweji, le twikalanga na kitungo’ka?
4 Ku Njibo ne Njibo: Matrakte byoadi bu kingidilwa kifike’po kya kusapula nakyo tamba kala, pano akengidijibwa kitatyi ne kitatyi bu kya kupānwa kya kweji ne kweji kushilwila mu Kweji 11. Kitungo kyetu ke enkapo kupāna matrakte bitupu, ino i kya kwingidija matrakte mwanda wa kushilula mīsambo. Shi muntu walombola kusangela potwetana nandi dibanjiji nansha potwakamujokela, tubwanya kumulombola mwifundilwanga Bible na kwingidija dibuku Bifundija Bible nansha dibuku dikwabo dya kwifunda. I muswelo’ka otukapāna matrakte ku njibo ne njibo? Matrakte imeshileshile, o mwanda tusakilwa bidi kwiayuka kumeso kwakupāna’o.
5. Le i muswelo’ka otukapāna matrakte ku njibo ne njibo?
5 Mīsambo yetu ifwaninwe kukwatañana na mwaba ne na trakte otwingidija. Tubwanya kushilula mīsambo na kutambika mwine-njibo trakte. Kibalu kikoka kibwanya kulangula mutyima wandi wa kusangela musapu. Nansha padi tubwanya kumulombola matrakte mavule ne kumuleka mwine-njibo atonge’po umusangaja. Kitatyi kyotudi mu mwaba mupela bantu kwitushitwila ku kibelo, tubwanya kupa mwine-njibo trakte mu muswelo umulengeja amone kibalu, nansha padi tukokeja kumulomba shi witabija kumwelela kintu kampanda munshi mwa kinjilo ne kumwipangula etulombole mwalangila’po. Shi mutwe wa mwanda wa trakte i kipangujo, nabya tubwanya kumunena alete malondololo ku kipangujo’kya. Nansha tukokeja kubunda kipangujo batwe bene kibwanya kulangula mutyima wandi wa kusangela ne kituntwila ku mīsambo. Penepa tubwanya kutangila mwine-njibo myanda kampanda idi mu trakte, kwitūkija pa bipangujo bidi mu trakte ne kumunena mwine-njibo alondolole. Bisonekwa bimanine’po mwanda bifwaninwe kutangwa mu Bible. Kupwa kubandaula myanda kampanda, tubwanya kufudija mīsambo ne kukwata’ko mpangiko ya kumujokela dikwabo. Shi kipwilo kibidile kushiya mabuku ku mobo kwampikwa bantu, nankyo netu tukokeja kushiya trakte pantu patōka shi mwine-njibo kadipo’po.
6. Le i muswelo’ka otukokeja kwingidija matrakte potusapula mu bipito?
6 Kusapula mu Bipito: Le kodi mwingidije matrakte mu busapudi bwa mu bipito? Bapityeshinda bamo bekalanga beyumbila kobenda ne kadi bapelanga kwimana mwanda wa kwisamba netu. O mwanda bikalanga bikomo kuyuka shi basangedile musapu. Pa kyaba kya kwibapa mapepala pa kubulwa kuyuka shi bakatanga’o, mwene bikekala biyampe kwibapa trakte? Mwanda kibalu kya trakte i kisangaja kadi udi na musapu mwīpi, kusaka kuyuka kwa muntu kubwanya kumutonona atange’ye kitatyi kyadi na kakyaba nansha katyetye. Ino shi kebeyumbilapo kobenda, nabya tubwanya kwisamba nabo myanda kampanda idi mu trakte.
7. Sekununa myanda mimweke ilombola mwa kwingidijija matrakte potusapula bya kiponka na ponka.
7 Kusapula bya Kiponka na Ponka: I bipēla kusapula bya kiponka na ponka na matrakte. Tutu umo uselanga matrakte matyetye mu ditumba dyandi kitatyi kyonso kyatamba kwinjibo. Pa esambakana na muntu ye-yense, pamo bwa kapita mangajini, umwipangulanga shi ukokeja kumupa kintu kampanda kya kutanga kupwa wamutambika trakte. Ba mulume ne mukaji bamo kitatyi kyobakapempwile kibundi kya New York, bajingulwile amba babwanya kuketana’ko na bantu batambile mu matanda mavule. O mwanda baselele kabuku Nations ne matrakte mavule mu ndimi mishileshile. Penepa, kitatyi kyobadi bevwana muntu wisamba mu ludimi lweni wenda usumbija majulunale nansha muntu wadi ushikete kubwipi nabo pa kité pongwila bantu nansha mu leshitola, badi bamupa trakte mu lwandi ludimi.
8. Le matrakte adi pamo bwa nkunwa namani?
8 “Kuna Nkunwa Yobe”: Matrakte adi pamo bwa nkunwa. Kidimye ukusanga nkunwa konso-konso mwanda kayukilepo i yepi ikamena ne kutama. Musapudi 11:6 unena’mba: “Lubanga kuna nkunwa yobe, kadi kyolwa nakyo kokōloja dikasa dyobe; mwanda kuyukilepo kyokya kikamena biyampe, shi kino shi kyoki, shi padi amba byonso bibidi bikalumbuluka mwa kimo.” Nanshi, ‘tusambakanyei nyeke kuyukidija’ kupityila ku kino kingidilwa kifikile’po kya kusapula nakyo.—Nk. 15:7.
[Bushintuludi pa paje 3]
Matrakte byoadi bu kingidilwa kifike’po kya kusapula nakyo tamba kala, pano akengidijibwa kitatyi ne kitatyi bu kya kupānwa kya kweji ne kweji kushilwila mu Kweji 11