Mwa Kushilwila Mīsambo na Matrakte

Tamba mu Kweji 1, 2018, pa kibalu kya Kabuku ka ku Kupwila Būmi ne Mwingilo palupulwanga misapwilo ya kulondela’po. Twakankamikilwe kwisamba na bantu pa kyaba kya kwibashila mabuku bitupu. Pa kukwasha basapudi balumbulule musapwilo wabo, kulupulwanga mavideo a misapwilo ya kulondela’po alombola mwa kushilwila mīsambo na kwingidija Bible kete. Le ko kunena’mba ketufwaninwepo kwingidija mabuku potusapula ku njibo ne njibo? Aa, ke amopo! Kimfwa matrakte i mayampe kushilula nao mīsambo. Tubwanya kwingidija manwa alonda’ko pa kwingidija trakte ye-yense:

1. Ipangula muntu kipangujo kidi pa paje umbajinji ne kumunena atonge malondololo.

2. Mulombole malondololo a mu Bible mu kisonekwa kimo nansha bivule bidi kūlu kwa paje wa bubidi. Shi kukidi kitatyi, tangai ne kwisambila nandi pa myanda imoimo idi munda mwa trakte.

3. Pá mwinē njibo trakte, kadi mukankamike atange myanda mikwabo idi mu trakte nsá yo-yonso yasaka.

4. Kumeso kwa kumushiya, mulombole kipangujo kidi mu kakipindi kanena’mba, “Languluka’po Bidi” ne kumulaya mwiye difuku dikwabo mutane malondololo a mu Bible.

Shi ubamujokela, mwisambilei pa malondololo ne kumushila kipangujo kya kukesambila’po difuku dikwabo. Ubwanya kutonga kipangujo kidi pa diteba dyetu nansha kidi mu kingidilwa kilombwelwe pa paje wa mfulo wa trakte. Pa kitatyi kifwaninwe, tundulukilai nandi mu boloshile Myanda Miyampe Itamba Kudi Leza! nansha mu dibuku dikwabo dya mu Bingidilwa bya Kufundija Nabyo.